រាជធានីភ្នំពេញ ៖ យ៉ាងហោចណាស់មនុស្សប្រមាណជាង ៤០ដែលពាក់ព័ន្ធផ្ទាល់និងប្រយោលជាមួយនឹងបុរសជនជាតិកាណាដា ដើមកំណើតចិន និងមានប្រពន្ធជាជនជាតិវៀតណាមស្នាក់នៅខុនដូមួយកន្លែងនៅសង្កាត់បឹងកេងកង១ ខណ្ឌបឹងកេងកង រាជធានីភ្នំពេញ? កន្លងមកដែលកើតកូវីដ-១៩ ត្រូវបានយកសំណាកមកធ្វើតេស្តជាបន្តបន្ទាប់ ។
ឆ្លើយតបនឹងសំណួរអ្នកសារព័ត៌មានថា តើក្រសួងរកឃើញប្រភពនៃការឆ្លងរបស់ប្តី-ប្រពន្ធខាងលើហើយឬនៅ នោះលោកវេជ្ជបណ្ឌិត លី សុវណ្ណ អ្នកនាំពាក្យក្រសួងសុខាភិបាលកម្ពុជាបានបញ្ជាក់ថា «ទាក់ទងនឹងករណីដែលជនជាតិចិន-កាណាដា និងជនជាតិវៀតណាម រហូតមកដល់ពេលនេះ រកឃើញពន្លឺខ្លះៗហើយ គាត់ពាក់ព័ន្ធជាមួយនឹងជនជាតិចិននិងវៀតណាមវិជ្ជមានកន្លងមកនេះ» ។
លោកបានបន្តថា យើងបានពង្រីកការស្រាវជ្រាវ និងរកឃើញអ្នកប៉ះពាល់ដោយផ្ទាល់ដោយប្រយោលជាមួយប្តី-ប្រពន្ធខាងលើ ត្រូវបានយកវត្ថុសំណាក នៅខុនដូ និងនៅទីតាំងផ្សេងៗទៀតដែលពាក់ព័ន្ធនឹងអ្នកជំងឺគឺមាន ជាង៤០នាក់ ហើយលទ្ធផលអវិជ្ជមាន ។ ដែលរហូតពេលនេះកន្លែងដែលគាត់ទៅពាក់ព័ន្ធទាំងអស់ត្រូវបានពិនិត្យ ដូច្នេះ គឺហានិភ័យទាបណាស់» ។
យ៉ាងណាមិញថ្នាក់ដឹកនាំក្រសួងសុខាភិបាលបន្តអំពាវនាវពលរដ្ឋយើងនៅបន្តពង្រឹងរក្សាអនាម័យល្អ រក្សាគម្លាតសុវត្ថិភាពផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ