រាជធានីភ្នំពេញ៖ ចាត់ទុកជាដំណឹងល្អសម្រាប់កម្ពុជាដែលរយៈពេល ៧ ថ្ងៃនេះគឺពុំមានរកឃើញករណីវិជ្ជមានកូវីដ-១៩ថ្មីឡើយ ខណៈអ្នកជាសះស្បើយបានកើនឡើងដល់ ១០៧ នាក់ដែលនាំឲ្យកម្ពុជានាំមុខគេនៅអាស៊ានព្យាបាលជាសះស្បើយអ្នកកើតកូវីដ-១៩ បានច្រើននៅអាស៊ាន ។
ឯកឧត្តម ម៉ម ប៊ុនហេង រដ្ឋមន្ត្រីក្រសួងសុខាភិបាលបានថ្លែងនៅសន្និសីទកាសែតនៅព្រឹកថ្ងៃទី២០ មេសានេះថា គិតត្រឹមព្រឹកនេះមានអ្នកជាសះស្បើយពីកូវីដ -១៩ ចំនួន ២រូបបន្តទៀត តែយ៉ាងណាមិញសូមបងប្អូនបន្តយកចិត្តទុកដាក់ខ្ពស់ក្នុងការថែរក្សាសុខភាពពីការឆ្លងនូវវីរុសឆ្លងមួយនេះ ព្រោះមកដល់ពេលនេះគឺពុំមានថ្នាំព្យាបាលជំងឺឆ្លងមួយនេះឡើយ ។
ដូច្នេះរហូតម៉ោង ៩:៣០នាទីព្រឹក ថ្ងៃទី ២០ មេសា ២០២០ យើងពុំរកឃើញអ្នកជំងឺ COVID-19 ករណីថ្មីទេ ជាសរុបប្រទេសយើងមានចំនួន ១២២ករណី ដដែល និង មាន២ករណីជាសះស្បើយ សរុប ១០៧នាក់ ស្លាប់គ្មាន ។ ពិតមែនតែពុំរកឃេីញករណីថ្មីក៏ដោយ សូមបងប្អូនបន្តប្រយ័ត្នជាប់ជានិច្ច ដោយធ្វើអនាម័យ នៅឃ្លាតឆ្ងាយពីគ្នា មិនចេញក្រៅផ្ទះបេីមិនចាំបាច់ ។
សម្តេចតេជោ ហ៊ុន សែន នាយករដ្ឋមន្ត្រីកម្ពុជាក៏បានផ្តាំផ្ញើថាទោះបីពេលនេះ ប្រទេសយើងគ្មានការដាក់បម្រាមហាមឃាត់តឹងតែងក្នុងការធ្វើដំណើរពីខេត្តមួយទៅកាន់ខេត្តមួយក្តី បងប្អូនប្រជាពលរដ្ឋត្រូវតែមានការប្រុងប្រយ័ត្នយកចិត្តទុកដាក់ចំពោះសុវត្ថិភាពសុខភាពជាប្រចាំ ហើយត្រូវចងចាំគ្រប់ពេលថា ជំងឺឆ្លងកូវីដ-១៩ គឺជាជំងឺឆ្លងរាត្បាតដ៏កាចសាហាវបំផុត ដែលក្នុងតែមួយប៉ព្រិចភ្នែកប៉ុណ្ណោះវាអាចបង្កវិនាសកម្មបានយ៉ាងឆាប់រហ័សបំផុត។ មកទល់ពេលនេះ គ្មានថ្នាំលេបឬចាក់ព្យាបាលនៅឡើយទេ ៕
ចែករំលែកព័តមាននេះ