ខេត្តកំពង់ស្ពឺ ៖ តាមសេចក្តីរាយការណ៍បឋមបានអោយដឹងថា នាព្រឹកថ្ងៃទី២០ មេសា ឆ្នាំ២០២០ នៅគោលដៅក្នុងខណ្ឌពោធិសែនជ័យ មានកម្មការិនីស្ម័គ្រចិត្តមកពិនិត្យសុខភាព នៅកន្លែងចត្តាឡីស័កសរុបចំនួន១៧នាក់ ។…
ខេត្តកំពង់ស្ពឺ ៖ តាមសេចក្តីរាយការណ៍បឋមបានអោយដឹងថា នាព្រឹកថ្ងៃទី២០ មេសា ឆ្នាំ២០២០ នៅគោលដៅក្នុងខណ្ឌពោធិសែនជ័យ មានកម្មការិនីស្ម័គ្រចិត្តមកពិនិត្យសុខភាព នៅកន្លែងចត្តាឡីស័កសរុបចំនួន១៧នាក់ ។
តាមសេចក្តីរាយការណ៍បានឱ្យដឹងថា នាវេលាម៉ោង៨និង៣៨នាទីព្រឹកថ្ងៃទី២០ មេសា នៅកន្លែងចត្តាឡីស័កក្នុងវិទ្យាល័យហ៊ុន សែន ជម្ពូវ័ន្ត ស្ថិតក្នុងភូមិជម្ពូវ័ន្ត សង្កាត់ចោមចៅទី៣ ខណ្ឌពោធិសែនជ័យ មានកម្មការិនីម្នាក់ចូលមកពិនិត្យសុខភាព បន្ទាប់ពីពិនិត្យរួច ត្រូវបានគ្រូពេទ្យអនុញ្ញាតឱ្យគាត់ត្រឡប់ទៅវិញ ដោយសារគាត់មានសុខភាពប្រក្រតី ។ បន្ទាប់មកនៅវេលាម៉ោង៨និង៥៨នាទីព្រឹកថ្ងៃដដែលនេះ ក៏មានស្ត្រីម្នាក់ទៀតមកពិនិត្យសុខភាពនៅកន្លែងចត្តាឡីស័កនៅវិទ្យាល័យហ៊ុន សែន ជម្ពូវ័ន្តផងដែរ ដោយស្ត្រីម្នាក់នេះបានឱ្យដឹងថា គាត់មិនបានទៅស្រុកកំណើតនៅថ្ងៃចូលឆ្នាំនោះទេ គឺស្នាក់នៅបន្ទប់ជួលរហូត តែដោយសារមានបងប្អូនមកលេងផ្ទះគាត់ ទើបគាត់មិនទុកចិត្តក៏មកឱ្យគ្រូពេទ្យពិនិត្យ ព្រោះខ្លាចឆ្លងមេរោគ ។
បើតាមការរៀបចំ គឺអាជ្ញាធររួមជាមួយក្រសួងការងារបានត្រៀមបាយកញ្ចប់រហូតដល់៦០០កញ្ចប់ សម្រាប់កម្មករ កម្មការិនីហូបនៅពេលមកពិនិត្យសុខភាព នៅកន្លែងចត្តាឡីស័ក្ត ។
បើតាមអាជ្ញាធរសង្កាត់ចោមចៅទី៣បានឱ្យដឹងថា អាជ្ញាធរបានផ្សព្វផ្សាយទៅតាមអ្វីដែលជាការណែនាំរបស់រដ្ឋាភិបាល និងក្រសួងសុខាភិបាលរួចហើយ ដោយបានប្រាប់កម្មករ កម្មការិនីឱ្យមកពិនិត្យសុខភាព នៅកន្លែងចត្តាឡីស័ក្តនៅថ្ងៃទី២០ មេសា នេះ ។
តាមសេចក្តីរាយការណ៍បានឱ្យដឹងបន្តថា គិតត្រឹមវេលាម៉ោង៩និង២២ព្រឹកថ្ងៃទី២០ មេសា នេះ នៅកន្លែងចត្តាឡីស័ក្តក្នុងវិទ្យាល័យហ៊ុន សែនជម្ពូវ័ន្ត មានកម្មការិនីចំនួន១៣នាក់មកពីរោងចក្រស៊ីធីកម្ពុជា ស្ថិតក្នុងភូមិព្រៃទា សង្កាត់ចោមចៅទី៣ ត្រូវបានខាងរោងចក្រដឹកមកពិនិត្យសុខភាពផងដែរ ។
តាមប្រភពពីកម្មការិនីរោងចក្រស៊ីធីកម្ពុជាបានឱ្យដឹងថា ពួកគាត់មិនបានឈប់សម្រាកនៅថ្ងៃចូលឆ្នាំនោះទេ គឺពួកគាត់ខកខានមិនបានទៅធ្វើការមួយថ្ងៃ ដោយសារភ្លៀងខ្លាំងពេក ហើយម្យ៉ាងទៀតផ្ទះជួលរបស់ពួកគាត់នៅឆ្ងាយពីរោងចក្រផង ធ្វើឱ្យគាត់ធ្វើដំណើរទៅធ្វើការមិនទាន់ ក៏អត់បានទៅធ្វើការអស់មួយថ្ងៃ ទើបខាងរោងចក្រប្រមូលនាំមកពិនិត្យសុខភាពនៅកន្លែងចត្តាឡីស័ក្តិក្នុងវិទ្យាល័យហ៊ុន សែន ជម្ពូវ័ន្ត ។
ដោយឡែនៅគោលដៅ១ទៀត គឺនៅភូមិចោមចៅទី២ ស្ថិតក្នុងសង្កាត់ចោមចៅទី២ ជិតសាលាសង្កាត់ចោមចៅទី២ ខណ្ឌពោធិសែនជ័យ មានកម្មការិនីចូលមកពិនិត្យសុខភាពចំនួន២នាក់នាព្រឹកថ្ងៃដដែលនេះ ។ ព័ត៌មានលម្អិតនឹងមានផ្សាយជូននៅលើទំព័រកាសែតកោះសន្តិភាព ៕ (កែសម្រួលដោយ ៖ ធីតា)
ចែករំលែកព័តមាននេះ