ក្លិបបាល់ទាត់ Wuhan Zall របស់ប្រទេសចិនបានវិលត្រឡប់មកកាន់ផ្ទះរបស់ខ្លួនវិញហើយកាលពីថ្ងៃសៅរ៍ បន្ទាប់ពីជាប់គាំងជាង៣ខែ ដោយសារតែការផ្ទុះឡើងនៃវីរុសកូវីដ១៩ ។
រលឹកជូនថា ក្លិបបាល់ទាត់ក្នុងលីគកំពូលចិន (CSL) មួយនេះបានធ្វើដំណើរទៅកាន់ប្រទេសអេស្ប៉ាញ ដើម្បីបោះជំរំហ្វឹកហាត់រដូវក្តៅនៅទីនោះ ។ ស្ថិតនៅក្នុងតំបន់ Costa del Sol ក្នុងរយៈពេលត្រឹមតែ ២ ខែប៉ុណ្ណោះ ពួកគេក៏បានសម្រេចចិត្តថានឹងវិលត្រឡប់ទៅប្រទេសចិនវិញ។
ទីក្រុងវូហាន ដែលជាទីតាំងផ្ទុះដំបូងនៃវីរុសកូវីដ១៩ ត្រូវបានប្រកាសបិទទាំងស្រុង ដែលជាហេតុធ្វើឲ្យក្លិបត្រូវបង្ខំចិត្តស្នាក់នៅក្នុងខេត្តក្វាងទុង និងទីក្រុងជុំវិញដែលមានចម្ងាយប្រហែល ៦០០ ម៉ាយល៍ (Miles) ពីស្រុកកំណើតរបស់ពួកគេ ។
ដោយសារតែស្ថានភាពបានវិលមករកសភាពល្អប្រសើរ ទីក្រុងវូហានក៏ត្រូវបានប្រកាសបើកឡើងវិញ ដែលជាពេលសមស្របមួយសម្រាប់ក្លិបមួយនេះវិលត្រឡប់ ។ ក្នុងនោះគេសង្កេតឃើញថា ក្រុមអ្នកគាំទ្របាននាំគ្នាទៅទទួលស្វាគមន៍ ការវិលត្រឡប់របស់ក្រុម Wuhan Zall ដោយបានពាក់ម៉ាស និងមានការកាន់បដាផងដែរ ។
បច្ចុប្បន្នភាពនៃជំងឺរលាកផ្លូវដង្ហើមបង្កដោយកូរ៉ូណាវីរុស (COVID-19) បានកើតឡើងលើមនុស្សចំនួនជាង ២,៣ លានករណី និងមានមនុស្សស្លាប់ជាង ១៦០.០០០ នាក់នៅទូទាំងពិភពលោក ខណៈដែលសហរដ្ឋអាមេរិកជាប្រទេសរងគ្រោះខ្លាំងបំផុត ៕ (ដកស្រង់ចេញពី The Sun)
ចែករំលែកព័តមាននេះ