ខេត្តប៉ៃលិន ៖ បើតាមសេចក្តីរាយការណ៍បានឱ្យដឹងថា បុរសម្នាក់បានបាត់បង់ជីវិតភ្លាមៗ ខណៈបើកត្រាក់ទ័រភ្ជួរដីក្នុងចម្ការរបស់ខ្លួនសុខៗ ស្រាប់តែប៉ះចំដីឡើងទួលក៏រអិលថយក្រោយធ្លាក់ចូលក្នុងប្រឡាយអត់ទឹក រួចក៏ត្រូវត្រាក់ទ័រសង្កត់ពីលើជនរងគ្រោះពេញទំហឹង បណ្តាលឱ្យបាត់បង់ជីវិតភ្លាមៗនៅនឹងកន្លែងចោលប្រពន្ធ និងកូនយ៉ាងអាណោចអាធ័មតែម្តង ។…
ខេត្តប៉ៃលិន ៖ បើតាមសេចក្តីរាយការណ៍បានឱ្យដឹងថា បុរសម្នាក់បានបាត់បង់ជីវិតភ្លាមៗ ខណៈបើកត្រាក់ទ័រភ្ជួរដីក្នុងចម្ការរបស់ខ្លួនសុខៗ ស្រាប់តែប៉ះចំដីឡើងទួលក៏រអិលថយក្រោយធ្លាក់ចូលក្នុងប្រឡាយអត់ទឹក រួចក៏ត្រូវត្រាក់ទ័រសង្កត់ពីលើជនរងគ្រោះពេញទំហឹង បណ្តាលឱ្យបាត់បង់ជីវិតភ្លាមៗនៅនឹងកន្លែងចោលប្រពន្ធ និងកូនយ៉ាងអាណោចអាធ័មតែម្តង ។
សេចក្តីរាយការណ៍បន្តថា លុះប្រពន្ធមករកប្តីក៏ឃើញសភាពប្តីបែបនេះ ក៏ស្រែកយំរត់ទៅបហៅអ្នកជិតខាងជួយគាស់យកប្តីចេញពីក្រោមត្រាក់ទ័រ បង្កឱ្យមានការភ្ញាក់ផ្អើលកាលពីម៉ោង១០និង៣០នាទីព្រឹក ថ្ងៃទី១៨ ខែមេសា ឆ្នាំ២០២០ នៅត្រង់ចំណុចក្នុងចម្ការ១កន្លែង ស្ថិតក្នុងភូមិអូរច្រាលិច សង្កាត់បរយ៉ាខា ក្រុងប៉ៃលិន ខេត្តប៉ៃលិន ។
ប្រភពពីនគរបាលបានឱ្យដឹងថា ជនរងគ្រោះខាងលើឈ្មោះ លាង ហេង ភេទប្រុស អាយុ៤២ឆ្នាំ សញ្ជាតិខ្មែរ មុខរបរកសិករ រស់នៅភូមិអូរច្រាលិច សង្កាត់បរយ៉ាខា ក្រុងប៉ៃលិន ខេត្តប៉ៃលិន ដោយបានបើកបរត្រាក់ទ័រ ពណ៌ក្រហម ម៉ាក YAMAHA F១៨០ ។
បើតាមនគរបាលបន្តថា មុនពេលកើតហេតុ បុរសម្នាក់បានបើកត្រាក់ទ័រភ្ជួរដីក្នុងចម្ការរបស់ខ្លួនសុខៗ ក៏ស្រាប់តែប៉ះចំដីឡើងទួល រួចដាក់លេខអត់ចូល ស្រាប់តែរអិលថយក្រោយតែម្តង ។ ស្របពេលនោះជនរងគ្រោះបានព្យាយាមជាន់ហ្វ្រាំងដែរ តែអត់ជាប់ បណ្តាលឱ្យត្រាក់ទ័រនោះរអិលថយក្រោយ រួចធ្លាក់ចូលក្នុងប្រឡាយអត់ទឹក ក៏ត្រូវត្រាក់ទ័រសង្កត់ពីលើជនរងគ្រោះពេញទំហឹង បណ្តាលឱ្យបាត់បង់ជីវិតភ្លាមៗនៅនឹងកន្លែងចោលប្រពន្ធ និងកូនយ៉ាងអាណោចអាធ័ម។
ប្រភពបន្តទៀតថា ក្រោយពេលកើតហេតុ ប្រពន្ធជនរងគ្រោះដើរទៅរកមើលប្តីរបស់ខ្លួន ស្រាប់តែឃើញប្តីរបស់ខ្លួនស្ថិតក្នុងសភាពបែបនេះ ក៏ស្រែកយំស្ទើរតែគាំងបេះដូង រួចរត់ទៅហៅឱ្យអ្នកជិតខាង ដើម្បីឱ្យជួយគាស់យកសពប្តីរបស់ខ្លួនចេញពីក្រោមត្រាក់ទ័រនោះ ហើយក៏បានប្តឹងនគរបាល ដើម្បីឱ្យចុះទៅពិនិត្យភ្លាមៗតែម្តង ។
បច្ចុប្បន្នសពជនរងគ្រោះ ត្រូវបាននគរបាលប្រគល់ជូនទៅឱ្យសាច់ញាតិ ដើម្បីធ្វើបុណ្យតាមប្រពៃណី ។
បើតាមនគរបាលបានឱ្យដឹងដែរថា នៅក្នុងខេត្តប៉ៃលិននេះ សំបូរទៅដោយដីចម្ការនៅកន្លែងដីខ្ពង់រាប ខ្ពស់ទាបៗ មានកូនភ្នំជាដើម ។ ដូច្នេះពេលកសិករបើកបរត្រាក់ទ័រភ្ជួររាស់ដីធ្លីរបស់ខ្លួន ឬស៊ីឈ្នួលភ្ជួរឱ្យគេក្តី ត្រូវតែមានការប្រុងប្រយ័ត្នខ្ពស់ ដើម្បីកុំឱ្យមានករណីគ្រោះថ្នាក់ជាយថាហេតុបែបនេះកើតឡើងបន្តទៀតផងដែរ ៕ (កែសម្រួលដោយ ៖ បុប្ផា)
ចែករំលែកព័តមាននេះ