អេស្បាញ ៖ ក្មេងតូចៗនៅប្រទេសអេស្បាញក្រោយពីវីរុសកូវីដ-១៩ បានវាយប្រហារប្រទេសមួយនេះយ៉ាងធ្ងន់ធ្ងរ ត្រូវបានរដ្ឋាភិបាលប្រកាសថា នឹងមានការបន្ធូរបន្ថយនូវលក្ខខណ្ឌមួយចំនួចសម្រាប់ក្មេងៗដែលត្រូវបានដាក់ឲ្យនៅផ្ទះតាមងពីថ្ងៃទី១៤ មីនា ដើម្បីទប់ស្កាត់ការឆ្លង និងការរាតត្បាតវីរុសឆ្លង ។
នាយករដ្ឋមន្ត្រីអេស្បាយលោក Pedro Sánchez បានថ្លែងថា លោកមានគោលបំណងបន្ធូរបន្ថយច្បាប់ដែលកំហិតពលរដ្ឋអេស្បាយរួមទាំងក្មេងៗឲ្យនៅក្នុងផ្ទះ ដូច្នេះក្មេងៗអាចចេញក្រៅផ្ទះខ្លះៗ ដើម្បី «ទទួលបានខ្យល់អាកាសបរិសុទ្ធ» ចាប់ពីថ្ងៃទី ២៧ មេសា ឆ្នាំ ២០២០ នេះតទៅ ។ នេះបើយោងតាមការចុះផ្សាយរបស់ CNN ថ្ងៃទី ១៩ មេសា ។
អភិបាលក្រុងបាសេឡូណាលោក Ada Colau ដែលមានកូនតូចខ្លួនឯងត្រូវដាក់នៅក្នុងផ្ទះមិនឲ្យចេញទៅក្រៅដែរនោះ នៅសប្តាហ៍នេះបានទទូចសុំរដ្ឋាភិបាលអនុញ្ញាតឱ្យក្មេងៗអាចចេញក្រៅសម្រាប់ការលេងកំសាន្ត ។ សូមបញ្ជាក់ថា ប្រទេសអេស្បាញមានអ្នកស្លាប់ជាង ២ ម៉ឺននាក់ចាប់តាំងពីការឆ្លងរាលដាលនៃជំងឺរាតត្បាតនេះ និងមានករណីរាយការណ៍ជិត ២០០.០០០ ករណី។
ថ្លែងនៅក្នុងសន្និសីទសារព័ត៌មានតាមទូរទស្សន៍មួយនៅល្ងាចថ្ងៃសៅរ៍ លោក Sánchez បាននិយាយថា អេស្បាញបានបន្សល់ទុកនូវ «ពេលវេលាដ៏អាក្រក់បំផុតនិងមានការវាយប្រហារដ៏សាហាវនៃជំងឺរាតត្បាត»។
ប៉ុន្តែលោកបាននិយាយថា «លោកនឹងស្នើឱ្យសភាពន្យាពេលប្រកាសអាសន្នរបស់អេស្ប៉ាញដល់ថ្ងៃទី ៩ ឧសភា ព្រោះទោះបីស្ថានភាពកូវីដ-១៩ នៅក្នុងប្រទេសហាក់ប្រសើរឡើងក៏ពិតមែន តែវាមិនទាន់គ្រប់គ្រាន់ និងនៅមានហានិភ័យខ្ពស់ ហើយភាពផុយស្រួយទាំងអស់ អាចត្រូវបានធ្វើឱ្យមានអន្តរាយជាថ្មី ដោយការធ្វើសេចក្តីសម្រេចចិត្តប្រញាប់ណាមួយ» នោះ ក្នុងការបញ្ចប់នូវការដាក់កំហិតគម្លាតសុវត្ថិភាព ឬបទបញ្ជាឲ្យនៅក្នុងផ្ទះ ។ ទោះយ៉ាងណាក៏ដោយវិធានការចាក់សោរមិនឲ្យចេញក្រៅផ្ទះនៅបន្តអនុវត្ត តែមនុស្សពេញវ័យត្រូវបានអនុញ្ញាតឱ្យទៅហាងអាហារ និងឱសថស្ថាន ឬការងារដែលត្រូវបានចាត់ទុកថាចាំបាច់ ចំណែកកុមារតូចៗត្រូវបានរារាំងមិនឱ្យចាកចេញពីផ្ទះរបស់ពួកគេទាំងស្រុង។
សូមបញ្ជាក់ថា កុមារតូចៗចំនួន ៨ លាននាក់របស់អេស្បាញ ត្រូវបានដាក់នៅក្នុងផ្ទះទាំងស្រុងរយៈពេល ៥ សប្តាហ៍ ។ យ៉ាងណាមិញ សម្ព័ន្ធភាពសិទ្ធិកុមារអេស្បាញបានព្រមានអំពីបញ្ហាសុខភាពផ្លូវចិត្ត និងរាងកាយសម្រាប់កុមារដែលជាលទ្ធផលនៃវិធានការបង្ខាំងនិងបានអំពាវនាវឱ្យក្មេងប្រុស និងក្មេងស្រីត្រូវបានអនុញ្ញាតឱ្យនៅខាងក្រៅលេង និងធ្វើសកម្មភាពរាងកាយមួយចំនួន។
អភិបាលក្រុងបាសេឡូណាបានទាមទារថា «ក្មេងៗទាំងនេះចាំបាច់ត្រូវចេញទៅក្រៅ។ កុំរង់ចាំទៀត ដោះលែងកូនៗ យើង!» ។
ប្រទេសផ្សេងទៀតដូចជាដាណឺម៉ាក បានចាប់ផ្តើមបើកសាលារៀនសម្រាប់អាយុក្រោម ១១ ឆ្នាំខណៈប្រទេសន័រវេស នឹងបើកសាលាមត្តេយ្យនៅថ្ងៃច័ន្ទ។ ប្រទេសអាឡឺម៉ង់ នឹងបើកសាលារៀនឡើងវិញនៅថ្ងៃទី ៤ ខែឧសភា ៕ ដកស្រង់ចេញពីវេបសាយ ៖ bbc (កែសម្រួលដោយ ៖ បុប្ផា)
ចែករំលែកព័តមាននេះ