រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា នៅព្រឹកនេះ គណៈមេបញ្ជាការឯកភាពខណ្ឌឫស្សីកែវ សហការជាមួយសង្កាត់ ព្រមទាំងក្រុមគ្រូពេទ្យ សាលា និងមន្ត្រីពាក់ព័ន្ធ បានចុះមកត្រួតពិនិត្យ…
រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា នៅព្រឹកនេះ គណៈមេបញ្ជាការឯកភាពខណ្ឌឫស្សីកែវ សហការជាមួយសង្កាត់ ព្រមទាំងក្រុមគ្រូពេទ្យ សាលា និងមន្ត្រីពាក់ព័ន្ធ បានចុះមកត្រួតពិនិត្យ និងធ្វើអនាម័យនៅក្នុងសាលាវិទ្យាល័យឫស្សីកែវ ដោយបានបាញ់ថ្នាំសម្លាប់មេរោគ និងត្រៀមទទួលកម្មករ កម្មការិនីដែលត្រឡប់មកពីស្រុកកំណើត ដើម្បីដាក់ដាច់ឡែករយៈពេល១៤ថ្ងៃក្នុងវិទ្យាល័យនោះផងដែរ នាព្រឹកថ្ងៃទី១៩ ខែមេសា ឆ្នាំ ២០២០ នេះ។
សេចក្តីរាយការណ៍បន្តថា កិច្ចប្រតិបត្តិការខាងលើនេះ គេឃើញមានការចូលរួមពីលោក ជា ពិសី អភិបាលខណ្ឌឫស្សីកែវ ព្រមទាំងក្រុមគ្រូពេទ្យស្ម័គ្រចិត្តរបស់សម្តេចតេជោ និងមន្ត្រីរបស់ក្រសួងសុខាភិបាល ព្រមទាំងអាជ្ញាធរពាក់ព័ន្ធ និងសហការជាមួយលោកគ្រូ អ្នកគ្រូនៅក្នុងវិទ្យាល័យខាងលើនេះ ដើម្បីត្រៀមរៀបចំទទួលកម្មករ កម្មការិនីដែលត្រឡប់មកស្រុកកំណើត ដែលត្រូវប្រមូលនៅព្រឹកថ្ងៃស្អែកនេះ ។
ហើយនៅក្នុងមូលដ្ឋានខណ្ឌឫស្សីកែវនេះផងដែរ គឺបើតាមការគ្រោងទុកនោះ គឺមានកម្មករ កម្មការិនីប្រមាណជាង១០០០នាក់ដែលបានធ្វើដំណើរទៅស្រុកកំណើតនាថ្ងៃបុណ្យចូលឆ្នាំខ្មែរកន្លងទៅនោះ ហើយត្រូវអាជ្ញាធរ និងសមត្ថកិច្ចគ្រោងនឹងប្រមូលយកមកដាក់ក្នុងវិទ្យាល័យឫស្សីកែវ និងសាលាបឋមសិក្សាឫស្សីកែវ ស្ថិតក្នុងខណ្ឌឫស្សីកែវ ។
គួរបញ្ជាក់ថា នៅព្រឹកថ្ងៃទី១៩ មេសានេះផងដែរ គេឃើញពលករខ្មែរមកពីប្រទេសថៃម្នាក់ ហើយត្រូវបានសមត្ថកិច្ចនាំមកកាន់វិទ្យាល័យខណ្ឌឫស្សីកែវ ហើយដោយសារតែមិនទាន់ចាត់អនុវត្តនោះ ក៏ត្រូវសមត្ថកិច្ច ក៏ដូចជាអាជ្ញាធរបានណែនាំឱ្យទាក់ទងហៅអាណាព្យាបាលមកទទួលត្រឡប់ទៅលំនៅដ្ឋានវិញ រួចក៏បានណែនាំឱ្យអាណាព្យាបាលដាក់ពលរដ្ឋខ្មែរមកពីថៃរូបនេះដាក់នៅដាច់ដោយឡែកពីគេរយៈពេល១៤ថ្ងៃសិន ដើម្បីតាមដានបន្ត ។
គួររំលឹកថា នៅក្នុងឱកាសបុណ្យចូលឆ្នាំខ្មែរប្រពៃណីជាតិកន្លងមកទៅ គឺកម្មករ កម្មការិនីរោងចក្រដែលបានធ្វើដំណើរទៅលេងស្រុកកំណើតដោយមិនបានមកធ្វើការងារទាំងអស់សរុបចំនួន១៥៧២៦នាក់ នៅតាមបណ្តារោងចក្រនានាក្នុងខណ្ឌទាំង១២ នៅរាជធានីភ្នំពេញ ។ (កែសម្រួលដោយ ៖ បុប្ផា)
ចែករំលែកព័តមាននេះ