រាជធានីភ្នំពេញ ៖ នៅថ្ងៃនេះក្រសួងសុខាភិបាលបានបញ្ជាក់ថា គិតត្រឹមថ្ងៃទី១៩ ខែមេសា ឆ្នាំ២០២០នេះ គ្មានអ្នកឆ្លងជំងឺកូវីដ១៩ថ្មីនោះទេ ខណៈការព្យាបាលជាសះស្បើយកើនឡើងដល់១០៥នាក់ហើយ ដោយឡែកនៅសល់តែ១៧នាក់ទៀតកំពុងព្យាបាលបន្តនៅតាមមន្ទីរពេទ្យរដ្ឋថ្នាក់ជាតិ និងថ្នាក់ខេត្ត ។
នៅថ្ងៃនេះ ក្រសួងសុខាភិបាលកម្ពុជា បានប្រកាសថា មិនមានករណីឆ្លងថ្មីបន្ថែមទេ ដែលនាំឲ្យចំនួនអ្នកឆ្លងសរុបទាំងអស់មាន ១២២នាក់ថេរដដែល ដោយអ្នកជាសះស្បើយថ្មីមាន២នាក់បន្ថែមទៀត ។
ជាក់ស្តែងករណីអ្នកជាសះស្បើយ២នាក់ថ្មីថ្ងៃនេះ គឺជាស្ត្រីជនជាតិវៀតណាមអាយុ៣៤នាក់ម្នាក់ ដែលសម្រាកព្យាបាលនៅមណ្ឌលសុខភាពចាក់អង្រែក្រោម ក្នុងរាជធានីភ្នំពេញ រួចត្រូវបានអនុញ្ញាតិឱ្យចេញពីមន្ទីរពេទ្យ ក្រោយពេលធ្វើតេស្តទទួលបានលទ្ធផលអវិជ្ជមានចំនួន២លើក ។
ចំណែកម្នាក់ទៀតគឺជាក្មេងប្រុស ជនជាតិខ្មែរ អាយុ១២ឆ្នាំ រស់នៅក្រុងសៀមរាប បានជាស្បះស្បើយដោយទទួលបានលទ្ធផលអវិជ្ជមានចំនួន២លើកដូចគ្នា ដែលត្រូវអនុញ្ញាតិឱ្យចេញពីមន្ទីរពេទ្យនៅខេត្តសៀមរាប ។
សូមរំលឹកថា ប្រទេសកម្ពុជា រយៈពេល៧ថ្ងៃជាប់គ្នានេះ ពុំមានករណីវិជ្ជមានថ្មីនៃកូវីដ១៩ នោះទេ ខណៈការព្យាបាលជាសះស្បើយថ្ងៃនេះគឺបាន២នាក់បន្ថែម ដែលនាំឱ្យចំនួនសរុបនៃការជាស្បះស្បើយកើនឡើងដល់១០៥នាក់ហើយ។ ដោយឡែកនៅសល់តែ១៧នាក់ទៀតប៉ុណ្តោះកំពុងព្យាបាលបន្តនៅតាមមន្ទីរពេទ្យរដ្ឋថ្នាក់ជាតិ និងថ្នាក់ខេត្ត ៕ (កែសម្រួលដោយ ៖ បុប្ផា)
ចែករំលែកព័តមាននេះ