ព្រះបរមសារីរិកធាតុរបស់ព្រះពុទ្ធដែលត្រូវបានតម្កល់ទុកនៅក្នុងព្រះសក្យមុនីចេតិយនៅលើកំពូលភ្នំព្រះរាជទ្រព្យ ឬភ្នំអដ្ឋរស្សបច្ចុប្បន្នបានជាទីគោរពបូជាយ៉ាងខ្លាំងក្លាពីសំណាក់ប្រជាពលរដ្ឋខ្មែរ ដែលគោរពព្រះពុទ្ធសាសនា ចាត់ទុកថាជារតនវត្ថុដ៏ពិសិដ្ឋមួយសម្រាប់គោរពបូជាដែលមិនអាចកាត់ថ្លៃបាន ។
ព្រះបរមសារីរិកធាតុ គឺជាតំណាងព្រះពុទ្ធបរមគ្រូ និងជាតំណាងនូវភាពត្រជាក់ត្រជំសម្រាប់ប្រទេសកម្ពុជា ព្រះសារីរិកធាតុពិតជារតនវត្ថុដ៏មានសារសំខាន់ខ្លាំងណាស់សម្រាប់ជនជាតិខ្មែរដែលជាអ្នកគោរពព្រះពុទ្ធសាសនា ពីព្រោះព្រះបរមសារីរិកធាតុនោះគឺជាផ្នែកមួយនៃព្រះសរីររាងកាយរបស់ព្រះសម្មាសម្ពុទ្ធជាទីគោរពបូជាដ៏ខ្ពង់ខ្ពស់ ។
ព្រះមហាសុវណ្ណ មុនី បានមានសង្ឃដីកាថា ពុទ្ធសាសនិកទាំងអស់បានគោរព និងលើកគុណតម្លៃព្រះបរមសារីរិកធាតុ ដែលជាព្រះអដ្ឋិធាតុរបស់ព្រះពុទ្ធនោះខ្លាំងណាស់ គឺសំដៅគោរពដល់ព្រះគុណូបការៈ ឬគុណសម្បត្តិដ៏ល្អខ្ពង់ខ្ពស់របស់ព្រះអង្គដូចជា ទ្រង់មានព្រះទ័យមេត្តាអាណិតអាសូរឥតព្រំដែនក្នុងការសម្ដែងធម្មទេសនាពន្យល់ប្រោសមនុស្សទូទៅឲ្យបានយល់ធម៌ ហើយរំដោះខ្លួនឲ្យរួចចេញពីសេចក្តីទុក្ខទាំងឡាយ ។
អ្នកប្រាជ្ញព្រះពុទ្ធសាសនា បានបញ្ជាក់ថា ក្រោយពីព្រះពុទ្ធទ្រង់បរិនិព្វានទៅ ពុទ្ធបរិស័ទបានគោរពបូជាដល់គុណសម្បត្តិរបស់ព្រះអង្គ ដោយយកព្រះធម៌ដែលទ្រង់បានសម្ដែងមកបដិបត្តិ និងគោរពបូជាព្រះបរមសារីរិកធាតុ គោរពព្រះមហាពោធិព្រឹក្ស ដែលទ្រង់បានគង់ប្រថាប់ចម្រើនធម៌នៅក្រោមដើមឈើនោះរហូតបានត្រាស់ដឹង គោរពព្រះចេតិយជាទីតម្កល់ព្រះបរមសារីរិកធាតុ និងគោរពព្រះពុទ្ធរូបជាដើម ។
រតនវត្ថុទាំងអស់នោះហើយជាទីសក្ការៈដ៏ថ្លៃថ្លានៃអ្នកគោរពព្រះពុទ្ធសាសនា នាំឱ្យប្រទេសជាតិត្រជាក់ត្រជំ ប្រជារាស្ត្ររស់នៅដោយសុខសាន្ត ។ សាន សារិន
ចែករំលែកព័តមាននេះ