រាជធានីភ្នំពេញ ៖ ជនសង្ស័យពាក់ព័ន្ធនឹងករណីឆក់ខ្សែក និងឆក់កាបូបយ៉ាងសកម្មចំនួន៣នាក់ ក្នុងនោះមានស្ត្រីម្នាក់ត្រូវបានកម្លាំងនគរបាលការិយាល័យព្រហ្មទណ្ឌកំរិតស្រាលនៃស្នងការនគរបាលរាជធានីភ្នំពេញបង្ហាញមុខជាសាធារណៈកាលពីវេលាម៉ោង២រសៀលថ្ងៃទី១៧ ខែ មេសា នេះ បន្ទាប់ពីធ្វើសកម្មភាពឆក់ ហើយត្រូវបានកម្លាំងល្បាតឃាត់ខ្លួនជាបន្តបន្ទាប់…
រាជធានីភ្នំពេញ ៖ ជនសង្ស័យពាក់ព័ន្ធនឹងករណីឆក់ខ្សែក និងឆក់កាបូបយ៉ាងសកម្មចំនួន៣នាក់ ក្នុងនោះមានស្ត្រីម្នាក់ត្រូវបានកម្លាំងនគរបាលការិយាល័យព្រហ្មទណ្ឌកំរិតស្រាលនៃស្នងការនគរបាលរាជធានីភ្នំពេញបង្ហាញមុខជាសាធារណៈកាលពីវេលាម៉ោង២រសៀលថ្ងៃទី១៧ ខែ មេសា នេះ បន្ទាប់ពីធ្វើសកម្មភាពឆក់ ហើយត្រូវបានកម្លាំងល្បាតឃាត់ខ្លួនជាបន្តបន្ទាប់ ។ ក្នុងការបង្ហាញមុខនេះ ជនសង្ស័យជាស្ត្រីពុំបានយកមកបង្ហាញនោះទេដោយសារតែមានជំងឺ។
ជនសង្ស័យដែលត្រូវឃាត់ខ្លួនទាំង៣នាក់ខាងលើរួមមាន ១-ឈ្មោះសោម វ៉ាលីសា ហៅហ្សា ភេទប្រុសអាយុ២០ឆ្នាំ ជាមន្ត្រីយោធា ស្នាក់នៅផ្ទះលេខ១៣ EO ផ្លូវលេខ២៧១ សង្កាត់បឹងសាឡាង ខណ្ឌទួលគោក រាជធានីភ្នំពេញ ២-ឈ្មោះអុី សុភ័ក្រនិត ហៅឌី ណារ័ត្ន ភេទប្រុស អាយុ២១ឆ្នាំ មុខរបរលក់ដូរ ស្នាក់នៅភូមិដីថ្មី សង្កាត់គោកឃ្លាង ខណ្ឌសែនសុខ និង៣-ឈ្មោះ លីរ៉ា ណែត ភេទស្រី អាយុ២០ឆ្នាំ មានលំនៅតាមផ្លូវជាតិលេខ៥ ភូមិ.ឃ សង្កាត់ច្រាំងចំរេះទី២ ខណ្ឌឬស្សីកែវ ។
លោកវរៈសេនីយ៍ឯក ប៊ុន សត្យា នាយការិយាល័យ នគរបាលព្រហ្មទណ្ឌកំរិតស្រាលនៃស្នងការនគរបាលរាជធានីភ្នំពេញបានអោយដឹងថា ជនសង្ស័យត្រូវបានកម្លាំងនគរបាលឃាត់ខ្លួនជាបន្តបន្ទាប់ កាលពីវេលារសៀលថ្ងៃទី១៥ ខែមេសា ឆ្នាំ២០២០ នៅតាមបណ្តោយផ្លូវលេខ៣៣៥ សង្កាត់បឹងកក់ទី២ ខណ្ឌទួលគោក និងព្រឹកថ្ងៃទី១៦ ខែមេសា នៅតាមផ្លូវលំ សង្កាត់ត្រពាំងក្រសាំង ខណ្ឌពោធិ៍សែនជ័យ បន្ទាប់ពីធ្វើសកម្មភាពឆក់ខ្សែកជាបន្តបន្ទាប់២លើកនៅថ្ងៃតែមួយនៅក្នុងមូលដ្ឋានខណ្ឌទួលគោក។
តាមប្រភពព័ត៌មានបានអោយដឹងទៀតថា កាលពីវេលាម៉ោងប្រមាណ៤និង៣០នាទីរសៀលថ្ងៃទី១៥ ខែមេសា ជនសង្ស័យឈ្មោះ សោម វ៉ាលីសា ដែលជាមន្ត្រីយោធា បានជិះម៉ូតូម៉ាកហុងដាឌ្រីម ស៊េរីឆ្នាំ២០២០ ពណ៌ក្រហម គ្មានស្លាកលេខ បានធ្វើសកម្មភាពឆក់ខ្សែកប្លាទីនដាំពេជ្រពីនារីម្នាក់នៅចំណុចមុខផ្ទះលេខ ២DEOផ្លូវលេខ ១១២ កែងផ្លូវលេខ២៣៣ សង្កាត់ផ្សារដេប៉ូទី២ ។
តាមប្រភពព័ត៌មានបានបន្តទៀតថា នៅក្នុងសកម្មភាពឆក់បានសម្រេច ដោយមានបក្ខពួក២នាក់ទៀត ឈ្មោះអុី សុភ័ក្រនិត និងឈ្មោះលី រ៉ាណែត ជិះម៉ូតូមួយគ្រឿងម៉ាកស្គូពី ពណ៌ស ពាក់ស្លាកលេខ ភ្នំពេញ១HG-២៦៦៥ ជាអ្នកបិទគូទ ។ បន្ទាប់ពីឆក់បានសម្រេច ជនសង្ស័យជិះម៉ូតូគេចខ្លួន លុះពេលធ្វើដំណើរ មកដល់ចំណុចមុខផ្ទះលេខ៩៥២ ផ្លូវលេខ១២៨ សង្កាត់ទឹកល្អក់ទី១ ជនសង្ស័យឈ្មោះសោម វ៉ាលីសា ក៍បានធ្វើសកម្មភាពឆក់ខ្សែកពីបុរសម្នាក់ ដែលជិះម៉ូតូឌុបនារីម្នាក់ ។ នៅក្នុងសកម្មភាពឆក់បានតែមួយកំណាត់ ហើយជនសង្ស័យជិះគេចខ្លួន ហើយត្រូវបានជនរងគ្រោះស្រែកចោរៗ និងជិះម៉ូតូដេញតាម។
តាមព័ត៌មានអោយដឹងបន្តទៀតថា នៅពេលនោះជនសង្ស័យឈ្មោះអុី សុភ័ក្រនិត និងឈ្មោះលី រ៉ាណែត ជិះគេចខ្លួន ហើយត្រូវបានកម្លាំងល្បាតរបស់នគរបាលការិយាល័យព្រហ្មទណ្ឌកំរិតស្រាលដេញតាមមកដល់ ចំណុចផ្លូវលេខ៥៩២កែង៣៣៥ សង្កាត់បឹងកក់ទី២ ខណ្ឌទួលគោក ក៏បានជួបគ្រោះថ្នាក់ចរាចរណ៍ បុកជាមួយរថយន្ត ក៏ត្រូវចាប់ឃាត់ខ្លួនបាន២នាក់ ។ លុះរំលងបានមួយថ្ងៃ នៅព្រឹកថ្ងៃទី១៦ ខែ មេសាឆ្នាំ២០២០ សមត្ថកិច្ចក៏បានស្រាវជ្រាវឃាត់ខ្លួន បានជនសង្ស័យម្នាក់ទៀតឈ្មោះសោម វ៉ាលីសា នៅចំណុចផ្លូវលំ ក្នុងសង្កាត់ត្រពាំងក្រសាំង ខណ្ឌពោធិ៍សែនជ័យ ។
លោកវរៈសេនីយ៍ឯក ប៊ុន សត្យា នាយការិយាល័យបានអោយដឹងទៀតថា បន្ទាប់ពីឃាត់ខ្លួនជនសង្ស័យរួចមក សមត្ថកិច្ចឈានចុះទៅឆែកឆេរផ្ទះជនសង្ស័យ ដោយដកហូតបានកាបូបស្ពាយ និងកាបូបយួររបស់ជនរងគ្រោះចំនួន១៣ ព្រមទាំងដកហូតបានម៉ូតូ២គ្រឿង ដែលជិះធ្វើសកម្មភាព។
តាមចម្លើយសារភាព ជនសង្ស័យបានធ្វើសកម្មភាពឆក់ចំនួន៤លើក ក្នុងនោះលើក១-ឆក់យកខ្សែកផ្លាទីនដាំពេជ្រ នៅចំណុចមុខផ្ទះលេខ ២DEO ផ្លូវលេខ១១២ កែងផ្លូវលេខ២៣៣ សង្កាត់ផ្សារដេប៉ូទី២ កាលពីវេលាម៉ោង៤និង៣០នាទីថ្ងៃទី១៥ ខែមេសា ឆ្នាំ ២០២០ លើកទី២-ឆក់ខ្សែក នៅចំណុចមុខ ផ្ទះលេខ ៩៥២ ផ្លូវលេខ១២៨ សង្កាត់ទឹកល្អក់ទី១ ខណ្ឌទួលគោក កាលពីវេលាម៉ោង៥រសៀលថ្ងៃទី១៥ ខែមេសា ឆ្នាំ ២០២០ ។
លើក៣-ឆក់កាបូបដៃរបស់មន្ត្រីយោធាកាលពីវេលាម៉ោងប្រមាណ២រសៀលថ្ងៃទី២៩ ខែធ្នូ ឆ្នាំ២០១៩នៅចំណុចផ្លូវលេខ១៦៨ កែងផ្លូវលេខ២៧៦ សង្កាត់អូឡាំពិច ខណ្ឌបឹងកេងកង យកបានមាសទង្ងន់៦តម្លឹងនិងលុយ៣១០០០ដុល្លារ និងលើកទី៤ឆក់ខ្សែកផ្លាទីនកាលពីថ្ងៃទី២២ ខែមិនា ឆ្នាំ២០២០ នៅចំណុចផ្លូវលេខ ១៥៦ សង្កាត់ទឹកល្អក់ទី២ ខណ្ឌទួលគោក ។
បន្ទាប់ពីបង្ហាញមុខ ជនសង្ស័យត្រូវបាននគរបាលបញ្ចូនទៅកាន់សាលាដំបូងដើម្បីចាត់ការតាមច្បាប់នៅវេលាព្រឹកថ្ងៃទី១៨ ខែ មេសា ៕
ចែករំលែកព័តមាននេះ