ថ្ងៃនេះប្រទេសចិន បានបន្ថែមចំនួនអ្នកស្លាប់ដោយសារ កូវីដ១៩ នៅទីក្រុងវ៉ូហាន ចំនួន ១.២៩០នាក់ទៀត ដែលបង្កើនការសង្ស័យថា ទីក្រុងប៉េកាំងបានលាក់បាំងទំហំពិត នៃវិបត្តិជំងឺឆ្លងរាតត្បាតរបស់ខ្លួន នេះបើតាម…
ថ្ងៃនេះប្រទេសចិន បានបន្ថែមចំនួនអ្នកស្លាប់ដោយសារ កូវីដ១៩ នៅទីក្រុងវ៉ូហាន ចំនួន ១.២៩០នាក់ទៀត ដែលបង្កើនការសង្ស័យថា ទីក្រុងប៉េកាំងបានលាក់បាំងទំហំពិត នៃវិបត្តិជំងឺឆ្លងរាតត្បាតរបស់ខ្លួន នេះបើតាម dailymail របស់អង់គ្លេសបានចុះផ្សាយថ្ងៃទី១៧ មេសានេះ ។
ប្រទេសចិន បានធ្វើការកែសម្រួលចំនួនអ្នកស្លាប់ដោយវីរុសនេះ នៅទីក្រុងវ៉ូហាន នាំឲ្យចំនួនមនុស្សស្លាប់សរុបកើនដល់ ៤.៦៣២នាក់ នៅទូទាំងប្រទេសចិន ដោយផ្អែកលើទិន្នន័យជាតិផ្លូវការ ដែលបានចេញផ្សាយកាលពីថ្ងៃសុក្រនេះ ។
ការផ្លាស់ប្តូរនេះក៏ជំរុញឱ្យប្រទេសចិនរងសម្ពាធកាន់តែខ្លាំងឡើង ពីមហាអំណាចលោកខាងលិច ដែលដឹកនាំដោយសហរដ្ឋអាមេរិក ដែលធ្វើឱ្យមានការសង្ស័យអំពីតម្លាភាពរបស់ចិន និងកំពុងស៊ើបអង្កេតថា តើវីរុសនេះពិតជាមានប្រភពដើម នៅក្នុងមន្ទីរពិសោធន៍វ៉ូហានដែរឬទេ ?
ក្រុមមន្ត្រីចិន នៅទីស្នាក់ការកណ្តាល បង្ការនិងត្រួតពិនិត្យការរាតត្បាតរបស់ទីក្រុងវ៉ូហាន បានលើកឡើងពីមូលហេតុជាច្រើន សម្រាប់ករណីដែលខកខាននៅក្នុងការទទួលបានព័ត៌មាន រួមមានទាំងបុគ្គលិកពេទ្យទីក្រុង រាយការណ៍ខុស ឬខកខាន នាំឱ្យមាន «ការរាយការណ៍យឺត, ការភ្លេច ឬការរាយការណ៍មិនត្រឹមត្រូវ ជាដើម» អំឡុងវីរុសឆ្លងរាលដាលដំបូង ។ ក្រុមមន្ត្រីចិនក៏បានលើកឡើងពីកន្លែងធ្វើតេស្ត និងការព្យាបាលមិនគ្រប់គ្រាន់ ហើយបាននិយាយថា អ្នកជំងឺខ្លះបានស្លាប់នៅផ្ទះ ដូច្នេះហើយការស្លាប់របស់ពួកគេមិនត្រូវបានរាយការណ៍ត្រឹមត្រូវទេ ។
ដោយឡែកបើតាមការចេញផ្សាយដោយ ទីភ្នាក់ងារព័ត៌មានចិនស៊ីនហួរ នៅរសៀលថ្ងៃសុក្រ ទី១៧ ខែមេសា ឆ្នាំ២០២០ បានអោយដឹងថា ភាពខុសគ្នា នៃទិន្នន័យ គឺដោយសារតែហេតុផលដូចខាងក្រោម ៖
ទី១-ចំនួនអ្នកជំងឺ កើនឡើងនៅដំណាក់កាលដំបូង នៃជំងឺរាតត្បាតមានចំនួនច្រើនហួសប្រមាណ លើសធនធានវេជ្ជសាស្ត្រ និងសមត្ថភាពបុគ្កលិករបស់ស្ថាប័នវេជ្ជសាស្ត្រ ។ អ្នកជំងឺខ្លះ បានស្លាប់នៅផ្ទះ ដោយមិនបានទទួលការព្យាបាលនៅមន្ទីរពេទ្យ ។
ទី២-ក្នុងអំឡុងពេលនៃការខិតខំប្រឹងប្រែងព្យាបាល មន្ទីរពេទ្យកំពុងដំណើរការលើសពីសមត្ថភាពរបស់គ្រូពេទ្យ ហើយបុគ្គលិកពេទ្យ ត្រូវបានយកចិត្តទុកដាក់ឲ្យសម្រាកដើម្បីសន្សំកម្លាំងទុកព្យាបាលអ្នកជំងឺ ដែលធ្វើឱ្យមានការរាយការណ៍មិនត្រឹមត្រូវ និងខកខាន ។
ទី៣-ដោយសារការកើនឡើងនៃមន្ទីរពេទ្យបណ្ដោះអាសន្នយ៉ាងឆាប់រហ័ស សម្រាប់ការព្យាបាលអ្នកជំងឺ កូវីដ-១៩ មាននៅខេត្ដហ៊ូប៉ី មាននៅទីក្រុងវ៉ូហាន និងស្រុកទៀត ខណៈដែលអ្នកដែលគ្រប់គ្រង ទាក់ទងនឹងមន្ទីរពេទ្យបណ្តោះអាសន្នដែលជាស្ថាប័នវេជ្ជសាស្ត្រមួយចំនួន មិនបានភ្ជាប់ទៅនឹងបណ្តាញព័ត៌មានចំនួននៃការឆ្លងរាលដាល និងមិនបានរាយការណ៍ពីទិន្នន័យរបស់ពួកគេទាន់ពេលវេលា ។
និងទី៤-ព័ត៌មានដែលបានចុះបញ្ជីរបស់អ្នកជំងឺ ដែលបានទទួលមរណភាពខ្លះ មិនទាន់គ្រប់ជ្រុងជ្រោយ ហើយមានពាក្យដដែលៗ និងកំហុសក្នុងការរាយការណ៍ ៕
ចែករំលែកព័តមាននេះ