ខេត្តកំពង់ចាម ៖ ក្រោមការយកចិត្តទុកដាក់ពីសំណាក់អាជ្ញាធរខេត្ត និងក្រុមគ្រូពេទ្យបានជួយព្យាបាលអ្នកជំងឺកូវីដ១៩ ចំនួន១៦នាក់ ឱ្យបានជាសះស្បើយទាំងអ្នកសម្រាកនៅក្នុងមន្ទីរពេទ្យខេត្តកំពង់ចាម និងអ្នកត្រូវបញ្ជូនទៅព្យាបាលនៅរាជធានីភ្នំពេញ។ ទោះជាបែបនេះ អាជ្ញាធរនៅតែបង្កើនការប្រុងប្រយ័ត្នខ្ពស់ និងណែនាំដល់ប្រជាពលរដ្ឋឱ្យចេះអនាម័យដើម្បីចៀសវាងកុំឱ្យឆ្លងជំងឺដ៏សាហាវនេះ។
បើតាមលោក ជា ក្រូច អ្នកនាំពាក្យរដ្ឋបាលខេត្ត មានប្រសាសន៍ឲ្យដឹងនៅព្រឹកថ្ងៃទី១៧ ខែមេសា ឆ្នាំ២០២០នេះថា លោកអភិបាលនៃគណៈអភិបាលខេត្ត និងជាប្រធានគណៈកម្មការប្រយុទ្ធប្រឆាំងជំងឺកូវីដ១៩ និងលោកប្រធានមន្ទីរសុខាភិបាលខេត្ត រួមទាំងមន្ត្រីក្រោមឱវាទ ព្រមទាំងមន្ត្រីក្រសួងសុខាភិបាល បានយកចិត្តទុកដាក់ចាប់តាំងពីពេលដែលមានស្ត្រីចំណាស់វ័យ៦៥ឆ្នាំ ជនជាតិអង់គ្លេសម្នាក់ ត្រូវបានរកឃើញដំបូងនៅលើនាវាទេសចរណ៍ដែលបានមកចូលចតនៅច្រាំងទន្លេ ក្រុងកំពង់ចាម នាពេលកន្លងមក រួមនឹងបានរកឃើញជាបន្តបន្ទាប់ទៀត។
លោក ជា ក្រូច អ្នកនាំពាក្យរដ្ឋបាលខេត្ត បានប្រាប់បន្តថា ក្នុងវិធានការការពារទប់ស្កាត់មិនឲ្យឆ្លងជំងឺ ដោយនាំអ្នកទេសចរនៅលើនាវាមកស្នាក់នៅដាច់ដោយឡែកនៅសណ្ឋាគារមេគង្គមាត់ទន្លេក្រុងកំពង់ចាម ។ ជាមួយគ្នានោះ ក៏មានជនជាតិម៉ាឡេស៊ីនៅខាងស្រុកកងមាស រួមទាំងភ្ញៀវទេសចរនៅលើនាវាសរុបចំនួន១៦នាក់ ដែលមានផ្ទុកជំងឺកូវីដ១៩ ត្រូវបានបញ្ជូនមកព្យាបាលជាបន្តបន្ទាប់នៅបន្ទប់ដាច់ដោយឡែកក្នុងមន្ទីរពេទ្យខេត្ត។ ក្នុងនោះក៏មានជនបរទេសមួយចំនួនដោយមានការស្នើសុំពីមន្ត្រីស្ថានទូតត្រូវបញ្ជូនទៅព្យាបាលនៅរាជធានីភ្នំពេញបន្ត។
លោកបន្តថា ហើយនៅថ្ងៃចុងក្រោយ គឺថ្ងៃទី១៥ ខែមេសាកន្លងទៅ ជនជាតិម៉ាឡេស៊ី២នាក់ ដែលបានសម្រាកព្យាបាលនៅមន្ទីរពេទ្យខេត្តត្រូវបានជាសះស្បើយ និងបានអនុញ្ញាតឱ្យត្រឡប់ទៅកាន់ប្រទេសរបស់ខ្លួនវិញ ជាមួយនោះក៏មានលិខិតបញ្ជាក់សុខភាពពីមន្ទីរពេទ្យខេត្តផងដែរ។ និយាយរួមនៅក្នុងខេត្តកំពង់ចាម មិនមានអ្នកជំងឺឆ្លងកូវីដថ្មីទៀតនោះទេ។
អ្នកនាំពាក្យរដ្ឋបាលខេត្តកំពង់ចាម បានបញ្ជាក់ថា ទោះបីអ្នកជំងឺបានជាសះស្បើយទាំងអស់ក៏ពិតមែន តែលោកអភិបាលខេត្ត និងជាប្រធានគណៈកម្មការប្រយុទ្ធប្រឆាំងជំងឺកូវីដ១៩ នៅតែបន្តសហការជាមួយលោកប្រធានមន្ទីរសុខាភិបាលខេត្ត នៅតែបន្តយុទ្ធនាការចុះផ្សព្វផ្សាយអប់រំដល់ប្រជាពលរដ្ឋនៅតាមបណ្ដាស្រុកនានា ក្នុងខេត្តកំពង់ចាម ឲ្យបានផលផុសបន្ថែមទៀត។
ជាមួយនោះក៏មានពលករ និងពលការិនីត្រឡប់មកពីធ្វើការនៅប្រទេសថៃ ក៏ត្រូវបានដាក់ឲ្យរស់នៅដាច់ដោយឡែកពីសមាជិកក្រុមគ្រួសាររយៈពេល១៤ថ្ងៃផងដែរ ដើម្បីតាមដានសុខភាព ប្រសិនណាបើមានភាពមិនប្រក្រតីណាមួយកើតឡើងនោះ សូមរាយការណ៍ជាបន្ទាន់មកមន្ត្រីសុខាភិបាលនៅមូលដ្ឋាន។
គួរបញ្ជាក់ថា កន្លងទៅថ្មីៗនេះ អាជ្ញាធរខេត្តបានអនុវត្តតាមបញ្ជាលេខ០២ របស់ប្រមុខរាជរាជរដ្ឋាភិបាលកម្ពុជា និងបានបើកឲ្យចរាចរណ៍ឡើងវិញរវាងព្រំប្រទល់ខេត្ត និងខេត្ត ហើយយុទ្ធនាការនេះបានធ្វើឡើងយ៉ាងផុលផុសនៅក្នុងគោលបំណងទប់ស្កាត់ការរីករាលដាលនៃជំងឺកូវីដ១៩៕ (កែសម្រួលដោយ ៖ បុប្ផា)
ចែករំលែកព័តមាននេះ