ខេត្តព្រះសីហនុ ៖ នៅថ្ងៃរសៀលថ្ងៃទី១៧ ខែមេសា ឆ្នាំ២០២០នេះ កម្មករកម្មការីនីមួយចំនួន នៅតាមរោងចក្រតំបន់សេដ្ឋកិច្ចពិសេសបិតត្រាំង ដែលទើបត្រឡប់មកពីស្រុកកំណើតវិញ ត្រូវបានអាជ្ញាធរតម្រូវអោយធ្វើតាមវិធានការចត្តាឡីស័ក ដោយឃាត់ ទុកដាក់ដោយឡែក តាមដានសុខភាពរយៈពេល១៤ថ្ងៃ ។ នេះបើយោងតាមផេល ទូរទស្សន៍ជាតិកម្ពុជា ចេញផ្សាយនៅថ្ងៃទី១៧ ខែមេសា ឆ្នាំ២០២០ ។
កម្មការីនីមួយចំនួនបានស្នាក់នៅអគារដែលមន្ទីរការងារ និងអាជ្ញាធរខេត្ត រៀបចំក្នុងតំបន់សេដ្ឋកិច្ចពិសេសខេត្តព្រះសីហនុ មិនទាន់អនុញ្ញាតអោយចូលធ្វើការទេ ដើម្បីបង្ការ ពីការចម្លងមេរោគកូវីដ១៩ ។
សូមបញ្ជាក់ថា យោងតាមបទបញ្ជារបស់រាជរដ្ឋាភិបាលកម្ពុជា ក៏ដូចជា សេចក្ដីជូនដំណឹង របស់ក្រសួងការងារ និងបណ្ដុះបណ្ដាលវិជ្ជាជីវៈជូនដល់ម្ចាស់ ឬនាយករោងចក្រ សហគ្រាស គ្រឹះស្ថាន កម្មករ និយោជិត ម្ចាស់ផ្ទះជួលក្នុងដែនសមត្ថកិច្ចខេត្ត និងសាធារណជនទាំងអស់ឱ្យបានជ្រាបថា ស្ថានភាពជំងឺកូវីដ ១៩ ស្ថិតក្នុងដំណាក់កាលដែលយើងត្រូវតែមានការប្រុងប្រយ័ត្នខ្ពស់បំផុត ដើម្បីកុំឱ្យមានការចម្លងរាតត្បាត ចូលក្នុងសហគមន៍ ជាពិសេសការធ្វើដំណើរចល័តរបស់បុគ្គលពីកន្លែងមួយទៅកន្លែងមួយទៀត ដែលមិន បានគោរពតាមបទបញ្ជារបស់រាជរដ្ឋាភិបាល នាឱកាសបុណ្យចូលឆ្នាំប្រពៃណ៍ជាតិខ្មែរ ដែលមានការសម្រុកចេញទៅស្រុកកំណើតកន្លងមកនេះ ។
ដើម្បីបង្ការហានិភ័យនៃការចម្លងវីរុសកូវីដ១៩ ចំពោះកម្មករ- កម្មការិនី ដែលអវត្តមាន និងបានវិលត្រឡប់មកកន្លែងធ្វើការនៅតាមរោងចក្រ សហគ្រាស គ្រឹះស្ថានរបស់ពួកគាត់វិញ នោះ ត្រូវចាត់វិធានការលើបុគ្គលទាំងនោះ ដោយត្រូវតែដាក់ខ្លួនឱ្យដាច់ដោយឡែក (ចត្តាឡីស័ក) ក្នុងរយៈពេលចំនួន ១៤ ថ្ងៃជាចាំបាច់ ដោយមានការតាមដានគ្រប់គ្រាន់ពីស្ថាប័នពាក់ព័ន្ធ ៕
ចែករំលែកព័តមាននេះ