ខេត្តមណ្ឌលគិរី ៖ កម្មករនិយោជិតចំនួន១២នាក់ ក្នុងចំណោមជិត៤ពាន់នាក់ និងត្រូវដាក់នៅដាច់ដោយឡែកចំនួន១៤ថ្ងៃ នៅពេលពួកគេវិលត្រលប់មកពីស្រុកកំណើត ក្នុងអំឡុងបុណ្យចូលឆ្នាំថ្មីកន្លងទៅនេះ ដែលពួកគេជាអ្នកបម្រើការងារនៅតាមគ្រឹះស្ថាន និងក្រុមហ៊ុនផ្សេងៗគ្នាក្នុងខេត្តមណ្ឌលគិរី ។…
ខេត្តមណ្ឌលគិរី ៖ កម្មករនិយោជិតចំនួន១២នាក់ ក្នុងចំណោមជិត៤ពាន់នាក់ និងត្រូវដាក់នៅដាច់ដោយឡែកចំនួន១៤ថ្ងៃ នៅពេលពួកគេវិលត្រលប់មកពីស្រុកកំណើត ក្នុងអំឡុងបុណ្យចូលឆ្នាំថ្មីកន្លងទៅនេះ ដែលពួកគេជាអ្នកបម្រើការងារនៅតាមគ្រឹះស្ថាន និងក្រុមហ៊ុនផ្សេងៗគ្នាក្នុងខេត្តមណ្ឌលគិរី ។
យោងតាមការជូនដំណឹងរបស់លោក ណយ ច័ន្ទដារ៉ា ប្រធានមន្ទីរការងារខេត្តមណ្ឌលគិរី បានឲ្យដឹងថា ក្នុងនាមតំណាងរដ្ឋបាលខេត្តមណ្ឌលគិរី ទទួលបន្ទុកវិស័យការងារ មន្ទីជំនាញបានជូនដំណឹងដល់ម្ចាស់ឬនាយកសហគ្រាសគ្រឹះស្ថានកម្មករនិយោជិត និងសាធារណជនទាំងអស់ពីស្ថានភាពជំងឺកូវីដ១៩ ដែលកំពុងស្ថិតក្នុងដំណាក់កាលត្រូវតែមានការប្រុងប្រយ័ត្នខ្ពស់បំផុត ដើម្បីកុំឲ្យមានការចម្លងរាតត្បាតចូលក្នុងសហគមន៍ ជាពិសេសការធ្វើដំណើរចល័តរបស់បុគ្គលពីកន្លែងមួយទៅកន្លែងមួយទៀត ដែលមិនបានគោរពតាមបទបញ្ជារបស់រាជរដ្ឋាភិបាល នាឱកាសបុណ្យចូលឆ្នាំប្រពៃណីជាតិខ្មែរ រហូតមានការសម្រុកចេញទៅស្រុកកំណើតកន្លងមកនេះ ។
ដើម្បីបង្ការហានិភ័យនៃការចម្លងជំងឺកូវីដ១៩ ចំពោះកម្មករកម្មការិនីដែលអវត្តមានអំឡុងពេលខាងលើ ហើយវិលត្រឡប់មកកន្លែងធ្វើការនៅតាមសហគ្រាសគ្រឹះស្ថានរបស់ពួកគាត់វិញ ត្រូវចាត់វិធានការលើបុគ្គលទាំងនោះ ដោយត្រូវតែដាក់ខ្លួនដាច់ដោយឡែក (ចត្តាឡីស័ក) ក្នុងរយៈពេល១៤ថ្ងៃ ជាចាំបាច់ ដោយមានការតាមដានគ្រប់ស្ថាប័នពាក់ព័ន្ធ។
លោក ចាន់ដារ៉ា បន្ថែមថា ក្នុងចំណោមកម្មករ/កម្មការិនីជិត៤ពាន់នាក់ មិនគិតអ្នកធ្វើការក្រៅប្រព័ន្ធភាគច្រើនលើសលប់ពួកគេមិនបានចាកចេញពីកន្លែងការងារទៅស្រុកកំណើតក្នុងរយៈពេលបុណ្យចូលឆ្នាំថ្មីឡើយ។ ចំពោះកម្មករនិយោជិតដែលអវត្តមានក្នុងថ្ងៃហាមឃាត់ការធ្វើដំណើរទូទាំងប្រទេស ត្រូវស្ម័គ្រចិត្តដាក់ខ្លួនឲ្យដាច់ដោយឡែកក្នុងរយៈពេល១៤ថ្ងៃជាចាំបាច់ និងត្រូវចូលរួមសហការតាមការណែនាំរបស់ស្ថាប័នពាក់ព័ន្ធ។
សូមបញ្ជាក់ថា នៅទូទាំងខេត្តមណ្ឌលគិរី មានសហគ្រាស គ្រឹះស្ថាន សរុបចំនួន១៥៩កន្លែង មានកម្មករ/កម្មការិនីចំនួន៣ ៩៦១នាក់ ក្នុងនោះមានស្ត្រីចំនួន១ ៥៥៥នាក់ ហើយកម្មករ/កម្មការិនីបទេសមានចំនួន២៩០នាក់ ក្នុងស្រី៤៧នាក់ ដែលនេះជាតួរលេខរបស់មន្ទីរការងារខេត្តមណ្ឌលគិរី៕ (កែសម្រួលដោយ ៖ បុប្ផា)
ចែករំលែកព័តមាននេះ