ខេត្តមណ្ឌលគិរី ៖ ខុសពីបណ្តាឆ្នាំមុនៗដែលរដូវបុណ្យចូលឆ្នាំថ្មី មានភ្ញៀវទេសចរណ៍ជាតិ និងអន្តរជាតិរាប់ម៉ឺននាក់ ទៅលេងកម្សាន្តនៅតាមតំបន់រមណីយដ្ឋានជាច្រើនក្នុងខេត្តមណ្ឌលគិរី រហូតដល់ផ្ទះសំណាក់ សណ្ឋាគារ ក្នុងខេត្តមិនអាចឆ្លើយតបគ្រប់គ្រាន់ក្នុងការផ្គត់ផ្គង់តម្រូវការរបស់ភ្ញៀវដ៏សន្ធឹកសន្ធាប់ ប៉ុន្តែដោយសារបញ្ហាផ្ទុះនូវជំងឺកូវីដ១៩ ជាសកល ធ្វើឲ្យប៉ះពាល់ដល់វិស័យទេសចរណ៍នៅមណ្ឌលគិរី ស្ងប់ស្ងាត់ជាខ្លាំងស្ទើរគ្មានមនុស្សម្នាដើរតាមផ្លូវ។
ប្រធានមន្ទីរទេសចរណ៍ខេត្តមណ្ឌលគិរី លោក ងិន សុវិមាន បានឲ្យដឹងថា នៅដើមឆ្នាំ២០២០នេះ ចំនួនភ្ញៀវទេសចរចូលមកកម្សាន្តក្នុងខេត្ត មានការថយចុះជាបន្តបន្ទាប់ ព្រោះតែការរីករាលជំងឺឆ្លងកូវីដ១៩ ដែលធ្វើឲ្យប្រជាពលរដ្ឋ ភ្ញៀវទេសចរមានការខ្លាចរអារចំពោះការជួបជុំដើរកម្សាន្ត ។
លោក ងិន សុវិមាន បន្តថា ភ្ញៀវទេសចរចាប់ផ្ដើមថយចុះនៅអំឡុងខែមីនា ខែមេសា នេះ ព្រោះតែប្រជាពលរដ្ឋភាគច្រើនសម្រាកនៅផ្ទះ ឬកាត់បន្ថយការចេញក្រៅ ដើម្បីថែទាំសុខភាពបង្ការការឆ្លងជំងឺកូវីដ១៩ ។ ហើយនៅអំឡុងខែមករា ខែកុម្ភៈ អ្នកទេសចរនៅចូលមកលេងកម្សាន្តជាធម្មតា តួយ៉ាងដូចក្នុងឱកាសឆ្លងឆ្នាំសកល និងបុណ្យចូលឆ្នាំថ្មីប្រពៃណីចិនវៀតណាម គឺខេត្តមណ្ឌលគិរីនៅតែទទួលបានកំណើនភ្ញៀវទេសចរនៅឡើយ ។
លោកបន្តថា ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ មិនមានអ្នកទេសចរដើរលេងកម្សាន្តទេ ក្រៅពីប្រជាពលរដ្ឋក្នុងខេត្តដើរកម្សាន្តតិចតួច ព្រោះរាជរដ្ឋាភិបាលបានដាក់ចេញនូវវិធានការការពារអាយុជីវិតរបស់ពលរដ្ឋ គឺមិនឲ្យពលរដ្ឋធ្វើដំណើរឆ្លងរាជធានី-ខេត្ត និងមិនតម្រូវឲ្យមានការជួបជុំគ្នាច្រើននោះទេ ។
សម្រាប់ត្រីមាសទី១ឆ្នាំ២០២០ មានអ្នកទេសចរ៥ម៉ឺន៥ពាន់នាក់ ចូលមកកម្សាន្ត ក្នុងនោះមានទេសចរអន្តរជាតិជាង៣ពាន់នាក់ ដោយតួលេខនេះមានការថយចុះសរុប ៨,១៩% ទេសចរជាតិថយចុះ ៧,០៣% ទេសចរអន្តរជាតិថយចុះ ២៣,៧៨% ។
សូមបញ្ជាក់ដែរថា រយៈពេលប្រមាណ១០ឆ្នាំចុងក្រោយនេះ ខេត្តមណ្ឌលគិរីមានឈ្មោះល្បីល្បាញ និងមានអ្នកទេសចរ ជាតិ-អន្តរជាតិមកកម្សាន្តយ៉ាងច្រើនកុះកររៀងរាល់ឆ្នាំ ព្រមទាំងមានកំណើនភ្ញៀវមិនថមថយនោះទេ ហើយនេះជាលើកទី១ហើយ ដែលខេត្តមណ្ឌលគិរីថយចុះចំនួនអ្នកទេសចរ ព្រោះតែជំងឺកូវីដ១៩ ៕ (កែសម្រួលដោយ ៖ បុប្ផា)
ចែករំលែកព័តមាននេះ