រាជធានីភ្នំពេញ ៖ ក្នុងន័យកាត់បន្ថយគ្រោះថ្នាក់ចរាចរណ៍ដែលមានកំណើនយ៉ាងគំនុកនាឆ្នាំកន្លងមក រាជរដ្ឋាភិបាលនឹងចាប់ផ្ដើមអនុវត្ដន៍នូវវិធានការផាកពិន័យថ្មី ចំពោះអ្នកល្មើសច្បាប់ស្ដីពីចរាចរណ៍ផ្លូវគោកដោយបង្កើនប្រាក់ពិន័យទ្វេរដងចាប់ពី «៣ដង ទៅ ៥ដងបន្ថែមទៀត» ក្នុងករណីនគរបាលពិនិត្យឃើញការខ្វះខាត និងការប្រព្រឹត្ដជាក់ស្ដែង ហើយការអនុវត្តអនុក្រឹត្យលេខ ៣៩ ដែលលោកអ្នកនឹងប្រឈមការពិន័យធ្ងន់ធ្ងរនេះនឹងចាប់អនុវត្តពីថ្ងៃទី ១ ឧសភានេះតទៅ ។
យោងសេចក្តីជូនដំណឹងចុះថ្ងៃទី ១៧ ខែមេសានិងចុះហត្ថលេខាដោយ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និង ជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក បានក្រើនរំលឹកបងប្អូនដែលធ្វើចរាចរណ៍លើដងផ្លូវទូទាំងប្រទេសថា ចាប់ពីថ្ងៃទី១ ខែឧសភា ឆ្នាំ២០២០ តទៅ កងកម្លាំងនគរបាលចរាចរណ៍ផ្លូវគោក នឹងអនុវត្តការពិន័យអន្តរការណ៍ចំពោះអំពើល្មើសនឹងច្បាប់ស្តីពីការចរាចរណ៍ផ្លូវគោក តាមអនុក្រឹត្យលេខ៣៩ អនក្រ.បក ចុះថ្ងៃទី១៧ ខែមីនា ឆ្នាំ២០២០ ស្តីពីការកែសម្រួលអនុក្រឹត្យលេខ៤៤ អនក្រ.បក ចុះថ្ងៃទី២១ ខែមីនា ឆ្នាំ២០២០ ស្តីពីការពិន័យអន្តរការណ៍ចំពោះអំពើល្មើសនឹងច្បាប់ស្តីពីការចរាចរណ៍ផ្លូវគោក «ដែលបានតម្លើងកម្រិតទឹកប្រាក់ពិន័យក្នងចំនួនពី៣ទៅ៥ដង» ។
ក្នុងនោះផងដែរ សម្តេចក្រឡាហោម បានអំពាវនាវដល់ប្រជាពលរដ្ឋប្រើប្រាស់ផ្លូវ ត្រូវចូលរួមគោរពច្បាប់ចរាចរណ៍ផ្លូវគោក ដើម្បីការពារអាយុជីវិតខ្លួនឯង និង អ្នកដទៃ ប្រកបដោយឆន្ទៈភ្ញាក់រលឹកខ្ពស់ សំដៅលើកស្ទួយកិត្តិយស សេចក្តីថ្លៃថ្នូរ និង សណ្តាប់ធ្នាប់សង្គមនៅ កម្ពុជា ដើម្បីកាត់បន្ថយនូវគ្រោះថ្នាក់ចរាចរណ៍ទូទាំងប្រទេស ។
ជាក់ស្តែងបើសិនលោកអ្នកប្រើប្រាស់ទូរស័ព្ទពេលបើកបរដោយគ្មានឧបករណ៍ភ្ជាប់ទំនាក់ទំនង នោះនឹងត្រូវប្រឈមមុខការពិន័យជាទឹកប្រាក់ពី ៨ម៉ឺនរៀល រហូតដល់ ២ ២៥០ ០០០ រៀល ទៅតាមប្រភេទយានយន្ត ។
ក្នុងសេចក្តីជូនដំណឹងដដែលបានបញ្ជាក់ថាគណៈកម្មាធិការជាតិសុវត្ថិភាពចរាចរណ៍ផ្លូវគោក បានជម្រុញការរឹតបន្តឹងការអនុវត្តច្បាប់យ៉ាងសកម្មនៅទូទាំងប្រទេស បានធ្វើឲ្យគ្រោះថ្នាក់ចរាចរណ៍ថយចុះចំនួន ១៥០លើក ស្មើនឹង ១៤% ចំនួនអ្នកស្លាប់ថយចុះ ២០នាក់ស្មើ ៤% និងចំនួនអ្នករបួសថយចុះ ២៧៧ នាក់ស្មើ ១៧% បើប្រៀបធៀបត្រីមាសទី ១ ឆ្នាំ ២០១៩ ៕
ចែករំលែកព័តមាននេះ