ជាការគួរឲ្យគោរពមួយសម្រាប់ក្លិបបាល់ទាត់ Borussia Monchengladbach នៃលីគកំពូលអាល្លឺម៉ង់ Bundesliga បានអនុញ្ញាតឲ្យអ្នកគាំទ្រយករូបរបស់ពួកគេធ្វើពីក្រដាសកាតុង ដាក់តាមកន្លែងអង្គុយ ដើម្បីត្រៀមសម្រាប់ការប្រកួតបិទទ្វារ ។
ក្របខ័ណ្ឌ Bundesliga ត្រូវបានផ្អាកយ៉ាងហោចណាស់ដល់ចុងខែមេសា ក្នុងគោលបំណងដើម្បីចូលរួមការពារការរីករាលដាលនៃវីរុសកូវីដ១៩ ។
ទោះបីជាយ៉ាងណា ក្រុមមួយចំនួនរួមទាំងក្រុម Monchengladbach បានវិលត្រឡប់មកជំរុំហ្វឹកហាត់កាលពីសប្តាហ៍មុន ដោយចែកជាក្រុមតូចៗនៅឯកីឡដ្ឋាន Borussia Park ។ ក្នុងនោះគេសង្កេតឃើញថា នៅកន្លែងអង្គុយក្នុងកីឡដ្ឋានពោរពេញទៅដោយរូបអ្នកគាំទ្រធ្វើពីក្រដាសកាតុងតាមកន្លែងអង្គុយរបស់ពួកគេ ។
សម្ព័ន្ធបាល់ទាត់អាល្លឺម៉ង (DFL) គ្រោងនឹងរៀបចំសន្និសីទតាមរយៈវីដេអូ នៅថ្ងៃព្រហស្បតិ៍សប្តាហ៍ក្រោយជាមួយក្លិបចំនួន ៣៦ នៃលីគកំពូលទាំង ២ ដើម្បីពិភាក្សាថា តើការប្រកួតអាចចាប់ផ្តើមឡើងវិញនៅដើមខែ ឧសភា នេះបានដែរឬទេ ? បើទោះបីជាគ្មានអ្នកគាំទ្រទស្សនាផ្ទាល់ក៏ដោយ ។
ប្រសិនបើអាជ្ញាធរសុខភាពជាតិយល់ព្រម នោះមានន័យថាក្របខ័ណ្ឌ Bundesliga នឹងក្លាយជាលីគកំពូលអឺរ៉ុបដំបូងគេ ដែលនឹងចាប់ផ្តើមឡើងវិញនៅខែក្រោយ ៕ (ដកស្រង់ចេញពី CNA)
ចែករំលែកព័តមាននេះ