ប៉េកាំង ៖ ក្រសួងការបរទេសចិន បាននិយាយកាលពីថ្ងៃព្រហស្បតិ៍ ទី១៦ មេសានេះថា អង្គការសុខភាពពិភពលោកWHO បាននិយាយថា មិនមានភ័ស្តុតាងណាមួយ ដែលបញ្ជាក់ថា វីរុសដែលឆ្លងដល់មនុស្សជាង ២លាននាក់ នៅទូទាំងពិភពលោក ត្រូវបានបង្កើតឡើងនៅក្នុងមន្ទីរពិសោធន៍ទេ នេះបើតាមការចុះផ្សាយរបស់ រ៉យទ័រ ។
លោក Zhao Lijian អ្នកនាំពាក្យក្រសួងការបរទេសចិន ធ្វើការកត់សម្គាល់ឆ្លើយតបទៅនឹងសំណួរអំពីការចោទប្រកាន់ថា វីរុសកូវីដ១៩នេះ មានដើមកំណើត នៅក្នុងមន្ទីរពិសោធន៍មួយ នៅទីក្រុង Wuhan ភាគកណ្តាលប្រទេសចិន ដែលការរីករាលដាលដំបូង កើតមាននៅចុងឆ្នាំ ២០១៩ ។
យ៉ាងណា លោក Zhao បានប្រាប់ក្រុមអ្នកយកព័ត៌មាន អំឡុងសន្និសីទកាសែតប្រចាំថ្ងៃ នៅទីក្រុងប៉េកាំងថា មន្ត្រីអង្គការសុខភាពពិភពលោក បាននិយាយជាច្រើនដងហើយថា គ្មានភស្តុតាងដែលថា វីរុសថ្មីនេះ ត្រូវបានបង្កើតឡើង នៅក្នុងមន្ទីរពិសោធន៍ទេ ។
លោក Zhao មិនបានលើកឡើងចំៗ ចំពោះយោបល់របស់លោក Trump ទេ ។
បញ្ហាចម្រូងចម្រាស់ពីប្រភពនៃការលេចឡើងនៃវីរុសកូវីដ-១៩ ឆ្លងនេះនៅតែបន្ត ដោយសហរដ្ឋអាមេរិកធ្លាប់ចោទប្រកាន់ប្រទេសចិនថា ជាប្រភពនៃការបង្កើតវីរុសនេះ តួយ៉ាងប្រធានាធិបតីសហរដ្ឋអាមេរិកលោក ដូណាល់ ត្រាំ បាននិយាយកាលពីថ្ងៃពុធថា រដ្ឋាភិបាលអាមេរិកកំពុងព្យាយាមកំណត់ថា តើមេរោគឆ្លងនេះ ចេញពីមន្ទីរពិសោធន៍មួយ នៅទីក្រុង Wuhan ប្រទេសចិន ហើយរដ្ឋមន្ត្រីក្រសួងការបរទេស លោក Mike Pompeo ក៏បាននិយាយដែរថា ទីក្រុងប៉េកាំង “ចាំបាច់ត្រូវមានភាពស្អាតស្អំ” នូវអ្វីដែលពួកគេដឹង ៕
ចែករំលែកព័តមាននេះ