ខេត្តកោះកុង ៖ លោកវរសេនីយ៍ត្រី ម៉ម ភឿង អធិការរងស្រុកបុទុមសាគរ បានឱ្យកោះសន្តិភាពដឹងនាព្រឹកថ្ងៃទី១៦ មេសា នេះថា ទាក់ទិនករណីបុរសខ្មែរម្នាក់រត់ចេញពីដីថៃទាំងដៃជាប់ខ្នោះ ក្រោយពីបានទំនាក់ទំនងទៅខាងអាជ្ញាធរថៃខេត្តត្រាត ពួកគេបានឆ្លើយតបមកថា បុរសដែលរត់ពីដីថៃនេះ គឺមិនមានជាប់ពាក់ព័ន្ធបទល្មើសព្រហ្មទណ្ឌណាមួយនោះទេ ប៉ុន្តែគាត់មានបញ្ហារឿងគ្មានឯកសារស្នាក់នៅ និងលិខិតឆ្លងដែនត្រឹមត្រូវ ។
លោកអធិការរងបន្តថា បច្ចុប្បន្ន បុរសរូបនេះកំពុងសម្រាកនៅដាច់ដោយឡែករយៈ១៤ថ្ងៃសិន ដើម្បីតាមដានពីសុខភាពខ្លាចមានពាក់ព័ន្ធជាមួយជំងឺកូវីដ19 ។ ហើយខាងសមត្ថកិច្ចខេត្តកោះកុង ក៏កំពុងតែទាក់ទងទៅអាជ្ញាធរខេត្តព្រៃវែងដែរ ដើម្បីឱ្យមកទទួលគាត់ត្រឡប់ទៅភូមិកំណើតវិញ ។ សូមរំលឹកថា៖ បុរសខ្មែរម្នាក់រត់ចេញពីដីថៃទាំងដៃជាប់ខ្នោះ
នាព្រឹកថ្ងៃដដែលនេះ បុរសខ្មែរខាងលើបានឱ្យដឹងដែរថា រូបគាត់ឈ្មោះរស់ រឿន អាយុ៣៤ឆ្នាំ ជាជនជាតិខ្មែរ សញ្ជាតិខ្មែរ ដែលមានស្រុកកំណើតនៅភូមិតាំងគោក ឃុំតាំងគោក ស្រុកតាំងគោក ខេត្តកំពង់ធំ ។ ខ្លួនបានចាកចេញពីស្រុកកំណើត ចូលទៅកាន់ទឹកដីថៃ តាមច្រកឡែមខេត្តបាត់ដំបង ក្នុងគោលបំណងចូលទៅធ្វើការនេសាទត្រី លើដែនសមុទ្រថៃ ក្នុងខេត្តត្រាត ដែលមានព្រំប្រទល់ជាប់ជាមួយនឹងខេត្តកោះកុង ។ គាត់បន្តថា នៅក្នុងអំឡុងពេលដែលខ្លួនបានចុះទៅធ្វើការនេសាទត្រីរយៈពេល១ខែ ខ្លួនក៏មានបញ្ហាការឈ្លោះទាស់ទែងគ្នារវាងកម្មករខ្មែរនិងកម្មករខ្មែរដូចគ្នានៅលើទូកនេសាទ ហើយក៏ត្រូវបានថៅកែទូកនេសាទ បណ្ដេញចេញឱ្យឡើងមកលើគោកវិញ ។
ដោយខ្លួនដើរគ្មានគោលដៅ ដោយពុំមានលិខិតឆ្លងដែនយ៉ាងត្រឹមត្រូវតាមច្បាប់អន្តោប្រវេសន៍ទៀតនោះទេ ។ នៅក្នុងការដំណើរតាមដងផ្លូវជាតិក្នុងទឹកដីថៃ ត្រូវបានតម្រួតថៃចាប់ឃាត់សួរនាំ ដើម្បីរកលិខិតឆ្លងដែន តែគាត់ប្រាប់សមត្ថកិច្ចថៃថា ខ្លួនចូលមកទឹកដីថ្ងៃនេះ ដោយមានថៅកែថៃជាអ្នកយកមកធ្វើការនេសាទត្រីនៅខេត្តត្រាត ដោយពុំមានលិខិតស្នាមអ្វីទាំងអស់ ហើយក៏ត្រូវបានតម្រួតថៃ ធ្វើការចាប់ឃាត់ខ្លួនដាក់ខ្នោះដៃ ដើម្បីយកទៅសាងសំណុំរឿងនៅតុលាការបញ្ជូនទៅកាត់ទោស ។
បុរសឈ្មោះ រស់ រឿន បានបន្តទៀតថា នៅក្នុងពេលដែលតម្រួតថៃដឹកខ្លួនតាមរថយន្តមកដល់ពាក់កណ្ដាលផ្លូវ ហើយតម្រួតថៃក៏ចុះបត់ជើងតូច ដោយឃើញឱកាសល្អ ខ្លួនគាត់ចុះរត់ពីលើរថយន្តកាត់ព្រៃ កាត់ដុប ដើម្បីអោយរួចខ្លួនពីការចាប់ដាក់ពន្ធនាគារនៅក្នុងទឹកដីថៃ ។ នៅក្នុងការរត់គេចខ្លួននោះ គាត់ក៏បានបញ្ជាក់ឱ្យដឹងជាចុងក្រោយថា ខ្លួនបានហែលទឹកសមុទ្រចំនួន៧ថ្ងៃ ដោយមានបាដុងទឹកមួយគ្រាន់នឹងបណ្ដែតខ្លួន ហើយក៏គ្មានអាហារសម្រាប់ទទួលទាននៅក្នុងពេលហែលទឹកនោះដែរ ។ លុះហែលទឹកមកដល់ចំណុចកោះឆាង ក្នុងទឹកដីខេត្តត្រាត ព្រំដែនកម្ពុជា-ថៃ ខ្លួនក៏បានឡើងលើគោកឆ្លងចូលមកបីកម្ពុជា តាម តាមព្រៃរត់មកឲ្យអាជ្ញាធរខណ្ឌស្រុកមណ្ឌលសីមា និងសមត្ថកិច្ចនគរបាលស្រុកមណ្ឌលសីមាជួយតែម្តង ។
លោកប្រាក់វិចិត្រ អភិបាលស្រុកមណ្ឌលសីមា ក៏បានឱ្យអ្នកយកព័ត៌មានយើងដឹងផងដែរថា ក្រោយពីបានទទួលការស្នើសុំឲ្យជួយពីសំណាក់ពលករ ដែលរត់ឆ្លងដែនពីទឹកដីថៃចូលមកកម្ពុជាវិញនោះ លោកក៏បានសហការជាមួយនឹងកងកម្លាំងសមត្ថកិច្ចនគរបាលស្រុកមណ្ឌលសីមា ហើយក៏បាននាំខ្លួនបុរសរងគ្រោះទៅរក្សាទុកនៅស្នងការដ្ឋាននគរបាលខេត្តកោះកុង ដើម្បីរងចាំការពិនិត្យនិងសាកសួររឿងជាបន្តទៀត។ ដោយ៖ សំបូរ
ចែករំលែកព័តមាននេះ