ខេត្តប៉ៃលិន ៖ ប្រជាពលរដ្ឋនៅក្រុងប៉ៃលិនចំនួន៧២គ្រួសារប្រឈមមុខនឹងបញ្ហាជីវភាពខ្វះខាត ព្រោះតែការផ្ទុះឡើងនៃជំងឺកូវីដ១៩ ធ្វើឱ្យគ្រួសាររបស់គាត់រងផលប៉ះពាល់ដល់សេដ្ឋកិច្ចគ្រួសារ។ ហើយក្នុងឱកាសនោះដែរ លោកប្រធានគណបក្សប្រជាជនកម្ពុជាខេត្ត ក៏បានចុះសួរសុខទុក្ខ និងផ្សព្វផ្សាយអំពីវិធានការបង្ការ និងទប់ស្កាត់ការរីករាលដាលជំងឺកូវីដ១៩ នៅតាមផ្ទះ និងឧបត្ថម្ភស្បៀងដល់ប្រជាពលរដ្ឋមានជីវភាពខ្វះខាតផងដែរ កាលពីថ្ងៃទី១៥ ខែមេសា ឆ្នាំ២០២០ ស្ថិតក្នុងសង្កាត់អូរតាវ៉ៅ និងសង្កាត់ប៉ៃលិន ក្រុងប៉ៃលិន។
ការចុះជួបសំណេះសំណាលសួរសុខទុក្ខ និងផ្សព្វផ្សាយអំពីវិធានការបង្ការ និងទប់ស្កាត់ការរីករាលដាលនៃជំងឺ១៩ ដល់ប្រជាពលរដ្ឋជួបការខ្វះខាតទាំង៧២គ្រួសារខាងលើនេះ គឺដឹកដោយលោក ផាន់ ចាន់ធុល ប្រធានគណបក្សប្រជាជនកម្ពុជាខេត្តប៉ៃលិន អមដំណើរដោយថ្នាក់ដឹកនាំគណបក្សគ្រប់ជាន់ថ្នាក់ ព្រមទាំងក្រុមការងារ ។
បើតាមលោក ផាន់ ចាន់ធុល ប្រធានគណបក្សប្រជាជនកម្ពុជាខេត្តប៉ៃលិន មានប្រសាសន៍ ថា ដោយសារការព្រួយបារម្ភជាខ្លាំងចំពោះជំងឺកូវីដ១៩ ធ្វើឱ្យក្រុមហ៊ុន សហគ្រាស និងកន្លែងការងារ មួយចំនួនត្រូវបានបិទទ្វារ បណ្តាលឱ្យប្រជាពលរដ្ឋខ្លះអត់ការងារធ្វើ ហើយអ្នកខ្លះទៀតជាពលករនៅក្រៅប្រទេស ត្រូវបង្ខំចិត្តត្រឡប់មកស្រុកកំណើតវិញ ។ ដូច្នេះបញ្ហនេះធ្វើឱ្យប៉ះពាល់ដល់សេដ្ឋកិច្ចគ្រួសាររបស់ពួកគាត់ ទើបក្រុមការងារគណបក្សប្រជាជនកម្ពុជាខេត្ត ហើយបាននាំយកអំណោយស្បៀងមកឧបត្ថម្ភដល់ពួកគាត់នៅតាមផ្ទះ ព្រោះមិនអាចធ្វើការប្រមូលផ្តុំមនុស្សច្រើនបាន ។
លោកបន្តថា ទោះបីជាអំណោយស្បៀងទាំងនេះមិនបានបំពេញតាមតំរូវការរបស់បងប្អូនពិត មែន តែក៏អាចដោះស្រាយបានមួយកំរិតដែរ ។ ដូច្នេះ សូមលោកតា លោកយាយ អ៊ុំពូមីង និងបងប្អូនទាំងអស់ ត្រូវខិតខំប្រឹងប្រែងប្រកបមុខរបរចិញ្ចិមជីវិត និងបង្កបង្កើតផល ដាំដំណាំឱ្យបានកាន់ច្រើន ដើម្បីបង្កើនជីវភាពធូរធាជាងមុន ជាពិសេសត្រូវរស់នៅស្អាត ហូបស្អាត មានអនាម័យ ដោយត្រូវពាក់ម៉ាសនៅកន្លែងសាធារណៈ និងលាងសម្អាតដៃឱ្យបានជាប្រចាំក្នុងន័យចូលរួមបង្ការ និងទប់ស្កាត់ការរីករាលដាលនៃជំងឺកូវីដ១៩ ។
លោកផាន់ ចាន់ធុល ក៏បានមានប្រសាសន៍ក្រើនរំលឹកដល់អាជ្ញាធរមូលដ្ឋានគ្រប់ជាន់ថ្នាក់ និងក្រុមគ្រូពេទ្យជំនាញ ត្រូវបន្តធ្វើការផ្សព្វផ្សាយអប់រំ នៅតាមមូលដ្ឋាន ជាពិសេសនៅតាមទី ប្រជុំជន និងទីសាធារណៈឲ្យបានផុលផុសអំពីវិធានការបង្ការ និងទប់ស្កាត់ការរីករាលដាលនៃជំងឺកូវីដ១៩ផងដែរ។
សូមបញ្ជាក់ថា ប្រជាពលរដ្ឋមានជីវភាពខ្វះខាតក្នុងក្រុងប៉ៃលិន ដែលបានទទួលអំណោយស្បៀងពីក្រុមការងារ គណបក្ស ប្រជាជនកម្ពុជាខេត្តប៉ៃលិន មានចំនួន៧២គ្រួសារ ក្នុងនោះសង្កាត់អូរតាវ៉ៅ៣៣គ្រួសារ និងសង្កាត់ប៉ៃលិន ៣៩គ្រួសារ ដោយក្នុង១គ្រួសារ ទទួលបានអង្ករ២៥គីឡូក្រាម ត្រីខ១យួរ ទឹកត្រី១យួរ និងទឹកអាល់កុលលាងសម្អាតដៃ១ដបផងដែរ ៕ (កែ សម្រួលដោយ ៖ បុប្ផា)
ចែករំលែកព័តមាននេះ