រាជធានីភ្នំពេញ ៖ សូមបងប្អូនប្រជាពលរដ្ឋ បើកបរមានការប្រុងប្រយ័ត្នខ្ពស់បំផុត ទាំងសុវត្ថិភាពចរាចរណ៍ និងសុវត្ថិភាពសុខភាពផ្ទាល់ខ្លួន ដោយសារថ្ងៃនេះអាចមានអ្នកធ្វើដំណើរច្រើនតាមដងផ្លូវ ដូច្នេះសូមបងប្អូនប្រជាពលរដ្ឋ ជាពិសេសអ្នកបើករថយន្តតាក់ស៊ី និងរថយន្តដឹកទំនិញធំៗ សូមបើកបរដោយមានការប្រុងប្រយ័ត្នខ្ពស់ និងគោរពច្បាប់ចរាចរណ៍ ដើម្បីសុវត្ថិភាពទាំងអស់គ្នា ។ នេះបើយោងតាមផេក សម្តេចតេជោ ចេញផ្សាយនៅថ្ងៃទី១៦ ខែមេសា ឆ្នាំ២០២០ ។
ទន្ទឹមនឹងនេះដែរ សូមបងប្អូនប្រជាពលដ្ឋ និងកូនក្មួយកម្មករកម្មការនីយកចិត្តទុកដាក់ចេះការពារសុខភាពផ្ទាល់ខ្លួន កុំអោយឆ្លងរោគកូវីដ-១៩ ដោយពាក់ម៉ាស និងឧស្សាហ៍ដុសលាងសម្អាតដៃជាមួយទឹកអាល់កុល ឬជែលកម្ចាត់មេរោគ ជាពិសេសក្នុងពេលជិះរថយន្តជាមួយអ្នកធ្វើដំណើរច្រើននាក់ជុំគ្នា ក្នុងរថយន្តឈ្នួលតែមួយ ។
សម្តេចតេជោ បានបន្តថា សូមអរគុណសារជាថ្មីដល់បងប្អូនជនរួមជាតិ ដែលបានយោគយល់ដល់កាដាក់បម្រាមមិនអោយធ្វើដំណើរឆ្លងកាត់ខេត្តបណ្តោះអាសន្នរយៈពេលខ្លីកន្លងទៅនេះ ដើម្បីបង្ការទប់ស្កាត់ការឆ្លងរាលដាលជំងឺកូវីដ -១៩ នៅក្នុងប្រទេសជាតិយើង ។
ក្នុងឱកាសចូលឆ្នាំថ្មីប្រពៃណីជាតិ២០២០នេះ សូមជូនពរបងប្អូនជនរួមជាតិទាំងក្នុង និងក្រៅប្រទេស ព្រមទាំងមន្ត្រីរាជការ និងកងកម្លាំងប្រដាប់អាវុធដែលកំពុងឈរជើងនៅតាមព្រំដែនមានសុខភាពល្អ ព្រមទាំងពរ៥ប្រការគឺអាយុ វណ្ណៈ សុខៈ ពលៈ និងបដិភាណៈកុំបីឃ្លៀងឃ្លាតឡើយ។
បញ្ជាក់ ៖ នៅព្រឹកនេះ រាជរដ្ឋាភិបាលកម្ពុជា សម្រេចបញ្ចប់សុពលភាព ស្តីពីការដាក់កំហិត លើការធ្វើដំណើរក្នុងប្រទេស ក្នុងគោលដៅបង្ការ និងទប់ស្កាត់ការរាតត្បាត នៃជំងឺកូវីដ-១៩ នៅត្រឹមម៉ោង០៦និង០០នាទីព្រឹក ថ្ងៃទី១៦ ខែមេសា ឆ្នាំ២០២០នេះ ជាកំហិត ដើម្បីសម្រួលការធ្វើដំណើររបស់ពលរដ្ឋ ចៀសវាងការកកស្ទះដោយសារការរង់ចាំ នូវការបើកចរាចរណ៍ឆ្លងកាត់ពីខេត្តមួយទៅខេត្តមួយឡើងវិញ ៕
ចែករំលែកព័តមាននេះ