រាជធានីភ្នំពេញ ៖ ជាថ្មីម្តងទៀតក្រសួងសុខាភិបាលកម្ពុជាបានណែនាំប្រជាពលរដ្ឋឲ្យមានការប្រុងប្រយ័ត្នខ្ពស់ក្នុងការទិញនូវផលិតផលជែលលាងដៃ ទឹកអាល់កុល និង Spray សម្លាប់មេរោគលក់តាមអនឡាញមួយចំនួន ។
ជាក់ស្តែងកាលពីថ្ងៃទី ១៤ ខែមេសា ក្រសួងសុខាភិបាលបានចេញប្រកាសព័ត៌មានមួយទៀតអំពីការផ្សព្វផ្សាយលក់ Spray សម្លាប់មេរោគ ឈ្មោះ 75% ចំណុះ 100 ml ដែលគ្មានលេខប្រវេទន៍និងគ្មានច្បាប់ពីក្រសួងសុខាភិបាល។
ប្រភពដដែលបានបញ្ជាក់ថាមានគណនីឈ្មោះ Synareth Muth និង Seth Nen កំពុង ផ្សព្វផ្សាយនូវផលិតផលខាងលើនេះ ។ ដូច្នេះក្រសួងបានបញ្ជាក់ថា «ក្រសួងសុខាភិបាល សូមជូនព័ត៌មានដល់បងប្អូនប្រជាពលរដ្ឋទាំងអស់មិនត្រូវប្រើប្រាស់ផលិតផលឱសថ ឧបករណ៍បរិក្ខារពេទ្យ សារធាតុសម្លាប់មេរោគ ឬផលិតផលគ្រឿងសម្អាង ដែលបានផ្សព្វផ្សាយលក់តាម គណនីឈ្មោះ Synareth Muth និង Seth Nen និងតាមប្រភពផ្សេងៗទៀតដែលគ្មានលេខទិដ្ឋាការ ឬបញ្ជិការ ឬប្រវេទន៍ ពីក្រសួងសុខាភិបាលឡើយ ពីព្រោះផលិតផលទាំងនោះមិនអាចធានាបាននូវគុណភាពស្របតាមបទដ្ឋានកំណត់ឡើយ» ។
បន្ថែមពីលើនេះក្រសួងបានព្រមានថានឹងចាត់វិធានការតឹងរ៉ឹងទៅតាមផ្លូវច្បាប់ជាធរមានចំពោះម្ចាស់គណនីឈ្មោះ Synareth Muth និង Seth Nen និងជនដទៃទៀតដែលនៅតែបន្តលក់ផលិតផលឱសថ ឧបករណ៍បរិក្ខារពេទ្យ សារធាតុសម្លាប់មេរោគ ឬផលិតផលគ្រឿងសម្អាង ដែលគ្មានលេខទិដ្ឋាការ ឬបញ្ជិការ ឬប្រវេទន៍ និងគ្មានច្បាប់ពីក្រសួងសុខាភិបាល» ៕
ចែករំលែកព័តមាននេះ