ប្រទេសអ៊ីតាលី ៖ ចំនួនអ្នកបាត់បង់ជីវិតដោយសារការរីករាលដាលនៃជំអឺកូវីដ១៩ នៅប្រទេសអ៊ីតាលី បានកើនឡើងចំនួន ៦០២នាក់ កាលពីថ្ងៃអង្គារ ដែលនៅថ្ងៃមុននេះមានត្រឹមតែ ៥៦៦ករណីប៉ុណ្ណោះ។ ប៉ុន្តែការឆ្លងថ្មីបានថយចុះពី ៣១៥៣ មកត្រឹម ២៩៧២ ដែលជាចំនួនប្រចាំថ្ងៃទាបបំផុតចាប់តាំងពីថ្ងៃទី១៣ ខែមីនា។
ទីភ្នាក់ងារការពារជនស៊ីវិលបាននិយាយថា ចំនួនអ្នកបាត់បង់ជីវិតសរុបចាប់តាំងពីការផ្ទុះឡើងបានកើតឡើងនៅថ្ងៃទី២១ ខែកុម្ភៈ បានកើនឡើងដល់ ២១០៦៧នាក់ ដែលជាចំនួនខ្ពស់បំផុតទី២ នៅលើពិភពលោកបន្ទាប់ពីសហរដ្ឋអាមេរិក។
ចំនួនករណីដែលបានបញ្ជាក់ជាផ្លូវការបានកើនឡើងដល់ ១៦២៤៨៨ ដែលជាចំនួនសរុបខ្ពស់បំផុតលំដាប់ទី៣ នៅពីក្រោយសហរដ្ឋអាមេរិក និងអេស្ប៉ាញ។ សេដ្ឋកិច្ចធំបំផុតទី ៣ នៅតំបន់ចាយប្រាក់អឺរ៉ូ កំពុងស្ថិតក្នុងស្ថានភាពបន្ទាប់ពីការបិទទ្វារទូទាំងប្រទេសអស់រយៈពេលជាងមួយខែ ដើម្បីព្យាយាមទប់ស្កាត់ការឆ្លងរាលដាលនេះ ដោយអាជីវកម្មភាគច្រើនបានបិទទ្វារ លើកលែងតែអាជីវកម្មដែលត្រូវបានគេចាត់ទុកថា ចាំបាច់សម្រាប់ចង្វាក់ផ្គត់ផ្គង់របស់ប្រទេស។
ប្រទេសអ៊ីតាលី ដែលជាប្រទេសមានសេដ្ឋកិច្ចយឺតជាងគេបំផុតនៅតំបន់ចាយប្រាក់អឺរ៉ូ ចាប់តាំងពីការចាប់ផ្តើមនៃសហភាពរូបិយវត្ថុ បាននិងកំពុងស្ថិតនៅលើគែមនៃវិបត្តិសេដ្ឋកិច្ច មុនពេលដែលជំងឺកូវីដ១៩ មកវាយប្រហារ ដោយផលិតផលក្នុងស្រុកសរុបបានធ្លាក់ចុះ ០.៣% នៅក្នុងត្រីមាសចុងក្រោយនៃឆ្នាំ ២០១៩ ពីបីខែមុន៕ ដកស្រង់ចេញពីវេបសាយ ៖ thestar (កែសម្រួលដោយ ៖ បុប្ផា)
ចែករំលែកព័តមាននេះ