សហរដ្ឋអាមេរិក ៖ ប្រធានាធិបតីសហរដ្ឋអាមេរិក លោក ដូណាល់ ត្រាំ មាននិយាយថា សហរដ្ឋអាមេរិកនឹងបញ្ឈប់ការផ្តល់មូលនិធិដល់អង្គការសុខភាពពិភពលោក (WHO) ហើយលោកបានណែនាំរដ្ឋបាលរបស់លោករួចហើយ…
សហរដ្ឋអាមេរិក ៖ ប្រធានាធិបតីសហរដ្ឋអាមេរិក លោក ដូណាល់ ត្រាំ មាននិយាយថា សហរដ្ឋអាមេរិកនឹងបញ្ឈប់ការផ្តល់មូលនិធិដល់អង្គការសុខភាពពិភពលោក (WHO) ហើយលោកបានណែនាំរដ្ឋបាលរបស់លោករួចហើយ ។ នេះបើយោងតាមការចុះផ្សាយរបស់ BBC នៅថ្ងៃទី ១៥ មេសា។
លោកត្រាំ បាននិយាយថាអង្គការសុខភាពពិភពលោក «បានបរាជ័យក្នុងកាតព្វកិច្ចជាមូលដ្ឋាន» ក្នុងការឆ្លើយតបរបស់ខ្លួនចំពោះការផ្ទុះឡើងនៃវីរុសកូរ៉ូណា ឬហៅថា កូវីដ -១៩ នេះ។ លោកបានចោទប្រកាន់ស្ថាប័នអង្គការសហប្រជាជាតិ ពីបទ «ធ្វើមិនបានត្រឹមត្រូវនិងបិទបាំងការរីករាលដាលនៃមេរោគ» បន្ទាប់ពីវាបានលេចចេញនៅក្នុងប្រទេសចិនហើយបាននិយាយថាស្ថាប័នមួយនេះត្រូវតែទទួលខុសត្រូវ។
នេះមិនមែនជាលើកទី១ទេ ដែលប្រធានាធិបតីដូណាល់ ត្រាំបានវាយប្រហារទៅលើ WHO ។ កាលពីគ្រាមុន លោកត្រាំ ក៏បានចោទប្រកាន់ WHOថាមានភាពលំអៀងទៅរកចិន ពាក់ព័ន្ធវីរុសកូវីដ -១៩ នេះ ។
យ៉ាងណាមិញ លោកប្រធានាធិបតីអាមេរិកខ្លួនឯងក៏ត្រូវបានរងការរិះគន់យ៉ាងខ្លាំងនៅទឹកដីរបស់គាត់ពាក់ព័ន្ធនឹងការឆ្លើយតបចំពោះការផ្ទុះឡើងនៃជំងឺឆ្លងមួយនេះ ។
លោក Trump បានប្រាប់សន្និសីទសារព័ត៌មាននៅឯសេតវិមានថា « ខ្ញុំកំពុងដឹកនាំរដ្ឋបាលរបស់ខ្ញុំ ឲ្យបញ្ឈប់មូលនិធិ ខណៈពេលដែលការពិនិត្យឡើងវិញត្រូវបានធ្វើឡើងដើម្បីវាយតម្លៃតួនាទីរបស់អង្គការសុខភាពពិភពលោកក្នុងការគ្រប់គ្រងមិនត្រឹមត្រូវយ៉ាងធ្ងន់ធ្ងរនិងការលាក់បាំងការរីករាលដាលនៃវីរុសនេះ» ។
លោកបានបន្ថែមថា «អង្គការសុខភាពពិភពលោកបានបរាជ័យក្នុងកាតព្វកិច្ចមូលដ្ឋានរបស់ខ្លួនហើយស្ថាប័ននេះត្រូវតែទទួលខុសត្រូវ» ។ ប្រតិកម្មទៅនឹងការកត់សម្គាល់របស់លោកត្រាំ អគ្គលេខាធិការអង្គការសហប្រជាជាតិលោក António Guterres បាននិយាយថាពេលនេះមិនមែនជាពេលវេលាដែលត្រូវកាត់បន្ថយធនធានសម្រាប់អង្គការសុខភាពពិភពលោកទេ។
សហរដ្ឋអាមេរិកគឺជាអ្នកផ្តល់ជំនួយហិរញ្ញវត្ថុតែមួយធំបំផុតរបស់អង្គការសុខភាពពិភពលោក ដោយផ្តល់ថវិកាចំនួន ៤០០ លានដុល្លារអាមេរិកកាលពីឆ្នាំមុនពោលគឺក្រោម ១៥% នៃថវិកាសរុបរបស់ខ្លួន។
សហរដ្ឋអាមេរិកសហរដ្ឋអាមេរិកក្លាយជាប្រទេសដែលមានអ្នកស្លាប់និងអ្នកកើតជំងឺកូវីដ១៩ច្រើនជាងគេលើពិភពលោក ដែលក្នុងនោះ មនុស្សយ៉ាងហោចណាស់ ៦១២៣៨០ ត្រូវបានរកឃើញថាឆ្លងវីរុសកូវីដ ១៩ ដែលក្នុងនោះមានអ្នកស្លាប់ ២៥ ៩៤៩ នាក់ និងព្យាបាលជាសះស្បើយមានចំនួន ៤៨ ០៣៦ នាក់ គិតត្រឹមថ្ងៃទី ១៥ មេសា នេះ ៕
ចែករំលែកព័តមាននេះ