ក្នុងកំឡុងពេលដែលពិភពលោកកំពុងតែព្យាយាមទប់ទល់នឹងវីរុសកូវីដ ១៩ នេះ ការដកខ្លួនចេញពីព័ត៌មានអាក្រក់ៗ និងចូលដំណេកឲ្យបានស្កប់ស្កល់គឺមិនងាយដូចមុនទៀតឡើយ ។ ប៉ុន្តែយោងទៅតាមលោកមហាសេដ្ឋី ប៊ីល ហ្គេតស៍ (Bill…
ក្នុងកំឡុងពេលដែលពិភពលោកកំពុងតែព្យាយាមទប់ទល់នឹងវីរុសកូវីដ ១៩ នេះ ការដកខ្លួនចេញពីព័ត៌មានអាក្រក់ៗ និងចូលដំណេកឲ្យបានស្កប់ស្កល់គឺមិនងាយដូចមុនទៀតឡើយ ។ ប៉ុន្តែយោងទៅតាមលោកមហាសេដ្ឋី ប៊ីល ហ្គេតស៍ (Bill Gates) និងការស្រាវជ្រាវជាច្រើនបានឲ្យដឹងថា មានវិធីងាយមួយដែលអាចជួយឲ្យអ្នកចូលដំណេកបានស្កប់ស្កល់ជាងមុនហើយនោះ គឺការអានសៀវភៅ ។
ក្រៅពីជួយដល់ការចូលដំណែកហើយ ការស្រាវជ្រាវបានប្រទះឃើញទៀតថា ការអានសៀវភៅមុនពេលចូលដំណេកអាចជួយឲ្យមនុស្សកាត់បន្ថយអារម្មណ៍ស្ត្រេស និងជួយឲ្យពួកគេរកលុយបានកាន់តែច្រើនទៀតផង ។
លោក Gates ធ្លាប់បាននិយាយប្រាប់សារព័ត៌មាន The Seattle Times កាលពីឆ្នាំ ១៩៩០ ថា «ខ្ញុំអានសៀវភៅ ១ម៉ោងស្ទើរតែរៀងរាល់យប់ ។ វាជាផ្នែកមួយនៃការចូលដំណេក» ។
ការធ្វើដូច្នេះជួយឲ្យអ្នកពង្រីកការយល់ដឹងរបស់ខ្លួនឲ្យកាន់តែទូលំទូលាយ តែការស្រាវជ្រាវបានឲ្យដឹងទៀតថាទម្លាប់នេះមានផ្តូវនូវអត្ថប្រយោជន៍ជាច្រើនទៀត ។
អត្ថប្រយោជន៍ដំបូង គឺការចូលដំណេកបានស្កប់ស្កល់ ។ ការស្ទង់មតិរបស់ Sleep Junkie បានប្រទះឃើញថា មនុស្សដែលអានសៀវភៅមុនពេកចូលដំណេកអាចចូលដំណេកបានជាមធ្យម ១ម៉ោង និង ៣៧នាទីច្រើនជាងអ្នកដែលមិនបានអាន ។
ជាមួយគ្នានេះដែរ មានការស្រាវជ្រាវមួយចំនួនដែលប្រទះឃើញទំនាក់ទំនងរវាងទម្លាប់អានសៀវភៅ និងប្រាក់ចំណូលរបស់មនុស្សដោយអ្នកអានសៀវភៅមុនពេលចូលដំណេករកប្រាក់ចំណូលជាមធ្យមបាន ៣៧០៥ដុល្លារច្រើនជាងមនុស្សទូទៅក្នុងមួយឆ្នាំ ។
ការស្រាវជ្រាវមួយរបស់សកលាវិទ្យាល័យ University of Sussex នៅចក្រភពអង់គ្លេសរកឃើញថាការអានសៀវភៅមុនពេលចូលដំណេកអាចកាត់បន្ថយអារម្មណ៍ស្ត្រេសដល់ទៅ ៦៨% ។ អត្រានេះខ្ពស់ជាងសកម្មភាពដទៃដូចជាការដើរ និងការស្តាប់ចម្រៀងទៅទៀត ។
ការស្រាវជ្រាវមួយទៀតបានសិក្សាពីឥទ្ធិពលនៃការយកចិត្តទុកដាក់អានសៀវភៅទៅលើខួរក្បាលរបស់មនុស្ស ។ លទ្ធផលបានបង្ហាញឲ្យដឹងថា ការមានទម្លាប់អានជួយហ្វឹកហាត់ខួរក្បាលឲ្យផ្តោតស្មារតីបានល្អ និងគិតបានដិតដល់មុនពេលធ្វើការសម្រេចចិត្ត ៕
ចែករំលែកព័តមាននេះ