ខេត្តស្វាយរៀង ៖ ភ្លើងទៀនបានលេបត្របាក់ផ្ទះទំហំ៥ម៉ែត្រ គុណ៦ម៉ែត្រ ឆេះហ្មត់ រួមទាំងទ្រព្យសម្បត្តិមួយចំនួន ខណៈកំពុងដេកលង់លក់ ក្រោយពីអុជធូបទៀនទទួលទេវតា រួចមិនបានពន្លត់ភ្លើងទៀន ។
ហេតុការណ៍ខាងលើនេះ បានកើតឡើងកាលពីវេលាម៉ោង២២ និង១៥នាទី យប់ថ្ងៃទី១៣ ខែមេសា ឆ្នាំ២០២០ ស្ថិតនៅភូមិត្រពាំងធ្លក ខាងត្បូងឃុំចន្ត្រី ស្រុករមាសហែក ខេត្តស្វាយរៀង ។
បើតាមសមត្ថកិច្ចបានឲ្យដឹងថា ផ្ទះដែលឆេះនោះមានទំហំ៥ម៉ែត្រ គុណ៦ម៉ែត្រ ដំបូលប្រក់សង្ក័សី ជញ្ជាំងស្លឹកលាយសង្ក័សី រនាបឫស្សី សសរឈើ រួមនឹងសម្ភារផ្សេងៗជាច្រើនទៀត ត្រូវអគ្គិភ័យលេបត្របាក់អស់គ្មានសល់ ខណៈដែលម្ចាស់ផ្ទះបានអុជទៀនធូប ទទួលទេវតាឆ្នាំថ្មីរួចក៏នាំគ្នាដេកលក់ ដោយមិនបានពន្លត់ភ្លើងទៀន ។
សមត្ថកិច្ចបានឱ្យដឹងទៀតថា មានករណីភ្លើងឆេះផ្ទះរបស់ឈ្មោះសេង វង់ ភេទប្រុស អាយុ៥៤ឆ្នាំ ប្រពន្ធឈ្មោះ ឡុង ចន អាយុ៥៧ឆ្នាំ ផ្ទះមានទំហំ៥ម៉ែត្រគុណ៦ម៉ែត្រ និងខូចខាតរួមមាន ៖ ម៉ូតូម៉ាកហុងដាសេ ១២៥ ពណ៌ខ្មៅ ស៊េរីឆ្នាំ២០១៥ ចំនួន១គ្រឿង ម៉ូតូម៉ាកហុងដាគុបសេ៥០ ពណ៌ស្លែ១គ្រឿង កង់៣គ្រឿង ស្រូវ៧០០គីឡូក្រាម អង្ករ១០៥គីឡូក្រាម ប្រាក់៥០០.០០០រៀល មាស៤ជីកន្លះ ខោអាវ៣០កំប្លេ ចាន២០ ឆ្នាំង៦ កន្ទេលមុង៣ ភួយ៥ ខ្នើយ៥ ទូដាក់ខោអាវ១ ទូរទស្សន៍២គ្រឿង សូឡា១ អាគុយ១ ទូរស័ព្ទដៃ១គ្រឿង ។
មូលហេតុ គឺម្ចាស់ផ្ទះអុជទៀនធូបទទួលទេវតា រួចមិនទាន់អស់ធូបទៀនក៏នាំគ្នាចូលដេកលក់ទើបបង្កអគ្គីភ័យបែបនេះ ។
បើតាមម្ចាស់ផ្ទះបានឲ្យដឹងថា គាត់រៀបចំទទួលទេវតា ហើយភ្លើងធូបទៀននៅមិនទាន់អស់ ដោយងងុយដេកពេកក៏នាំគ្នាចូលដេកមិនបានពន្លត់ភ្លើងធូប និងទៀនទេ ខណៈកំពុងដេកលង់លក់នោះស្រាប់តែអណ្តាតភ្លើងឆាបឆេះយ៉ាងសន្ធោសន្ធៅទៅហើយ ពួកគាត់២នាក់ប្តីប្រពន្ធបានស្ទុះចេញមកក្រៅផ្ទះទាំងព្រលឹងចុងសក់ ហើយដោយផ្ទះគ្មានទឹកច្រើនអាចពន្លត់បានភ្លើងក៏ឆេះតែមួយប្រព្រិចភ្នែកឆេះហ្មត់គ្មានយកអ្វីបានទេ គឺសល់តែខោអាវមួយចង្កេះប៉ុណ្ណោះ ៕
ចែករំលែកព័តមាននេះ