ខេត្តកោះកុង ៖ ប្រភពដែលកោះសន្តិភាពទទួលបាននៅមុននេះ ទាក់ទិនករណីជនជាតិចិនចំនួន៨នាក់ និងអ្នកបើកបរខ្មែរ១នាក់ គិតត្រឹមម៉ោង២រសៀលថ្ងៃទី១៤ មេសា នេះ គឺកំពុងស្ថិតនៅដោយឡែកពីគេក្នុងក្រុមហ៊ុនវារីអគ្គិសនីតាតៃ ដើម្បីតាមដានសុខភាពរបស់ពួកគាត់រយៈ១៤ថ្ងៃ ។ នេះបើយោងតាមការឱ្យដឹងពីមន្ទីរសុខាភិបាលខេត្តកោះកុង ។
ប្រភពបន្តទៀតថា បើទោះបីជនជាតិចិនទាំង៨នាក់នេះ ធ្វើដំណើរមកកាន់កម្ពុជាដោយមានលិខិតបញ្ជាក់ពីសុខភាពពួកគាត់យ៉ាងណាក្តី ក៏តម្រូវឱ្យគាត់នៅដាច់ឡែកសិន ដើម្បីការពារកុំឱ្យជំងឺណាមួយអាចឆ្លងទៅអ្នកដទៃបាន ពិសេសគឺវីរុសកូវីដ១៩នេះ ។
សូមរំលឹកថា ក្រុមការងារឆ្លើយតបបន្ទាន់ ទៅនឹងជំងឺឆ្លងនៃមន្ទីរសុខាភិបាលខេត្តកោះកុង បានសហការជាមួយអាជ្ញាធរខេត្ត និងស្រុកចំនួនពីរជនជាតិចិនទាំង០៨នាក់ និងអ្នកបើកបរ០១នាក់ បានដាក់ឱ្យនៅដាច់ដោយឡែក និងសិក្សាស្រាវជ្រាវតាមដានបន្តរកករណីសង្ស័យCOVID-19 ។
ប្រភពដដែលបានបញ្ជាក់ថា «ក្រុមការងារឆ្លើយតបបន្ទាន់ ទៅនឹងជំងឺឆ្លងនៃមន្ទីរសុខាភិបាលខេត្តសហការជាមួយអាជ្ញាធរខេត្ត , ស្រុកស្រែអំបិល ,ស្រុកកោះកុង និងក្រុមហ៊ុនវារីអគ្គិសនីតាតៃ នៅវេលាប្រមាណម៉ោង២២:០០យប់ ថ្ងៃទី១៣ ខែមេសា ឆ្នាំ២០២០ បានចុះស្រាវជ្រាវពិនិត្យ និងសាកសួរព័ត៌មានបឋម លើបុរសជនជាតិចិនចំនួន០៨នាក់ និងបុរសជនជាតិខ្មែរ ១នាក់ ជាអ្នកបើកបររថយន្តឱ្យជនជាតិចិននោះ ដែលបានធ្វើដំណើរតាមយន្តហោះពីខេត្តហ៊ូប៉ី ប្រទេសចិន ឆ្ពោះត្រង់មកព្រលានយន្តហោះភ្នំពេញអន្តរជាតិពោចិនតុង នៅថ្ងៃទី១៣ មេសា ឆ្នាំ២០២០ និងបន្តធ្វើដំណើរភ្លាមពីភ្នំពេញមកក្រុមហ៊ុនវារីអគ្គិសនីតាតៃ ខេត្តកោះកុង តាមរថយន្តស្លាកលេខ ភ្នំពេញ 2AK-8166 ថ្ងៃខែឆ្នាំដដែល» ។
ចែករំលែកព័តមាននេះ