វ៉ាស៊ីនតោន+ប៉េកាំង ៖ នៅពេលដែល COVID-19 រាតត្បាតនៅតែបន្តរីករាលដាលពាសពេញពិភពលោក ប្រទេសនានា កំពុងប្រឹងប្រែងទ្វេដង ដើម្បីពន្លឿន ការផលិតវ៉ាក់សាំង ការពារជំងឺនេះ ជាពិសេសគឺ អ្នកវិទ្យាសាស្ត្រអាមេរិក ក៏ដូចជាអ្នកវិទ្យាសាស្ត្រចិន កាន់តែខិតជិតជោគជ័យក្នុងការសាកល្បង វ៉ាក់សាំង ដើម្បីការពារជីវិតមនុស្សលើផែនដី ។
ក្រុមហ៊ុន ដៃគូអាមេរិក កំពុងធ្វើតេស្ត វ៉ាក់សាំងនេះលើមនុស្ស ដែលជាជំហានសំខាន់មួយ ទៅរកការបង្ហាញឲ្យឃើញថា ឱសថនេះមានសុវត្ថិភាព និងប្រសិទ្ធភាព ឫយ៉ាងណា ? ក្រុមហ៊ុនខ្លះទៀត កំពុងតែរកវិធីថ្មីៗ ក្នុងការកំណត់លើការប្រើប្រាស់ និងបញ្ជូនវ៉ាក់សាំងទៅធ្វើតេស្ត ពេលផលិតបានសម្រាប់ប្រើប្រាស់ នេះបើតាម america.gov ។
អ្នកវិទ្យាសាស្ត្រនៅតាមក្រុមហ៊ុន និងសាកលវិទ្យាល័យរបស់សហរដ្ឋអាមេរិក អាចបង្រួមការស្រាវជ្រាវរបស់គេ ដែលតាមធម្មតា ត្រូវការពេលរាប់ខែ ឬរាប់ឆ្នាំ ឲ្យមកត្រឹមរាប់សប្តាហ៍វិញ ។ ការងារនេះទទួលបានការជម្រុញបន្ថែម នៅពេលលោកប្រធានាធិបតី Trump បានចុះហត្ថលេខាឲ្យទៅជាច្បាប់ នូវថវិការបស់រដ្ឋាភិបាលសហព័ន្ធ ចំនួន៨,៣ពាន់លានដុល្លារ សម្រាប់ប្រយុទ្ធប្រឆាំងនឹងមេរោគកូវីដ-១៩ ។
ថវិកានេះកំពុងជួយទីភ្នាក់ងារសហព័ន្ធ ដូចជាវិទ្យាស្ថានសុខភាពជាតិរដ្ឋបាលចំណីអាហារនិងឱសថ និងដៃគូក្នុងវិស័យឯកជន ដើម្បីផលិតវ៉ាក់សាំង និងការព្យាបាលថ្មីៗ ។ ចាប់តាំងពីខែមីនា ក្រុមអ្នកស្រាវជ្រាវ នៅក្រុមហ៊ុនចំនួនពីររបស់សហរដ្ឋអាមេរិកបានចាប់ផ្តើមដំណាក់កាលសាកល្បង វ៉ាក់សាំង លើមនុស្ស ដែលវាមានសក្តានុពល សម្រាប់កូវីដ-១៩ ។ ការធ្វើតេស្តដំណាក់កាលនេះ ពាក់ព័ន្ធនឹងការចាក់វ៉ាក់សាំងដល់មនុស្សពេញវ័យ រហូតដល់១០០នាក់ ដែលមានសុខភាពល្អ និងតាមដានពួកគេឱ្យបានដិតដល់ ចំពោះផលប៉ះពាល់ ។
ដោយឡែក ទីភ្នាក់ងារសារព័ត៌មានចិនស៊ីនហួរ (Xinhua) បានរាយការណ៍ កាលពីថ្ងៃអង្គារ ទី១៤ មេសា នេះថា រដ្ឋាភិបាលចិនបានអនុម័ត វ៉ាក់សាំង ចំនួនពីរ ការពារមេរោគកូវីដ-១៩ សម្រាប់ការសាកល្បងព្យាបាលទៅលើមនុស្ស ។
វ៉ាក់សាំងការពារមេរោគកូវីដ-១៩ ទាំង២ ប្រភេទនេះ ត្រូវបានបង្កើតឡើងដោយវិទ្យាស្ថានវូហាន ស្ថិតក្រោមក្រុមឱសថជាតិចិន (Sinopharm) និងក្រុមហ៊ុន ស៊ីណូវ៉ាក ស្រាវជ្រាវនិងអភិវឌ្ឍន៍ ដែលមានមូលដ្ឋាននៅទីក្រុងប៉េកាំង ។ ការសាកល្បង វ៉ាក់សាំងទាំងពីរ បានចាប់ផ្តើមហើយ ។ សម្រាប់ការសាកល្បងដំណាក់កាលទី២ ទៅលើមនុស្ស ដោយមានអ្នកចូលរួមស្ម័គ្រចិត្ត ៥០០នាក់ ៕
ចែករំលែកព័តមាននេះ