ខេត្តព្រៃវែង ៖ ក្រោយពីបានឮសំនៀងច្រៀងឡើងកងរំពងនៅតាមផ្ទះខ្លាំងពេក សារមួយបានបង្ហោះក្នុងផេកអធិការនគរបាលក្រុងព្រៃវែងយ៉ាងដូច្នេះថា«ក្រុមតារាចម្រៀងច្រៀងពីរោះៗស្ទើរគ្រប់គ្នានៅតាម ភូមិ តែមិនដឹងថា ត្រូវអញ្ជើញក្រុមណាមួយដើម្បីឡើងប៉ុស្តិ៍ថ្ងៃស្អែក!»។
ទាក់ទិនករណីខាងលើ លោកនុត ប៊ុនឌឿន ជាអធិការនគរបាលក្រុងព្រៃវែងបានប្រាប់កោះសន្តិភាពដឹងថា នៅថ្ងៃចូលឆ្នាំទី២នេះ គិតត្រឹមម៉ោងជាង១១ព្រឹកថ្ងៃទី១៤ មេសា សង្កេតឃើញបងប្អូននៅតាមភូមិក្នុងក្រុងព្រៃវែង គឺមានចូលរួមសហការជាមួយសមត្ថកិច្ចបានច្រើន ដោយមិនមានជួបជុំផឹកស៊ី និងច្រៀងខារ៉ាអូខេទៀតនោះទេ ។
លោកបន្តថា កាលពីថ្ងៃម្សិលមិញ ជាក់ស្តែងឃើញបងប្អូនយើងភាគច្រើន ហាក់ភ្លេចខ្លួន ដោយជួបជុំគ្នាច្រៀងខារ៉ាអូខេ និងផឹកស៊ី ។ ដែលកត្តានេះ គឺជាការប្រឈមនឹងងាយឆ្លងជំងឺកូវីដ១៩នេះបំផុត នៅពេលដែលយើងជួបជុំគ្នាច្រើន ។ លោកថា តែលោកក៏បានចាត់ឱ្យកម្លាំងចុះទៅតាមផ្ទះនីមួយៗនាល្ងាចនោះដែរ ដើម្បីណែនាំកុំឱ្យមានការជួបជុំច្រើន ពិសេសគឺការច្រៀងខារ៉ាអូខេឮៗ ដែលជាការរំខានមួយផងដែរ ។
លោកបន្តទៀតថា ពេលកម្លាំងលោកចុះដល់ នៅផ្ទះខ្លះឃើញគាត់ច្រៀងលេងដោយមានមនុស្សតែ២-៣នាក់ក្នុងគ្រួសាររបស់គាត់ប៉ុណ្ណោះ ។ ហើយយើងក៏មិនមានវិធានការអ្វីខ្លាំងក្លានោះដែរ ដោយគ្រាន់តែធ្វើការអប់រំណែនាំគាត់បន្ថែម ដើម្បីចូលរួមប្រុងប្រយ័ត្នពីជំងឺកូវីដ១៩នេះឱ្យខ្ពស់បំផុត ។
ចែករំលែកព័តមាននេះ