ខេត្តព្រះសីហនុ ៖ បើតាមសេចក្តីរាយការណ៍បឋមបានឱ្យដឹងថា មានករណីអគ្គិភ័យបានឆាបឆេះផ្ទះអស់ចំនួន២ខ្នងជាប់គ្នាយ៉ាងសន្ធោសន្ធៅ កាលពីម៉ោងប្រហែល៩និង៣០នាទីយប់ ថ្ងៃទី១៣ ខែមេសា ឆ្នាំ២០២០ នៅចំណុចខាងជើងឈាងខាងកើតចំណុចវត្តអូរត្រេះ ស្ថិតក្នុងភូមិ៦ សង្កាត់លេខ៤ ក្រុង-ខេត្តព្រះសីហនុ ។
បើតាមសមត្ថកិច្ចមូលដ្ឋានបានបញ្ជាក់ឲ្យដឹងថា ម្ចាស់ផ្ទះខាងលើឈ្មោះ ម៉ិ លិ ភេទប្រុស អាយុ៥២ឆ្នាំ មុខរបរបិទស្រា រស់នៅភូមិ-ឃុំខាងលើ (របួលស្រាល) បច្ចុប្បន្នជនរងគ្រោះ ត្រូវបានបញ្ជូនទៅមន្ទីរពេទ្យបង្អែកខេត្ត ។
សមត្ថកិច្ចមូលដ្ឋានបានបន្តថា ចំពោះការខូចខាតសម្ភារៈរួមមាន ៖ ឡាន១គ្រឿង ម៉ាកកាមរីឆ្លាម ពណ៌ទឹកប្រាក់, ម៉ូតូ១គ្រឿង ម៉ាកហុងដាឌ្រីម ពណ៌ខ្មៅ ស៊េរីឆ្នាំ 2019 និងសម្ភារៈមួយចំនួនទៀត។
សមត្ថកិច្ចដដែលបញ្ជាក់ថា ក្នុងយុទ្ធនាការពន្លត់អគ្គិភ័យខាងលើនេះ សមត្ថកិច្ចបានប្រើប្រាស់រថយន្តពន្លត់អគ្គិភ័យអស់ចំនួន៤រថយន្ត លុះរហូតដល់ម៉ោង១០យប់ថ្ងៃដដែល ទើបរលត់ទៅវិញទាំងស្រុង។ រីឯមូលហេតុនៃការឆេះនេះ សមត្ថកិច្ចបានសន្និដ្ឋានជាជំហានដំបូងថា គឺបណ្ដាលមកម្ចាស់ផ្ទះដុតទៀនធូបសែនទទួលទេវតាឆ្នាំថ្មី ។ (កែសម្រួលដោយ ៖ បុប្ផា)
ចែករំលែកព័តមាននេះ