រាជធានីភ្នំពេញ ៖ គណៈកម្មាធិការអចិន្ត្រៃយ៍រព្រឹទ្ធសភា បើកកិច្ចប្រជុំពិនិត្យ ដើម្បីសម្រេចដាក់ក្នុងសម័យប្រជុំវិសាមញ្ញ នៅពេលខាងមុខ ដើម្បីសម្រេចបោះឆ្នោតអនុម័ត ឬយ៉ាងណា ខណៈគណៈកម្មាធិការសិទ្ធិមនុស្សកម្ពុជាបានចេញសេចក្តីថ្លែងការណ៍អះអាងថា ការរៀបចំច្បាប់ស្តីពីការគ្រប់គ្រងប្រទេសជាតិ ស្ថិតក្នុងភាពអាសន្ន «មិនមានចរិតជាការរំលោភសិទ្ធិមនុស្ស ឬជាឧបករណ៍ប្រមូលអំណាច» ដូចការចោទប្រកាន់បែបអគតិរបស់ក្រុមប្រឆាំងមួយក្តាប់តូចឡើយ ។
យោងតាមសេចក្តីដំណឹងរបស់អគ្គលេខាធិការដ្ឋានព្រឹទ្ធសភា ចេញផ្សាយនៅថ្ងៃទី១៤ មេសា ឆ្នាំ២០២០បានបញ្ជាក់យ៉ាងដូច្នេះថា «គណៈកម្មាធិការអចិន្ត្រៃយ៍ព្រឹទ្ធសភានឹងបើកកិច្ចប្រជុំនៅថ្ងៃទី១៦ មេសា ដោយរបៀបវារៈចំនួន២ គឺ ៖១ – ពិនិត្យ និងសម្រេចលើសំណើររបស់គណៈកម្មការទី២ ព្រឹទ្ធសភា សុំដាក់សេចក្តីព្រាងច្បាប់ស្តីពីការគ្រប់គ្រងប្រទេសជាតិ ស្ថិតក្នុងភាពអាសន្ន ។ ២ – កំណត់របៀបវារៈកាលបរិច្ឆិទប្រជុំព្រឹទ្ធសភា ជាវិសាមញ្ញនីតិកាលទី៤» ។
សូមរម្លឹកថា សេចក្តីព្រាងច្បាប់ស្តីពីការគ្រប់គ្រងប្រទេសជាតិ ស្ថិតក្នុងភាពអាសន្នត្រូវបានរដ្ឋសភាអនុម័ត កាលពីកន្លងមកថ្មីៗនេះ ដោយសម្លេង១១៥រូប លើចំនួន១១៥រូប ដែលក្នុងនោះក៏មានវត្តមានរបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជាផងដែរ ។
ពាក់ព័ន្ធនឹងច្បាប់ស្តីពីការ «គ្រប់គ្រងប្រទេសជាតិស្ថិតក្នុងភាពអាសន្ន»កំពុងស្ថិតក្នុងដៃស្ថាប័នព្រឹទ្ធសភានេះផងដែរ គណៈកម្មាធិការសិទ្ធិមនុស្សកម្ពុជាបានចេញសេចក្តីថ្លែងការណ៍កាលពីរាត្រីថ្ងៃទី ១៣ មេសា ដោយអះអាងថា ច្បាប់នេះ គឺជាឧបករណ៍គតិយុត្តដ៏មានតម្លៃក្នុងការការពារសិទ្ធិរស់រានមានជីវិត សិទ្ធិទទួលបាននូវសន្តិភាព ស្ថិរភាពសង្គម និងការអភិវឌ្ឍ ដែលជាក្តីប្រាថ្នាចង់បានរបស់ប្រជាពលរដ្ឋទូទាំងប្រទេស និងស្របតាមគោលការណ៍នីតិរដ្ឋ នៅក្នុងសង្គមប្រជាធិបតេយ្យ។
សម្តេចតេជោ ធ្លាប់បានមានប្រសាសន៍ថាបើសិនជាច្បាប់នេះត្រូវបានអនុវត្តដោយដាក់ប្រទេសក្នុងគ្រាអាសន្ន ក្នុងករណីពលរដ្ឋមិនអនុវត្តតាមបទបញ្ជាររបស់រាជរដ្ឋាភិបាលក្នុងការទប់ស្កាត់ការរីករាលដាលវីរុសកូវីដ ១៩ នោះសិទ្ធស៊ីវិលនឹងត្រូវកាត់បន្ថយ ៕
ចែករំលែកព័តមាននេះ