ដូចបានដឹងស្រាប់ថា ព្រឹត្តិការណ៍អូឡាំពិកទីក្រុងតូក្យូឆ្នាំ ២០២០ ត្រូវបានប្រកាសជាផ្លូវការលើកទៅធ្វើនៅឆ្នាំក្រោយ ដោយសារតែវិបត្តិពិភពលោក ជុំវិញការរាតត្បាតនៃវីរុសកូវីដ១៩ ។
បើទោះជាត្រូវលើកពេលទៅធ្វើនៅឆ្នាំក្រោយក៏ពិតមែន ប៉ុន្តែគណៈកម្មាធិការអូឡាំពិកអន្តរជាតិ (IOC) រួមជាមួយគណៈកម្មាធិការអូឡាំពិកប្រទេសជប៉ុន (JOC) បានព្រមព្រៀងគ្នាហៅព្រឹត្តិការណ៍នេះថា អូឡាំពិកទីក្រុងតូក្យូឆ្នាំ ២០២០ ដដែល ។
យោងតាមគេហទំព័រ History បានឱ្យដឹងថា នេះមិនមែនជាលើកទី១នោះទេ សម្រាប់ប្រទេសជប៉ុន ដែលជួបរឿងជូរចត់ជាមួយព្រឹត្តិការណ៍ខាងលើនេះ ។
ជាក់ស្តែង ការប្រកួតកីឡាអូឡាំពិករដូវក្តៅ និងរងាឆ្នាំ ១៩៤០ ទាំងពីរត្រូវបានគ្រោងធ្វើនៅក្នុងចក្រភពជប៉ុនពីថ្ងៃទី ២១ ខែ កញ្ញា ដល់ថ្ងៃទី ៦ ខែ តុលា ឆ្នាំ ១៩៤០ ដែលជាប្រទេសអាស៊ីដំបូងគេ ទទួលបានសិទ្ធិធ្វើជាម្ចាស់ផ្ទះ ។ ប៉ុន្តែជប៉ុនបានបោះបង់សិទ្ធិរបស់ខ្លួននៅឆ្នាំ ១៩៣៧ នៅពេលដែលពួកគេធ្វើសង្គ្រាមតទល់ជាមួយប្រទេសចិន ។
វាត្រូវបានសម្រេចលើកទៅធ្វើនៅទីក្រុង Helsinki ប្រទេសហ្វាំងឡង់ជំនួសវិញ ដោយគ្រោងចាប់ផ្តើមនៅថ្ងៃទី ២០ ខែ កក្កដា ដល់ថ្ងៃទី ៤ ខែ សីហា ឆ្នាំ ១៩៤០ ។ ប៉ុន្តែជាអកុសលព្រឹត្តិការណ៍នេះ ត្រូវបានលុបចោលទាំងស្រុងនៅក្នុងឆ្នាំ ១៩៣៩ បន្ទាប់ពីមានការលុកលុយយ៉ាងខ្លាំងរបស់កងទ័ពមេដឹកនាំផ្តាច់ការ ហ៊ីត្លែរ លើប្រទេសប៉ូឡូញ ៕
ចែករំលែកព័តមាននេះ