រាជធានីភ្នំពេញ ៖ លោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានព្រមានពីការបាត់បង់ជីវិត ដោយសារជំងឺកូវីដ១៩ បើសិនជាពលរដ្ឋមានការធ្វេសប្រហែសមិនស្តាប់ការណែនាំរបស់រាជរដ្ឋាភិបាលក៏ដូចជា ក្រសួងសុខាភិបាល ។…
រាជធានីភ្នំពេញ ៖ លោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានព្រមានពីការបាត់បង់ជីវិត ដោយសារជំងឺកូវីដ១៩ បើសិនជាពលរដ្ឋមានការធ្វេសប្រហែសមិនស្តាប់ការណែនាំរបស់រាជរដ្ឋាភិបាលក៏ដូចជា ក្រសួងសុខាភិបាល ។
លោកម៉ម ប៊ុនហេង បានថ្លែងក្នុងសន្និសីទសារព័ត៌មានព្រឹក ថ្ងៃទី១៣ ខែមេសា ឆ្នាំ២០២០ នៅទីស្តីការក្រសួង យ៉ាងដូច្នេះថា ៖«ផ្លូវមួយដែលទៅនោះ គឺការមិនគោរពបទបញ្ជារបស់រាជរដ្ឋាភិបាល ឬសេចក្តីណែនាំរបស់ក្រសួងសុខាភិបាលយើងអាចឈានទៅរកហានិភ៏យខ្ពស់ គឺការបាត់បង់សុភមង្គល ការរីករាលដាលនៃជំងឺក្នុងខ្លួន នៅក្នុងគ្រួសារ ក៏ដូចជា សហគមន៍របស់យើង ហើយនៅទីបញ្ចប់ បើរីករាលដាលច្រើន គឺអាចមានបងប្អូនទទួលមរណភាព ។ នេះជាចំណុចដែលយើងធ្វើយ៉ាងម៉េចទប់ស្កាត់កុំឲ្យរីករាលធំនៅក្នុងសហគមន៍» ។
លោករដ្ឋមន្ត្រីបានបន្តថា ដូច្នេះយើងត្រូវពង្រឹងការងារក្នុងការទប់ស្កាត់បន្ថែមទៀត បើមិនដូច្នេះ គឺអាចមានការស្លាប់មនុស្សនៅក្នុងសហគមន៍ដោយសារជំងឺកូវីដ១៩ ។ កាលណា អ្នកឆ្លងច្រើនហួសហើយ ការគ្រប់គ្រងតាមផ្នែកវិជ្ជសាស្ត្រក៏ពិបាកដែរ ។ ដូច្នេះពេលចូលឆ្នាំថ្មី នេះយើងមិនគួរនិយាយពីសេចក្តីស្លាប់ទេ យើងនិយាយពីសេចក្តីសុខសុភមង្គល ។
ជាមួយគ្នានោះដែរ លោករដ្ឋមន្ត្រីក៏បានបង្ហាញពីការព្រួយបារម្ភក្នុងការឆ្លងជំងឺកូវីដ១៩ នៅក្នុងសហគមន៍ដែលអាចឈានដល់ការរីករាលដាលខ្ពស់ បើសិនប្រជាពលរដ្ឋម្នាក់ៗមិនយកចិត្តទុកដាក់ក្នុងការទប់ស្កាត់ដោយខ្លួនឯងផ្ទាល់ខ្លួន ៕
ចែករំលែកព័តមាននេះ