វីរបុរសរបស់ក្រុមហង្សក្រហម Liverpool និងធ្លាប់ជាគ្រូបង្វឹកក្រុមនេះលោក Kenny Dalglish ត្រូវបានបញ្ជូនចេញពីមន្ទីរពេទ្យហើយកាលពីម្សិលមិញ បន្ទាប់ពីបានធ្វើតេស្តមានសញ្ញាវិជ្ជមានចំពោះវីរុស COVID-19 ។
លោក Kenny Dalglish ដែលបច្ចុប្បន្នឈានដល់វ័យ ៦៩ឆ្នាំត្រូវបានគេបញ្ជូនទៅមន្ទីរពេទ្យកាលពីថ្ងៃពុធ ដើម្បីព្យាបាលជំងឺប្រចាំកាយរបស់លោកជាធម្មតា មុនពេលគ្រូពេទ្យសម្រេចធ្វើតេស្តចំពោះវីរុស COVID-19 ហើយលទ្ធផលត្រឡប់មកវិញគឺវិជ្ជមាន ទោះបីលោកមិនបានបង្ហាញរោគសញ្ញាអ្វីក៏ដោយ ។
អតីតខ្សែប្រយុទ្ធឆ្នើមក្រុមជម្រើសជាស្កុតឡែនរូបនេះ បច្ចុប្បន្នកំពុងបន្តសម្រាកព្យាបាល ដោយដាក់ខ្លួនដាច់ដោយឡែកពីគេនៅផ្ទះ ។
លោកបានមានប្រសាសន៍ថា «សូមអរគុណចំពោះការជូនពរទាំងអស់របស់អ្នកក្នុងរយៈពេលពីរ បីថ្ងៃចុងក្រោយនេះ។ ខ្ញុំពិតជារីករាយដែលបានត្រឡប់មកផ្ទះវិញជាមួយក្រុមគ្រួសារ បន្ទាប់ពីទទួលបានការមើលថែទាំដ៏អស្ចារ្យពី NHS ដែលសំខាន់បំផុតក្នុងពេលបច្ចុប្បន្ននេះ ជាងពេលណាៗទាំងអស់» ។
«Marina និងខ្ញុំសូមថ្លែងអំណរគុណយ៉ាងជ្រាលជ្រៅចំពោះបុគ្គលិកពេទ្យ ដែលយកចិត្តទុកដាក់ចំពោះខ្ញុំ និងអ្នកដែលបន្តសម្រាកព្យាបាលរាប់មិនអស់នៅទូទាំងប្រទេសអំឡុងពេលដ៏លំបាកនេះ» ៕ (ដកស្រង់ចេញពី BBC)
ចែករំលែកព័តមាននេះ