រាជធានីភ្នំពេញ ៖ លោកហេង សួរអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈបញ្ជាក់ថា នៅថ្ងៃទី១៣មេសា នេះ មានរោងចក្រ៩៥%បានបើកដំណើរការហើយកម្មករទៅធ្វើការជាធម្មតា ប៉ុន្តែអ្នកដែលឈប់ការងារចំថ្ងៃបុណ្យចូលឆ្នាំត្រូវធ្វើចត្តាឡីស័ក១៤ថ្ងៃ ។
លោកហេង សួរ បានឲ្យដឹងតាមប្រព័ន្ធតេឡេក្រាមបញ្ជាក់ថា ៖ «គិតត្រឹមម៉ោង៧ និង៣០នាទីព្រឹកនេះ រោងចក្រទាំងអស់ ដែលបានដំណើរការកាលពីថ្ងៃសៅរ៍ បានបើកដំណើរការធម្មតា ។ បន្ថែមពីនេះ នៅខេត្ត ស្វាយរៀង រោងចក្រដែលបានឈប់សម្រាក កាលពីថ្ងៃសៅរ៍ក៏បានបើកដំណើរការវិញនៅថ្ងៃនេះ ។ ជារួមគឺរោងចក្រលើស៩៥% បានដំណើរការ រីឯកម្មកររោងចក្រក៏បានមកធ្វើការធម្មតា» ។
អ្នកនាំពាក្យដដែលបានលើកឡើងទៀតថា សូមបញ្ជាក់ថា កម្មករនិយោជិតដែលបានឈប់ការងារក្នុងអំឡុងពេលចូលឆ្នាំនេះ នឹងត្រូវធ្វើចត្តាឡីស័ក១៤ថ្ងៃក្រោយចូលឆ្នាំ ។ កម្មករនោះនឹងមិនទទួលបានប្រាក់បៀវត្សទេ ប្រសិនជាឈប់ដោយគ្មានការអនុញ្ញាតពីរោងចក្រ។
សូមជម្រាបថា ដើម្បីទប់ស្កាត់ការរីករាលដាលជំងឺកូវីដ១ ៩ប្រមុខរាជរដ្ឋាភិបាលបានប្រកាសផ្អាកបុណ្យចូលឆ្នាំប្រពៃណីជាតិខ្មែរ ដោយមិនអនុញ្ញាតឲ្យមន្ត្រីរាជការ ក្រុមហ៊ុនឯកជន កម្មករនិយោជិតឈប់សម្រាកនោះទេ ដោយសន្យានឹងសងថ្ងៃឈប់សម្រាប់រយៈពេល៥ថ្ងៃវិញ នៅពេលដែលជំងឺកូវីដ១៩បានចប់ ។
ចែករំលែកព័តមាននេះ