កូតឌីវ័រ៖ ហ្វូងមនុស្សប្រមាណជា ១០០ នាក់នៅក្នុងតំបន់ Yopougon នៃរដ្ឋធានីពាណិជ្ជកម្មរបស់ប្រទេសកូតឌីវ័រថ្មីៗនេះ បានប៉ះទង្គិចដោយហឹង្សាជាមួយនឹងប៉ូលិស ក្រោយពីពួកគេបានវាយបំផ្លាញមជ្ឈមណ្ឌលធ្វើតេស្ត៍រកមេរោគឆ្លងកូវីដ១៩ ក្នុងតំបន់រស់នៅ ដោយពួកគេមានការភ័យខ្លាចថា ប្រជាជនដែលប្រើប្រាស់កន្លែងនេះនឹងធ្វើឲ្យមានការឆ្លងរាលដាលដល់អ្នកស្រុករបស់ពួកគេ ។
ការតវ៉ាប្រឆាំងរបស់អ្នកស្រុកជាង ១០០ នាក់នៅ Yopougon បានកើតមានឡើង បន្ទាប់ពីមានការសាងសង់នូវទីតាំងថ្មីមួយបម្រើជាមជ្ឈមណ្ឌលធ្វើតេស្តរកមេរោគឆ្លងកូវីដ១៩ កាលពីថ្ងៃអាទិត្យ ។ ក្រុមអ្នកតវ៉ាបានដុតសំបកកង់ឡានដែលនៅក្បែរនោះ ហើយជាថ្មីម្តងទៀតហ្វូងមនុស្សដែលខឹងសម្បានឹងការសាងសង់នេះ បានត្រឡប់មកវិញកាលពីថ្ងៃច័ន្ទដោយគប់ដុំថ្មដាក់ប៉ូលិស ពេលសមត្ថកិច្ចព្យាយាមបំបែកពួកគេដោយការប្រើឧស្ម័នបង្ហូរទឹកភ្នែក។
លោក Joel Blehi អ្នកតវ៉ាមួយរូបដែលកំពុងពួនជ្រកនៅកន្លែងលក់ថ្នាំមួយកន្លែងបាននិយាយថា «ពួកគេចង់សំលាប់យើង។ យើងមិនចង់បានមជ្ឈមណ្ឌលនេះទេ» ។
ប៉ូលិសបាននិយាយថា ភាពប្រទូសរ៉ាយបានកើតឡើងពីការយល់ច្រឡំថា អ្នកជំងឺដែលមាន Covid-19 នឹងត្រូវបានព្យាបាលនៅមជ្ឈមណ្ឌល ខណៈការពិតនោះវាមិនមែនជាកន្លែងព្យាបាលជំងឺនោះទេ ។ នេះជាការលើកឡើងរបស់អ្នកនាំពាក្យប៉ូលិសលោក Charlemagne Bleu ដែលបាននិយាយបន្ថែមថា «មានការខ្វះការប្រាស្រ័យទាក់ទង។ វាដូចជាមជ្ឈមណ្ឌលសាកល្បង មិនមែនកន្លែងព្យាបាលនោះទេ» ។
ក្រសួងសុខាភិបាលបាននិយាយថា មជ្ឈមណ្ឌលនេះគឺជាមជ្ឈមណ្ឌលមួយក្នុងចំណោមអគារជាច្រើនដែលត្រូវបានសាងសង់នៅក្នុងទីក្រុងអាប៊ីចាន សម្រាប់ការធ្វើតេស្ត៍រកមេរោគឆ្លងវីរុសស្ម័គ្រចិត្តដោយស្ម័គ្រចិត្ត។ លោក Bleu បាននិយាយថា មិនមានក្រុមអ្នកតវ៉ា ឬប៉ូលិសណាម្នាក់រងគ្រោះថ្នាក់នៅក្នុងការប៉ះទង្គិចគ្នានោះទេ ប៉ុន្តែការចាប់ខ្លួនចំនួន ៤ ត្រូវបានធ្វើឡើង ។
អំពើហឹង្សានេះ គឺជាសញ្ញាដំបូងនៃការប្រឆាំងរបស់សហគមន៍ចំពោះការឆ្លើយតបនឹងវីរុសកូវីដ ១៩ នៅប្រទេសកូតឌីវ័រ ដែលអាជ្ញាធរបានបិទសាលារៀន កន្លែងគោរពបូជា និងហាងភាគច្រើនហើយបានដាក់បំរាមគោចរនៅពេលយប់។ ប្រទេសនេះមានករណីកូវីដ ១៩ ចំនួន ២៦១ ករណីនិងមានអ្នកស្លាប់ចំនួន ៣ នាក់៕ ដកស្រង់ចេញពីវេបសាយ ៖ france24 (កែសម្រួលដោយ ៖ បុប្ផា)
ចែករំលែកព័តមាននេះ