អ៊ីតាលី៖ ទន្ទឹមនឹងអាជ្ញាធរអ៊ីតាលីកំពុងរុញឲ្យសេដ្ឋកិច្ចប្រទេសងើបឡើងវិញ ព្រោះតែវិបត្ដិ មេរោគឆ្លងថ្មីបង្កឡើងដោយវីរុសកូវីដ១៩ នោះ គេសង្កេតឃើញថា ក្រុមម៉ាហ្វីយ៉ាកំពុងតែទទួលបានការគាំទ្រក្នុងតំបន់តាមរយៈសកម្មភាពរបស់ពួកគេចុះចែកចាយស្បៀងអាហារដោយឥតគិតថ្លៃដល់ក្រុមគ្រួសារក្រីក្រនៅដាច់ពីគ្នាដែលអស់លុយទិញម្ហូបអាហារនោះ ។
ក្នុងប៉ុន្មានសប្តាហ៍ថ្មីៗនេះ គេឃើញមានវីដេអូបានលេចចេញពីក្រុមក្មេងទំនើងរបស់ក្រុមម៉ាហ្វីយ៉ា បានដើរចែកចាយទំនិញសំខាន់ៗដល់ជនជាតិអ៊ីតាលីដែលរងគ្រោះដោយការឆ្លងមេរោគកូវីដ១៩ នៅលើតំបន់ភាគខាងត្បូងនៃប្រទេស ដែលជាតំបន់ក្រីក្របំផុត ដូចជា Campania, Calabria, Sicily និង Puglia ដោយសារតែភាពតានតឹងកើនឡើងនៅទូទាំងប្រទេសអ៊ីតាលី។ នេះបើយោងតាមការចុះផ្សាយរបស់សារព័ត៌មាន The guardian ថ្ងៃទី ១២ មេសានេះ ។
លោក Nicola Gratteri អ្នកស៊ើបអង្កេត និងជាប្រធានក្រុមប្រឆាំងនឹងក្រុមម៉ាហ្វីយ៉ានិងជា
និងជាប្រធានការិយាល័យរដ្ឋអាជ្ញានៅ Catanzaro បានបង្ហាញនូវការព្រួយបារម្ភលើរឿងនេះ និងបាននិយាយថា «អស់រយៈពេលជាងមួយខែហើយដែលហាងកាហ្វេ បណ្តាហាងនានា និងហាងស្រាត្រូវបានបិទទ្វារ ។ មនុស្សរាប់លាននាក់ធ្វើការនៅក្នុងសេដ្ឋកិច្ចដែលកំពុងដាំក្បាលចុះ ដែលមានន័យថា ពួកគេមិនបានទទួលបានប្រាក់ចំណូលក្នុងរយៈពេលជាងមួយខែ ហើយមិនដឹងថា ពេលណាពួកគេអាចត្រឡប់មកធ្វើការវិញ»។
លោកបានបន្តថា «រដ្ឋាភិបាលកំពុងចេញប័ណ្ណដែលគេហៅថា អ្វីដែលហៅថាប័ណ្ណទូទាត់ទំនិញដើម្បីគាំទ្រប្រជាជន។ ប្រសិនបើរដ្ឋមិនបោះជំហានក្នុងការជួយគ្រួសារទាំងនេះទេ ម៉ាហ្វីយ៉ានឹងផ្តល់សេវាកម្មរបស់ខ្លួនដោយដាក់ការគ្រប់គ្រងរបស់ពួកគេលើជីវិតរបស់ប្រជាជន» ៕ ដកស្រង់ចេញពីវេបសាយ ៖ theguardian (កែសម្រួលដោយ ៖ បុប្ផា)
ចែករំលែកព័តមាននេះ