សហរដ្ឋអាមេរិក ៖ ការឆ្លងរាលដាលនៃវីរុសCOVID-19 បណ្ដាលឲ្យមនុស្សបាត់បង់ជីវិតដល់យ៉ាងតិច១០៣.១៤១នាក់ លើពិភពលោក ចាប់តាំងពីវាលេចនៅប្រទេសចិនពីខែធ្នូមក។ នេះជាតុល្យការរបស់AFP ដោយស្រង់ពីបណ្ដាប្រភពផ្លូវការកាលពីថ្ងៃទី១១មេសា វេលាម៉ោង១១ម៉ោងសកល។
តាមតុល្យការនោះថា មនុស្សជាង១.៧០០.៧៦០នាក់ បានឆ្លងវីរុសនោះក្នុងប្រទេសនិងដែនដីដល់ទៅ១៩៣ តាំងពីចាប់ផ្ដើមការឆ្លងមក។ ទោះបីយ៉ាងណាចំនួននោះមិនឆ្លុះបញ្ចាំងពីចំនួនពិតប្រាកដនៃអ្នកឆ្លងឡើយ ដោយប្រទេសមួយចំនួនធំ បានធ្វើតេស្តតែលើបណ្ដាករណីចាំបាច់ប៉ុណ្ណោះ។ ក្នុងចំណោមអ្នកឆ្លងទាំងនេះយ៉ាងតិច៣៤១.១០០នាក់បច្ចុប្បន្នចាត់ទុកថាទទួលការព្យាបាលជាសះស្បើយ។
អាមេរិកស្លាប់ជាង២ម៉ឺននាក់
សហរដ្ឋអាមេរិកកាលពីយប់ថ្ងៃទី១១មេសា ចំនួនអ្នកស្លាប់ ដោយសារវីរុសឡើងដល់លើសពី២០.០០០នាក់ហើយ រួចអ៊ីតាលីក៏ប្រហែលជាមានអ្នកស្លាប់ប្រហាក់ហែលគ្នានេះដែរ ។ ការឆ្លងរាលដាលនៃវីរុសនេះបណ្ដាលឲ្យគ្រឹស្តសាសនិកជាង២ពាន់លាននាក់ មិនអាចធ្វើពិធីសូត្រធម៌ចុងសប្ដាហ៍និងប្រារព្ភពិធីសាសនាជាប្រពៃណីនានា។
យោងតាមសាកលវិទ្យាល័យចនហុបគីនថា វីរុសបានសម្លាប់់មនុស្សយ៉ាងតិច ២០.០៧១នាក់ហើយ នៅសហរដ្ឋអាមេរិក ហើយមនុស្សច្រើនបំផុតបានឆ្លង គឺដល់ប្រមាណជា៥១៩.៤៥៣នាក់។
អ៊ីតាលីចំនួនអ្នកស្លាប់នៅតែកើន
យោងតាមផ្នែកការពារស៊ីវិលអ៊ីតាលីថា ក្នុងប្រទេសនេះ នាថ្ងៃទី១១មេសាមានអ្នកស្លាប់ថ្មីដោយសារវីរុស៦១៩នាក់ទៀត ទល់នឹង៥៧០នាក់នាពេលមុននេះ និងមានអ្នកឆ្លងថ្មី៤.៦៩៤នាក់ ខណៈនាថ្ងៃទី១០មេសាមានអ្នកឆ្លងថ្មីត្រឹម៣.៩៥១នាក់ ។ តុល្យការនៃការឆ្លងនៅអ៊ីតាលីពេលនេះ ស្ថិតក្នុងលំដាប់ទី២បន្ទាប់ពីសហរដ្ឋអាមេរិក ដោយចំនួនអ្នកស្លាប់សរុបបានឡើងដល់១៩.៤៦៨នាក់។
អង់គ្លេសស្លាប់ជិត១ម៉ឺននាក់
ប្រទេសអង់គ្លេសប្រកាសនាថ្ងៃទី១១មេសា ពីមនុស្សស្លាប់៩១៧នាក់ទៀត នាំឲ្យចំនួនអ្នកស្លាប់ក្នុងប្រទេសនេះឡើងដល់ជិត១០.០០០នាក់។ រដ្ឋាភិបាលបានទទូចលើសារសំខាន់នៃការគោរពការហាមមិនឲ្យចេញក្រៅ នាចុងសប្ដាហ៍នៃបុណ្យគ្រឹស្តPAQUES។
អេស្បា៉ញអ្នកស្លាប់ចុះថយ៣ថ្ងៃជាប់គ្នា
ក្រសួងសុខាភិបាលអេស្ប៉ាញប្រកាសថា ចំនួនអ្នកស្លាប់ដោយសារវីរុស មានការចុះថយនាថ្ងៃទី១១មេសា សម្រាប់៣ថ្ងៃជាប់គ្នាជាមួយអ្នកស្លាប់ថ្មី៥១០នាក់ រយៈពេល២៤ម៉ោងចុងក្រោយនេះ ដែលនោះជាចំនួនទាបមួយចាប់តាំង ពីថ្ងៃទី២៣មេសាមក។ ចំណែកចំនួនអ្នកឆ្លងក្នុងរយៈពេល២៤ម៉ោងចុងក្រោយកើនពីសរុប១៥៧.០២២នាក់ ដល់១៦១.០២២នាក់ ។ ការចុះថយនៃចំនួនអ្នកស្លាប់នេះជាសញ្ញាលើកទឹកចិត្តមួយសម្រាប់អេស្ប៉ាញ ជាប្រទេសមួយក្នុងចំណោមប្រទេស៣ ដែលមានមនុស្សស្លាប់ច្រើនបំផុត ដោយសារវីរុសបន្ទាប់ពីអ៊ីតាលី និងសហរដ្ឋអាមេរិក។
អ៊ីរ៉ង់ចំនួនអ្នកឆ្លងកើនដល់៧០ពាន់នាក់
ចំនួនអ្នកឆ្លងវីរុសនៅអ៊ីរ៉ង់ជាប្រទេស មួយរងការប៉ះពាល់ខ្លាំងជាងគេនៅមជ្ឈឹមបូព៌ា មកដល់ពេលនេះ បានកើនដល់សរុបលើសពី៧០.០០០នាក់ហើយ ជាមួយអ្នកឆ្លងថ្មី១.៨៣៧នាក់ រយៈពេល២៤ម៉ោងចុងក្រោយនេះ។ អ្នកនាំពាក្យក្រសួងសុខាភិបាលអ៊ីរ៉ង់អះអាងថា ការឆ្លងបណ្ដាលឲ្យមនុស្សស្លាប់សុរប៤.៣៥៧នាក់ ក្នុងនោះអ្នកស្លាប់ថ្មីមាន១២៥នាក់ ។
នៅរុស្ស៊ូនាថ្ងៃទី១១មេសាមានអ្នកឆ្លងថែម១.៦៦០នាក់ទៀត នាំឲ្យចំនួនសរុបនៃអ្នកឆ្លងឡើងដល់១៣.៥៨៤នាក់ ។
នៅអាល្លឺម៉ងវីរុសបានឆ្លងដល់មនុស្សសរុប ១១៧.៦៥៨នាក់ ហើយអ្នកស្លាប់កើនដល់២.៥៤៤នាក់។ អ្នកឆ្លងថ្មីក្នុងប្រទេសនោះមាន៤.១៣៣នាក់និងអ្នកស្លាប់ថ្មី១៧១នាក់ថែមទៀតក្នុងមួយថ្ងៃ។
នៅបារាំងវីរុសបណ្ដាលឲ្យមនុស្សស្លាប់កើនដល់១៣.៨៣២នាក់គិតដល់ដល់ថ្ងៃទី១១មេសា ចាប់តាំងពីថ្ងៃទី១មីនាមក ហើយចំនួនអ្នកស្លាប់ ឡើងដល់៤.៨៨៩នាក់ ៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ