ខេត្តប៉ៃលិន ៖ ស្ត្រីជាម្តាយម្នាក់ស្រែកទ្រហោយំបោកខ្លួនស្ទើរគាំងបេះដូង បន្ទាប់ពីឃើញកូនស្រីតូចម្នាក់ដែលមានអាយុជាង១ខួបក្អួតចង្អោរ និងបែកពពុះមាត់ប្រកាច់នៅក្នុងផ្ទះ បន្ទាប់ពីគាត់ទុកឱ្យកូនស្រីតូចនោះវារលេងក្នុងបន្ទប់តែម្នាក់ឯង ហើយស្ត្រីជាម្តាយភ្លេចខ្លួនអង្គុយនៅខាងក្រៅ ស្រាប់តែកូនស្រីតូចទាញយកដបថ្នាំបាញ់ស្មៅប្រភេទទឹក ដែលម្តាយទុកក្នុងបន្ទប់យកមកមួលគម្របផឹក បណ្តាលឱ្យពុលបែកពពុះមាត់បាត់បង់ជីវិតតែម្តង ។
ហេតុការណ៍ខាងលើនេះបានបង្កឱ្យមានការភ្ញាក់ផ្អើលកើតឡើងកាលពីវេលាម៉ោង១១ និង៣០នាទីព្រឹកថ្ងៃទី១១ ខែមេសា ឆ្នាំ២០២០ នៅចំណុចភូមិកូនភ្នំ ឃុំអូរអណ្តូង ស្រុកសាលាក្រៅ ខេត្តប៉ៃលិន ។
តាមប្រភពព័ត៌មានពីនគរបាលបានឱ្យដឹងថា ក្មេងស្រីរងគ្រោះម្នាក់ខាងលើឈ្មោះ ផល ផារិទ្ធ អាយុ១ឆ្នាំ ៦ខែ មានឪពុកឈ្មោះ យ៉ង ផៃ អាយុ២៩ឆ្នាំ និងម្តាយឈ្មោះ ទូច ប៊ុនណា អាយុ២៥ឆ្នាំ ។ គ្រួសារនេះទើបតែមានកូនម្នាក់នេះជាលើកដំបូងប៉ុណ្ណោះ ហើយរស់នៅក្នុងភូមិឃុំកើតហេតុខាងលើ ។
តាមប្រភពដដែលបានបន្តថា មុនពេលកើតហេតុ ឪពុកម្តាយក្មេងស្រីរងគ្រោះបានយកដបថ្នាំបាញ់ស្មៅប្រភេទទឹក ទៅរក្សាទុកនៅក្នុងបន្ទប់ដេក លុះនៅព្រឹកថ្ងៃកើតហេតុ ស្ត្រីជាម្តាយបានដាក់ឱ្យកូនតូចវារលេងក្នុងបន្ទប់តែម្នាក់ឯង ហើយស្ត្រីជាម្តាយបានចេញមកអង្គុយនៅខាងក្រៅ លុះស្ងាត់សំឡេងកូនយូរពេកក៏ចូលទៅមើល ស្រាប់តែឃើញកូនស្រីតូចក្អួតចង្អោរ និងបែកពពុះមាត់ប្រកាច់ក្នុងបន្ទប់ ដោយឃើញមានដបថ្នាំបាញ់ស្មៅរបើកគម្របដួលក្បែរនោះ ក៏ស្រែកហៅឱ្យអ្នកជិតខាងជួយហៅគ្រូពេទ្យមកសង្គ្រោះ តែអ្វីៗហួសពេលបាត់ទៅហើយ ។
ក្រោយពេលកើតហេតុ កម្លាំងជំនាញកោសល្យវិច្ច័យនៃអធិការដ្ឋាននគរបាលស្រុកសាលាក្រៅ សហការជាមួយនឹងជំនាញកោសសល្យវិច្ច័យ ការិយាល័យនៃស្នងការដ្ឋាននគរបាលខេត្ត និងខាងមន្ទីរសុខាភិបាលខេត្ត បានធ្វើកោសល្យវិច្ច័យរួច ដោយសន្និដ្ឋានថា ក្មេងស្រីតូចរងគ្រោះពិតជាបានបាត់បង់ជីវិតដោយសារផឹកថ្នាំបាញ់ស្មៅប្រាកដមែន ។
បន្ទាប់ពីពិនិត្យរួច សពត្រូវបាននគរបាលប្រគល់ឱ្យសាច់ញាតិយកទៅធ្វើបុណ្យតាមប្រពៃណី ៕ (កែសម្រួលដោយ ៖ ធីតា)
ចែករំលែកព័តមាននេះ