រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា បុរសជាតៃកុងរថយន្តក្រុមហ៊ុនឯកជនម្នាក់ បានចាញ់បោកជនសង្ស័យដែលធ្វើការក្នុងក្រុមហ៊ុនជាមួយគ្នា ដោយប្រើល្បិចសុំជិះម៉ូតូជាមួយ រួចក៏លួចយកទៅបាត់ តែជនរងគ្រោះខ្លាចក្រុមគ្រួសារស្តីបន្ទោសក៏ប្រឌិតរឿងទៅជាត្រូវចោរវាយប្លន់យកម៉ូតូទៅវិញ បង្កឲ្យមានការណ៍ភ្ញាក់ផ្អើលដល់ប្រជាពលរដ្ឋ និងសមត្ថកិច្ចមូលដ្ឋានចុះមកអន្តរាគមន៍កាលពីម៉ោង១០និង៣០នាទីយប់ ថ្ងៃទី១០ ខែមេសា ឆ្នាំ២០២០ ត្រង់ចំណុចផ្សារត្រពាំងល្វា ផ្លូវបេតុង ស្ថិតក្នុងសង្កាត់អូបែកក្អម ខណ្ឌសែនសុខ។
សេចក្តីរាយការណ៍បន្តថា ជនរងគ្រោះជាម្ចាស់ម៉ូតូមានឈ្មោះ អ៊ុក ធារ៉េត ភេទប្រុស អាយុ២៤ឆ្នាំ ជាអ្នកបើកបររថយន្តក្រុមហ៊ុនឯកជន ស្នាក់នៅបន្ទប់ជួល ស្ថិតក្នុងភូមិជ្រៃកោង សង្កាត់ចោមចៅទី២ ខណ្ឌពោធិ៍សែនជ័យ។
តាមសម្តីពីបុរសជាជនរងគ្រោះបានប្រាប់ឲ្យដឹងថា នៅមុនកើតហេតុ ជនរងគ្រោះបានជិះម៉ូតូមួយគ្រឿងម៉ាកហុងដាវ៉េវអាល់ហ្វា ស៊េរី២០១៥ ពណ៌ស ពាក់ស្លាកលេខ ភ្នំពេញ 1675 ជិះចេញមកពីកន្លែងធ្វើការនៅឯសាលាកូរ៉េ (ទំនប់កប់ស្រូវ) ក្នុងគោលបំណងទៅមើលប្អូនឈឺនៅបន្ទប់ជួលនៅផ្លូវ២០០៤ ដោយជនរងគ្រោះជិះតែម្នាក់ឯងតាមបណ្ដោយផ្លូវបេតុង ពីជើងទៅត្បូង លុះមកដល់ចំណុចកើតហេតុ ជនរងគ្រោះក៏បន្ថយល្បឿនបំរុងឈប់ម៉ូតូដើម្បីទិញទឹកផឹក។
ជនរងគ្រោះបន្តថា ខណៈពេលនោះក៏ស្រាប់តែលេចមុខក្រុមចោរមានគ្នា២នាក់ ជិះម៉ូតូមួយគ្រឿង មិនចាំម៉ាកតាមមកពីក្រោយ រួចក៏ធាក់ម៉ូតូជនរងគ្រោះ បណ្ដាលឲ្យជនរងគ្រោះដួលម៉ូតូផ្កាប់មុខទៅនឹងដីបាត់បង់ស្មារតីតែម្តង។ ហើយក្រុមចោរនោះក៏ឆ្លៀតឱកាសលើកយកម៉ូតូរបស់ជនរងគ្រោះនាំគ្នាជិះរត់គេចខ្លួនចេញពីកន្លែងកើតហេតុបាត់សម្រោលតែម្តង។
ជនរងគ្រោះបន្តថា ក្រោយពេលកតើហេតុ ជនរងគ្រោះក៏ស្រែកឆោឡោបង្កឲ្យមានការភ្ញាក់ផ្អើលដល់ប្រជាពលរដ្ឋដែលរស់នៅក្បែរកន្លែងកើតហេតុ និងសមត្ថកិច្ចមូលដ្ឋានចុះមកធ្វើអន្តរាគមន៍ភ្លាមៗតែម្ដង។
តាមប្រភពពីសមត្ថកិច្ចមូលដ្ឋានបានឲ្យដឹងថា បន្ទាប់ពីកម្លាំងសមត្ថកិច្ចជំនាញធ្វើការសាកសួរប្រជាពលរដ្ឋជុំវិញកន្លែងកើតហេតុ រួមជាមួយនឹងជនរងគ្រោះរួចមកឃើញថា ជនរងគ្រោះខាងលើ មិនបានត្រូវក្រុមចោរធ្វើសកម្មភាពវាយប្លន់យកម៉ូតូនោះទេ។
សមត្ថកិច្ចបន្តថា ហើយនៅមុនពេលកើតហេតុ ជនរងគ្រោះបានជិះម៉ូតូរបស់ខ្លួនចេញមកពីកន្លែងធ្វើការ ខណៈពេលនោះក៏មានបុរសជាជនសង្ស័យមិនស្គាល់ឈ្មោះ ដែលជាអ្នកធ្វើការនៅក្នុងក្រុមហ៊ុនជាមួយគ្នា បានសុំម៉ូតូរបស់ជនរងគ្រោះជិះទៅជាមួយ។ ពេលនោះជនរងគ្រោះក៏ព្រមឌុប ហើយពួកគេក៏ជិះឌុបគ្នាចេញពីកន្លែងធ្វើការ រហូតមកដល់ចំណុចកើតហេតុដែលជាផ្លូវស្ងាត់ ហើយជនសង្ស័យក៏ប្រាប់ថា ដល់ផ្ទះរបស់គេហើយ។
សមត្ថកិច្ចបន្តទៀតថា បន្ទាប់មកជនរងគ្រោះក៏បានឈប់ និងចុះពីលើម៉ូតូ ដោយមិនបានដកសោចេញនោះទេ រួចក៏បានដើរទៅទិញទឹកផឹកនៅតូបក្បែរនោះ តែមិនទាន់នឹងបានទិញផឹកផង ស្រាប់តែជនសង្ស័យឡើងជិះម៉ូតូរបស់ជនរងគ្រោះគេចខ្លួនចេញពីកន្លែងកើតហេតុបាត់សម្រោលដោយសុវត្ថិភាព។ ភ្លាមៗនោះដោយជនរងគ្រោះខ្លាចក្រុមគ្រួសារស្តីបន្ទោស ក៏ប្រឌិតរឿងថា ត្រូវចោរវាយប្លន់យកម៉ូតូតែម្តងទៅ។
ក្រោយពេលកើតហេតុ ជនរងគ្រោះត្រូវបានសមត្ថកិច្ចនាំទៅធ្វើការអប់រំណែនាំ និងដាក់ពាក្យបណ្តឹងនៅប៉ុស្តិ៍នគរបាលរដ្ឋបាលអូបែកក្អម ដើម្បីស្រាវជ្រាវតាមរកជនសង្ស័យយកមកផ្តន្ទាទោសទៅតាមផ្លូវច្បាប់ជាបន្តទៀត៕ (កែសម្រួលដោយ ៖ បុប្ផា)
ចែករំលែកព័តមាននេះ