ចិន ៖ ប្រទេសចិនបានដកសត្វឆ្កែចេញពីបញ្ជីព្រាងនៃសត្វចិញ្ចឹមយកសាច់ ដោយលើកឡើងពីវឌ្ឍនភាព
នៃអរិយធម៌មនុស្ស និងកង្វល់សាធារណៈ និងការការពារសត្វ ។ ទោះបីជាសាច់ឆ្កែ នៅតែត្រូវបានប្រើប្រាស់ដោយប្រជាជនចិនមួយចំនួន នៅក្នុងតំបន់ជាក់លាក់ក៏ដោយ ក្រសួងកសិកម្មនិងកិច្ចការជនបទ
បាននិយាយថា សត្វឆ្កែត្រូវបានដកចេញពីក្រុមសត្វចិញ្ចឹមយកសាច់ មកធ្វើជាសត្វចិញ្ចឹមក្នុងផ្ទះជាមួយនឹងមនុស្សវិញ។
យោងតាមសារព័ត៌មាន Humane Society International ដែលបានស្វាគមន៍ចំពោះចំណាត់ការនេះ ដែលមានសត្វឆ្កែនិងឆ្មាជាង៩០,៤៩លានក្បាល ត្រូវបានរក្សាទុកជាសត្វចិញ្ចឹមនៅក្នុងប្រទេសចិន បើប្រៀបធៀបទៅនឹងសត្វឆ្កែប្រមាណ ១០លានក្បាល ដែលត្រូវបានសម្លាប់ជារៀងរាល់ឆ្នាំនៅក្នុងជំនួញសាច់។
បញ្ជីដែលត្រូវបានចេញផ្សាយកាលពីថ្ងៃពុធ បានលើកឡើងអំពីប្រភេទសត្វជាង៣១ប្រភេទ ដែលក្នុងនោះ មានដូចជា ជ្រូក គោ មាន់ ទន្សាយ អូដ្ឋ រមាំង និងអូទ្រីស ថា ជាសត្វចិញ្ចឹមដែលអាចយកមកទទួលទាន ឬ យករោមមកប្រើប្រាស់បាន។ ច្បាប់នេះបានទុកពេលឱ្យសាធារណជនមានការបញ្ចេញយោបល់ដល់ថ្ងៃទី៨ ខែឧសភា។
បទប្បញ្ញត្តិថ្មីដែលត្រូវបានស្នើឡើងនេះគឺជាផ្នែកមួយនៃការបង្ក្រាបកាន់តែទូលំទូលាយទៅលើការប្រើប្រាស់សត្វព្រៃ បន្ទាប់ពីការរីករាលដាលនៃជម្ងឺកូវីដ១៩ ត្រូវបានគេរកឃើញនៅក្នុងទីផ្សារអាហារសមុទ្រនៅទីក្រុង Wuhan ភាគកណ្តាលប្រទេសចិន ដែលមានការជួញដូរសត្វព្រៃ សត្វប្រចៀវ និងពស់។
គួរបញ្ជាក់ផងដែរថា រដ្ឋាភិបាលកណ្តាលបានហាមឃាត់រាល់ការធ្វើពាណិជ្ជកម្ម និងការបរិភោគសត្វព្រៃ ដែលមិនមែនជាសត្វនៅក្នុងទឹក កាលពីចុងខែកុម្ភៈ ។ ទីក្រុង Shenzhen បានក្លាយទៅជាក្រុងដំបូងគេនៅប្រទេសចិន ដែលចេញច្បាប់ហាមមិនឱ្យទទួលទានសត្វឆ្កែ និងឆ្មា កាលពីដើមខែនេះ ៕
ចែករំលែកព័តមាននេះ