រាជធានីភ្នំពេញ ៖ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃបានណែនាំអភិបាលរាជធានី-ខេត្ត និងប្រធានគណៈបញ្ជាការ ឯកភាពរដ្ឋបាល រាជធានី-ខេត្ត…
រាជធានីភ្នំពេញ ៖ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃបានណែនាំអភិបាលរាជធានី-ខេត្ត និងប្រធានគណៈបញ្ជាការ ឯកភាពរដ្ឋបាល រាជធានី-ខេត្ត ទាំងអស់ត្រូវអនុវត្តបានម៉ឺងម៉ាត់នៅបទបញ្ជារបស់រាជរដ្ឋាភិបាលស្ដីពីការដាក់កំហិតធ្វើដំណើរក្នុងប្រទេសក្នុងគោលដៅបង្ការ និងទប់ស្កាត់ការរាតត្បាតនៃជំងឺកូវីដ-១៩ ដែលកំពុងកើតមានឡើងនៅកម្ពុជា ។
យោងតាម សេចក្ដីណែនាំរបស់ក្រសួងមហាផ្ទៃចេញផ្សាយនៅថ្ងៃទី១០ ខែមេសា ឆ្នាំ២០២០ សម្ដេចក្រឡាហោម ស ខេង ធ្វើការណែនាំដល់អភិបាលរាជធានី-ខេត្ត និងជាប្រធានគណៈបញ្ជាការឯកភាពរដ្ឋបាល រាជធានី-ខេត្ត ត្រូវអនុវត្តវិធានការចាំបាច់មួយចំនួនរួមមាន ៖ ទី១-ត្រូវដឹកនាំកងកម្លាំងនគរបាល កងរាជអាវុធហត្ថ និងអាជ្ញាធរមូលដ្ឋានក្នុងដែនសមត្ថកិច្ចរបស់ខ្លួន ក្នុងការសហការរៀបចំគោលដៅត្រួតពិនិត្យ និងការហាមឃាត់ការធ្វើដំណើរស្រប តាមបញ្ជារបស់រាជរដ្ឋាភិបាល ។ ទី២-ត្រូវសម្របម្រួលក្នុងការធ្វើដំណើរឆ្លងកាត់ចេញ-ចូល រាជធានី និងខេត្ត ដូចមានចែកក្នុងចំណុចទី២ នៃបទបញ្ជារបស់រាជរដ្ឋាភិបាលស្ដីពីការដាក់កំហិតលើការធ្វើដំណើរក្នុងប្រទេសក្នុងគោលដៅបង្ការ និងទប់ស្កាត់ការរាតត្បាតនៃជំងឺកូវីដ-១៩ ។
ទី៣-ត្រូវយកចិត្តដាក់ការពារសន្ដិសុខ សុវត្ថិភាព និងសណ្ដាប់ធ្នាប់ចំពោះគោលដៅនយោបាយ ការទូត និងការវិនិយោគដែលមាននៅក្នុងដែនសមត្ថកិច្ចរបស់ខ្លួន ។ ទី៤-ក្នុងការអនុវត្តបទបញ្ជាខាងលើនេះគណៈបញ្ជាការឯកភាពរដ្ឋបាលរាជធានី-ខេត្ត ត្រូវខិតខំសម្របសម្រួល ដោះស្រាយ និងបញ្ចៀសឲ្យបាននូវអំពើហិង្សាគ្រប់រូបភាព។
ទន្ទឹមនេះត្រូវ ខិតខំធ្វើការផ្សព្វផ្សាយ និងអប់រំណែនាំដល់ប្រជាពលរដ្ឋរស់នៅក្នុងមូលដ្ឋានរបស់ខ្លួនឲ្យយល់ជ្រួតជ្រាបអំពីគោលបំណងរបស់រាជរដ្ឋាភិបាល ដើម្បីចូលរួមគោរព និងសហការអនុវត្តតាមស្មារតីបទបញ្ជារបស់រាជរដ្ឋាភិបាល សំដៅបង្ការ និងទប់ស្កាត់ការរាតត្បាតនៃជំងឺកូវីដ -១៩ នៅកម្ពុជាក៏ដូចជា ថែរក្សាសុខភាពសាធារណៈ និងការពារនូវអាយុជីវិតរបស់ប្រជាពលរដ្ឋ ។ ទី៥-ត្រូវរៀបចំក្រុមប្រចាំការ ដើម្បីប្រមូលព័ត៌មាន ដែលបានកើតឡើងក្នុងរាជធានី -ខេត្តរបស់ខ្លួនពាក់ព័ន្ធនឹងការអនុវត្តបទបញ្ជានេះ ហើយត្រូវខិតខំសម្របសម្រួលដោះស្រាយបាតុភាពនានាឲ្យបានល្អប្រសើរ ។
ក្នុងករណីដែល មិនអាចដោះស្រាយានត្រូវរាយការណ៍ជូនក្រុមប្រចាំការ ដើម្បីធ្វើជាសេនាធិការជូនក្រសួងមហាផ្ទៃក្នុងការអនុវត្តបទបញ្ជាលេខ០២ បប ស្ដីពីការដាក់កំហិតលើការធ្វើដំណើរក្នុងប្រទេសក្នុងគោលដៅបង្ការ និងទប់ស្កាត់ការរាតត្បាតនៃជំងឺកូវី-១៩ ។ ទី៦-គណៈបញ្ជាការឯកភាពរដ្ឋបាលរាជធានី-ខេត្ត ត្រូវដឹកនាំគណៈបញ្ជាការឯកភាពរដ្ឋបាល ក្រុង ស្រុក ខណ្ឌ ក្នុងដែនសមត្ថកិច្ចរបស់ខ្លួន ដើម្បីប្រមូលកងកម្លាំងសរុបមធ្យោបាយសរុបក្នុងការអនុវត្តបទបញ្ជារបស់រាជរដ្ឋាភិបាល និងគ្រប់គ្រងសភាពការណ៍នៅតាមដ្ឋានរបស់ខ្លួនឲ្យបានល្អប្រសើរ ។ និងទី៧-ចំពោះខេត្តជាប់ព្រំដែន កម្ពុជា-ថៃ ត្រូវបន្ដសម្របសម្រួលជាមួយភាគីថៃ ក្នុងករណីដែលមានប្រជាពលរដ្ឋវិលត្រឡប់ចូលមកកម្ពុជា តាមច្រកព្រំដែនកំណត់ណាមួយដែលបានឯកភាពគ្នា ដើម្បីងាយស្រួលក្នុងការសម្របសម្រួល និងគ្រប់គ្រង ៕
ចែករំលែកព័តមាននេះ