រាជធានីភ្នំពេញ ៖ អាល់កុលក្លែងក្លាយដែលជាសារធាតុមេតាណុលចំនួនជាង៦ម៉ឺនលីត្រ ត្រូវអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ របស់ក្រសួងពាណិជ្ជកម្ម បានធ្វើការកម្ទេចចោល ដោយដឹកយកទៅចាក់បង្ហូរចូលក្នុងលូទឹកស្អុយបឹងតាមោក ត្រង់ស្ថាននីយ៍បូមទឹក…
រាជធានីភ្នំពេញ ៖ អាល់កុលក្លែងក្លាយដែលជាសារធាតុមេតាណុលចំនួនជាង៦ម៉ឺនលីត្រ ត្រូវអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ របស់ក្រសួងពាណិជ្ជកម្ម បានធ្វើការកម្ទេចចោល ដោយដឹកយកទៅចាក់បង្ហូរចូលក្នុងលូទឹកស្អុយបឹងតាមោក ត្រង់ស្ថាននីយ៍បូមទឹក ទំនប់កប់ស្រូវ ស្ថិតក្នុងភូមិផ្សារលិច សង្កាត់ព្រែកព្នៅ ខណ្ឌព្រែកព្នៅ ។
ការបំផ្លាញអាកុលក្លែងក្លាយនេះ បានធ្វើឡើងកាលពីម៉ោងប្រមាណ៩ព្រឹក ថ្ងៃទី១០ ខែមេសា ឆ្នាំ២០២០ ដឹកនាំដោយលោក ឌឹម ថេង អគ្គនាយករងនៃអគ្គនាយកដ្ឋាន ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំនៃក្រសួងពាណិជ្ជកម្ម។ នៅក្នុងឱកាសនោះ មានការចូលរួមពីអភិបាលរងរាជធានីភ្នំពេញ អាជ្ញាធរ នគរបាលប្រឆាំងបទល្មើសសេដ្ឋកិច្ច សមត្ថកិច្ចមន្ទីរជំនាញពាក់ព័ន្ធ ព្រមទាំងមានការចូលរួមសម្រួលពីព្រះរាជ្ញារងផងដែរ ។
បើតាមលោក ឌឹម ថេង អគ្គនាយករងនៃអគ្គនាយកដ្ឋាន ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំនៃក្រសួងពាណិជ្ជកម្ម បានឱ្យដឹងថា ថ្ងៃនេះ អគ្គនាយកដ្ឋាន (ក ប ប) រួមទាំងសមត្ថកិច្ច អាជ្ញាធរ និងមន្ត្រីជំនាញ បានកម្ទេចអាល់កុលក្លែង ចំនួន ៦៤ ៨៤៩លីត្រ ដែលត្រូវសមត្ថកិច្ចបង្ក្រាបកន្លងមក។ ដែលការកម្ទេចនេះ សមត្ថកិច្ច ក៏បានយកអាកុលក្លែងក្លាយដែលមានសារធាតុមេតាណុលចាក់ចូលទៅក្នុងទឹកស្អុយ ដោយខ្លាចប៉ះពាល់ដល់បរិស្ថានជាជំហានដំបូង គឺចាក់ចូលប្រមាណ២០ទៅ៣០តោនសិន។
លោកអគ្គនាយករងក៏បានឱ្យដឹងទៀតថា អាល់កុលក្លែងក្លាយ ប្រភេ មេតាណុលនេះជាសារធាតុពុល មិនអាចយកមកប្រើប្រាស់ក្នុងការកំចាត់មេរោគនោះទេ វាអាចនឹងបណ្តាលឱ្យមានគ្រោះថ្នាក់ធ្ងន់ធ្ង ដល់សុខភាពមនុស្ស។ ហើយផលប៉ះពាល់មេតាណុលនេះ ទៅលើសុខភាពតាមរយៈការស្របចូល ឬជ្រាបក្នុងស្បែកអាចពុលដល់ប្រព័ន្ធរាង្គកាយ និងខូចដល់ប្រព័ន្ធខួរក្បាល ព្រមទាំងការមើលឃើញចុះខ្សោយ រហូតដល់ងងឹតទាំងស្រុងទៀតផង ។ បើសិនជាមានការដាក់លាយក្នុងស្រា ឬភេសជ្ជៈផ្សេងៗ អាចគ្រោះថ្នាក់ដល់បាត់បង់ជីវិតផងដែរ។
លោក ឌឹម ថេង អគ្គនាយករង បានឱ្យដឹងទៀតថា ដោយមានការគិតគូរ លោករដ្ឋមន្ត្រីក្រសួងពាណិជ្ជកម្ម ក៏បានណែនាំដល់អគ្គនាយកដ្ឋាន ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (កបប) សហការជាមួយស្ថាប័នពាក់ព័ន្ធចុះត្រួតពិនិត្យគុណភាពអាល់កុលដែលកំពុងតែចរាចរ និងចែកចាយនៅតាមឱសថស្ថានមួយចំនួននិងទីតាំងផ្សេងៗទៀត រហូតឈានទៅបង្ក្រាប និងដកហូតអាល់កុលក្លែងក្លាយដែលជាសារធាតុមេតាណុល ។
លោកអគ្គនាយករង ក៏បញ្ជាក់ឱ្យដឹងថា ក្នុងរយៈពេលប្រមាណ១ខែនេះ សមត្ថកិច្ចរបស់លោកបង្ក្រាបដកហូតបានអាល់កុលក្លែងក្លាយដែលមានសារធាតុមេតាណុលនេះបានប្រមាណ៦០តោនហើយ យកមកកម្ទេចចោលនៅពេលនេះ៕ (កែសម្រួលដោយ ៖ បុប្ផា)
ចែករំលែកព័តមាននេះ