ខេត្តព្រៃវែង ៖ គិតត្រឹមម៉ោង១០ និង៤៥នាទីព្រឹកថ្ងៃទី១០ មេសា ស្ថិតលើកំណាត់ផ្លូវជាតិលេខ១ និងផ្លូវជាតិលេខ៨A គឺពុំឃើញមានរថយន្តដឹកអ្នកដំណើរណាមួយធ្វើចរាចរណ៍ចេញពីភ្នំពេញ ចូលមកក្នុងទឹកដីខេត្តព្រៃវែងទៀតទេ ។…
ខេត្តព្រៃវែង ៖ គិតត្រឹមម៉ោង១០ និង៤៥នាទីព្រឹកថ្ងៃទី១០ មេសា ស្ថិតលើកំណាត់ផ្លូវជាតិលេខ១ និងផ្លូវជាតិលេខ៨A គឺពុំឃើញមានរថយន្តដឹកអ្នកដំណើរណាមួយធ្វើចរាចរណ៍ចេញពីភ្នំពេញ ចូលមកក្នុងទឹកដីខេត្តព្រៃវែងទៀតទេ ។
ប៉ុន្តែនៅឃើញមានតែអ្នកធ្វើដំណើរខ្លះៗ តាមម៉ូតូកង់៣ និងម៉ូតូផ្ទាល់ខ្លួនប៉ុណ្ណោះ ដែលអ្នកទាំងនោះ ខ្លះជាអ្នកនៅក្នុងស្រុក និងខ្លះទៀតធ្វើដំណើរមកពីភ្នំពេញ ត្រឡប់ទៅស្រុកកំណើតវិញ ហើយមានមិនលើសពី៥នាក់សំរាប់ម៉ូតូកង់៣ និង៣នាក់សំរាប់ម៉ូតូផ្ទាល់ខ្លួន ។ យ៉ាងណានោះ សមត្ថកិច្ចបានសម្រួលបងប្អូនដែលជាអ្នកជិះម៉ូតូនោះហើយ ដោយសុំការអធ្យាស្រ័យ ។
លោក ប៉ិច សុង អភិបាលស្រុកស្វាយអន្ទរក៏បានឱ្យកោះសន្តិភាពដឹងថា លោកបានដឹកនាំកំលាំងសមត្ថកិច្ចស្រុកចុះដាក់បារ៉ាស់ត្រួតពិនិត្យនៅលើកំណាត់ផ្លូវជាតិលេខ៨A ចំណុចរង្វង់មូលស្វាយអន្ទរ តាំងពីយប់ថ្ងៃទី៩មេសាម្ល៉េះ ហើយនៅព្រឹកថ្ងៃទី១០ នេះ លោកកំពុងធ្វើផែនការដាក់គោលដៅស្ទាក់ឃាត់ចំនួន២កន្លែងទៀត គឺផ្លូវមកពីស្រុកកំចាយមារ និងផ្លូវជាតិលេខ១១ មកពីទីរួមខេត្តព្រៃវែង ហើយសកម្មភាពនេះលោកនិងបន្តធ្វើរយៈពេល៦ថ្ងៃ ។ ក្រៅពីស្រុកទាំង២នេះ នៅតាមបណ្តាស្រុកផ្សេងៗទៀតក្នុងខេត្តព្រៃវែង ក៏ទប់ស្កាត់ កុំឱ្យមានការឆ្លងរាលដាលជំងឺកូវីដ១៩ នៅក្នុងមូលដ្ឋានរបស់ខ្លួន ។
នៅឯស្រុកពាមរក៍ លោកស្រី សេង ទៀង អភិបាលស្រុកបានអោយដឹងថា លោកស្រីបានដឹកនាំកំលាំងសមត្ថកិច្ចចុះត្រួតពិនិត្យនៅលើកំណាត់ផ្លូវជាតិលេខ១ ត្រង់ចំណុចរង្វង់មូលត្រីកោណ ផ្លូវបំបែកឡើងស្ពានត្សឹបាសា តាំងពីម៉ោង៨យប់ ក្នុងថ្ងៃទី៩ មេសា ហើយបន្តរហូតដល់ម៉ោងជិត២យប់ ។ លុះព្រឹកឡើងថ្ងៃទី១០ បានចាប់ធ្វើបន្តទៀត នៅលើទីតាំងដដែល ដោយបានឃាត់ និងអោយត្រឡប់ទៅក្រោយវិញ ។
ចំពោះយានយន្តទាំងឡាយណា ដែលមានផ្ទុកមនុស្សចាប់ពី៦នាក់ឡើង និងម៉ូតូដែលជិះគ្នា៣នាក់ហើយមានអីវ៉ាន់សំពីងសំពោង ដែលជាមុខសញ្ញាក្រុមកម្មករ គឺមិនអនុញ្ញាតិអោយធ្វើចរាចរណ៍ឆ្លងកាត់ស្រុកពាមរក៍ទេ ។
ចែករំលែកព័តមាននេះ