រាជធានីភ្នំពេញ ៖ បច្ចុប្បន្នករណីចោរឆក់ហាក់កំរើកឡើងវិញគួរឱ្យកត់សម្គាល់ ខណៈនៅក្នុងភូមិសាស្ត្រខណ្ឌបឹងកេងកង មានក្រុមជនសង្ស័យបានធ្វើសកម្មភាពឆក់ផ្ទួនៗគ្នា បណ្តាលឱ្យស្ត្រីជាជនរងគ្រោះចំនួន២នាក់បានបាត់បង់ជីវិតជាបន្តបន្ទាប់ ។
ករណីទី១-ស្ត្រីម្នាក់បានបាត់បង់ជីវិតទាំងព្រឹក ក្រោយពីបញ្ជូនទៅសង្គ្រោះនៅមន្ទីរពេទ្យ បន្ទាប់ពីស្ត្រីរងគ្រោះកំពុងតែជិះម៉ូតូមួយគ្រឿងទៅផ្សារ ដោយធ្វើដំណើរតាមបណ្តោយផ្លូវលេខ៤៣០ ម្តុំខាងក្រោយមន្ទីរពេទ្យមិត្តភាពខ្មែរ-សូវៀត ស្ថិតក្នុងសង្កាត់ទំនប់ទឹក ខណ្ឌបឹងកេងកង ត្រូវក្រុមជនសង្ស័យមានគ្នាពី ៣ទៅ៤នាក់ ជិះម៉ូតូចំនួន២គ្រឿង ធ្វើសកម្មភាពឆក់យកកាបូបលុយ ហើយស្ត្រីរងគ្រោះបានជិះម៉ូតូដេញតាមក៏ត្រូវក្រុមជនសង្ស័យជាអ្នកជិះម៉ូតូបិទគូទធាក់ផ្តួលម៉ូតូស្ត្រីរងគ្រោះនៅលើស្ពានអាកាសស្ទឹងមានជ័យ បណ្តាលឱ្យរងរបួសធ្ងន់ ក្រោយមកក៏បានបាត់បង់ជីវិត ។
ហេតុការណ៍ខាងលើនេះបានបង្កអោយមានការភ្ញាក់ផ្អើលកើតឡើងកាលពីវេលាម៉ោង៥និង៣០នាទីព្រឹក ថ្ងៃទី៩ ខែមេសា ឆ្នាំ២០២០ នៅចំណុចលើស្ពានអាកាសស្ទឹងមានជ័យ ក្នុងសង្កាត់ស្ទឹងមានជ័យទី១ ខណ្ឌមានជ័យ។
ស្ត្រីរងគ្រោះឈ្មោះ ហុង សុខចេង អាយុ៣៥ឆ្នាំ មុខរបរជាអាជីវករ មានទីលំនៅភូមិព្រែកទាល់ សង្កាត់ស្ទឹងមានជ័យទី២ ខណ្ឌមានជ័យ ជាអ្នកបើកបរម៉ូតូមួយគ្រឿងម៉ាក MOOVE ពណ៌ក្រហមលាយខ្មៅ ពាក់ស្លាកលេខ ភ្នំពេញ ១HJ-៦៩៨៤ ។
ករណីទី២-កាលពីយប់ថ្ងៃទី៧ មេសា ឆ្នាំ ២០២០ នៅចំណុចមុខផ្ទះលេខ ៩៦ ផ្លូវលេខ ៣១០ ក្នុងសង្កាត់បឹងកេងកងទី៣ ខណ្ឌបឹងកេងកង មានករណីក្រុមជនសង្ស័យធ្វើសកម្មភាពឆក់ទូរស័ព្ទដៃមួយគ្រឿងពីនារីម្នាក់ បណ្តាលឱ្យដួលរងរបួសធ្ងន់ ក្រោយមកក៏បានបាត់បង់ជីវិតពេលបញ្ជូនទៅសង្គ្រោះនៅមន្ទីរពេទ្យ ។
នារីរងគ្រោះឈ្មោះ លីវ ឡាំហួយ អាយុ២៣ឆ្នាំ មុខរបរលក់គ្រឿងអេឡិចត្រូនិច ស្នាក់នៅផ្ទះជួលក្នុងសង្កាត់បឹងទំពុន ខណ្ឌមានជ័យ ។
ក្រោយពេលកើតហេតុ ក្រុមជនសង្ស័យដែលធ្វើសកម្មភាពក្នុងករណីទាំង២ខាងលើមិនទាន់ចាប់ឃាត់ខ្លួនបាននៅឡើយទេ ៕ (កែសម្រួលដោយ ៖ ធីតា)
ចែករំលែកព័តមាននេះ