ប្រទេសបារាំង ៖ នាវាផ្ទុកយន្តហោះបារាំង CHARLES DE GAULLE កំពុងស្ថិតក្នុងមហាសមុទ្រអត្លង់ទិកនោះ បានសម្រេចវិលត្រឡប់មកបារាំងវិញមុនពេលកំណត់ ក្រោយពីរកឃើញអ្នកសង្ស័យឆ្លងវីរុស COVID-19 ប្រមាណជា៤០នាក់ ក្នុងនាវានេះនាំឲ្យមានការដាក់ពួកគេឲ្យស្ថិតនៅដាច់ដោយឡែក និងបញ្ជូនក្រុមគ្រូពេទ្យ១ក្រុមទៅកាន់នាវានេះ ។
បន្ទាប់ពីនាវាផ្ទុកយន្តហោះអាមេរិក USS THEODORE ROOSEVELT ក្នុងមហាសមុទ្រ
ប៉ាស៊ីហ្វិក ឥឡូវដល់វេននាវាផ្ទុកយន្តហោះបារាំងCHARLES DE GAULLE ដែលមានឆ្លង
វីរុសនេះ ។ ក្រសួងការពារប្រទេសបារាំងប្រកាសកាលពីថ្ងៃទី៨មេសាថា បុគ្គលិកដែលរងការប៉ះពាល់ជាកម្មវត្ថុនៃការពិនិត្យសុខភាពដោយម៉ត់ចត់ ហើយពេលនេះពុំទាន់មានការព្រួយបារម្ភឡើយ ។ ចាប់តាំងពីពេលនេះទៅក្រុមអ្នកធ្វើតេស្តជាមួយមធ្យោបាយធ្វើតេស្តនឹងបញ្ជូនទៅកាន់នាវាផ្ទុកយន្តហោះនេះ ដើម្បីតាមរកអ្នកឆ្លងហើយទប់ការឆ្លងក្នុងនាវានោះ ។
អគ្គនាយកសុខាភិបាលបារាំងលោក JEROME SALOMON គូសបញ្ជាក់នាថ្ងៃទី៨ មេសាថា ការឆ្លងរាលដាលនៃវីរុសនេះនៅបារាំងបណ្ដាលឲ្យមនុស្សស្លាប់សរុបឡើងដល់១០.៨៦៩នាក់ហើយ ជាមួយអ្នកស្លាប់ថ្មី៥៤១នាក់ រយៈពេល២៤ម៉ោងចុងក្រោយនេះ ។ តួលេខនោះមិនរាប់បញ្ចូលតួលេខមកពីតំបន់ EHPA និងពីបណ្ដាគ្រឹះស្ថានពេទ្យសង្គមឯទៀតៗផងទេ ៕ (កែសម្រួលដោយ ៖ បុប្ផា)
ចែករំលែកព័តមាននេះ