រាជធានីភ្នំពេញ៖ ក្នុងគោលបំណងទប់ស្កាត់ការរីករាលដាលជំងឺកូវីដ-១៩ នៅក្នុងប្រទេស កម្ពុជា រាជរដ្ឋាភិបាលបានប្រកាសកាលពីថ្ងៃទី ៧ខែមេសា ឆ្នាំ ២០២០ ថាក្នុងកំឡុងថ្ងៃ ចូលឆ្នាំថ្មីប្រពៃណីខ្មែររយៈពេល ៤ថ្ងៃ គឺមិនឱ្យមានការឈប់សម្រាកពីការងារឡើយ គឺនៅ តែបន្តធ្វើការងារដដែល និងឱ្យឈប់សងវិញចំនួន ៥ថ្ងៃ នៅពេលវេលាសមស្របណាមួយ បន្ទាប់ពីជំងឺកូវីដ -១៩ នេះបានស្ងប់ស្ងាត់ ។
បើតាមលោក អាត់ ធន់ ប្រធានសហភាពការងារកម្ពុជា បានឱ្យដឹងថា លោកគាំទ្រនូវវិធាន ការទប់ស្កាត់ការរីករាលដាលនៃជំងឺកូវីដ-១៩ នៅក្នុងប្រទេស ដោយមិនឱ្យមានការជួបជុំ ច្រើនៗ ក៏ប៉ុន្តែវិធានការក្នុងការមិនឱ្យឈប់សម្រាកនៅថ្ងៃចូលឆ្នាំខ្មែររបស់រាជរដ្ឋាភិបាល ហាក់ធ្វើឡើងយឺតពេលបន្តិច ពីព្រោះថ្ងៃឈប់សម្រាកកាន់តែជិតមកដល់ ជាក់ស្ដែងបណ្ដា ក្រុមហ៊ុនរោងចក្រមួយចំនួន បានអនុញ្ញាតឱ្យកម្មកររបស់ខ្លួនឈប់សម្រាកបាត់ទៅហើយ និងរោងចក្រខ្លះទៀត នឹងឱ្យកម្មករឈប់សម្រាកម្សិលមិញ ថ្ងៃនេះ និងស្អែកបន្តបន្ទាប់ ដើម្បីឱ្យពួកគេអាចមានពេលវេលាទៅស្រុក ។
លោកបន្តថា ដូចបានដឹងស្រាប់ហើយ កម្មករភាគច្រើនពួកគាត់ទន្ទឹងរង់ចាំថ្ងៃឈប់សម្រា កមកដល់ នឹងបានត្រលប់ទៅស្រុកកំណើតជួបក្រុមគ្រួសារ បងប្អូននៅស្រុក តែនៅពេល ដែលឮអត់ឱ្យឈប់វិញ យើងពិតជាយល់អារម្មណ៍របស់ពួកគាត់ថាវាពិបាកមែន ក៏ប៉ុន្តែ រដ្ឋាភិបាលចាំបាច់ត្រូវធ្វើបែបនេះ ដើម្បីទប់ស្កាត់នឹងជំងឺកូវីដ-១៩ ។លោកឱ្យដឹងទៀតថា៖ «កម្មករភាគច្រើនបានរៀបចំអីវ៉ាន់រួចហើយ ក្នុងការឈប់សម្រាក ហើយបណ្ដារោងចក្រមួយចំនួន ក៏បានខិតខំជំរុញបង្ហើយការងារមុនចូលឆ្នាំនឹងអាលបាន ឈប់សម្រាក និងមានរោងចក្រខ្លះក៏គ្រោងនឹងដាក់ពាក្យស្នើសុំព្យួរការងារមួយរយៈផងដែរ ខណៈអ្នកបញ្ជាទិញក៏ស្នើឱ្យផ្អាក និងខ្វះវត្ថុធាតុដើមមួយចំនួនផងដែរ » ។
លោកបញ្ជាក់បន្តថា តាមតំណាងសហជីពនៅតាមក្រុមហ៊ុនរោងចក្រជាង ១០០បានឱ្យ ដឹងថា ពួកគេមួយចំនួនធំបានបង្ហាញអារម្មណ៍ចង់ឈប់សម្រាក តែពិបាកក្នុងការសម្រេច ចិត្ត ហើយបើសិនជាពួកគាត់តវ៉ានោះវាបង្ហាញពីការមិនចូលរួមជាមួយរដ្ឋាភិបាលក្នុងការ ទប់ស្កាត់ការឆ្លងកូវីដ-១៩ ។ ក្នុងកាលៈទេសៈនេះ វាពិតជាពិបាក ថាតើត្រូវសម្រាក ឬបន្ត តែយ៉ាងណាលោកជឿថាមួយចំនួននឹងឈប់ ហើយមួយចំនួនទៀតអាចនឹងនៅបន្តធ្វើការ ងារដដែល ។
បើតាមលោក ហេង សួរ អ្នកនាំពាក្យការងារ និងបណ្ដុះបណ្ដាលវិជ្ជាជីវៈ ក៏បានបង្ហាញ សេចក្តីជូនដំណឹងរបស់ក្រសួងការងារ និងបណ្ដុះបណ្ដាលវិជ្ជាជីវៈ ស្ដីពីការលើកពេលថ្ងៃ ឈប់សម្រាកក្នុងឱកាសបុណ្យចូលឆ្នាំប្រពៃណីជាតិឆ្នាំ ២០២០ ដោយបានភ្ជាប់ជាមួយសំ ណេរថា តាមរយៈសេចក្តីសម្រេចរបស់រាជរដ្ឋាភិបាល និងសេចក្តីជូនដំណឹងរបស់ក្រសួង នោះ ថ្ងៃទី ១៣ ដល់ទី ១៦ ខែមេសា ឆ្នាំ ២០២០នេះ ត្រូវបានច្បាប់ចាត់ទុកជាថ្ងៃធ្វើការ ធម្មតា មានប្រាក់ឈ្នួល ១០០ភាគរយ ដូចថ្ងៃធម្មតា ។ ប៉ុន្តែនៅថ្ងៃខាងមុខ ប្រសិនជារដ្ឋកំ ណត់យករយៈពេលណាមួយឱ្យឈប់សម្រាក ៥ថ្ងៃសងថ្ងៃចូលឆ្នាំ ហើយប្រសិនជាក្នុង អំឡុងពេល ៥ថ្ងៃនោះ រោងចក្រឱ្យកម្មករនិយោជិតធ្វើការ នោះរោងចក្រត្រូវបង់ប្រាក់ ឈ្នួលលើស ១០០ភាគរយជូនកម្មករនិយោជិត ។
នៅក្នុងសំណេររបស់លោកក៏បានបញ្ជាក់ថា បើបងប្អូនកម្មករ នៅតែចង់ឈប់ ហើយមាន ច្បាប់ត្រឹមត្រូវ រោងចក្រអាចឱ្យគាត់ឈប់ដោយកាត់ចេញពីថ្ងៃឈប់សម្រាកប្រចាំឆ្នាំ ចំនួន ១៨ថ្ងៃ របស់គាត់ ក៏ប៉ុន្តែលោកក៏បានអំពាវនាវ និងសំណូមពរដល់បងប្អូនទាំងអស់ បន្តធ្វើ ការងារធម្មតា បើសិនជាស្រលាញ់បងប្អូន ចង់ជួយបងប្អូនជួយគ្រួសារ និងខ្លួនឯង ។ រដ្ឋនឹងសងថ្ងៃឈប់សម្រាកចូលឆ្នាំនេះវិញចំនួន ៥ថ្ងៃនៅពេលកូវីដ-១៩ ចប់ ៕
ចែករំលែកព័តមាននេះ