ពលករមកពីក្រៅប្រទេស កំពុងស្នាក់នៅដាច់ដោយឡែកពីគេ14ថ្ងៃតាមស្រុកចំនួន3
- ព្រៃវែង
ខេត្តព្រៃវែង ៖ រសៀលថ្ងៃទី៧ ខែមេសា សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញទៅសួរសុខទុក្ខបងប្អូនពលករ…
ខេត្តព្រៃវែង ៖ រសៀលថ្ងៃទី៧ ខែមេសា សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញទៅសួរសុខទុក្ខបងប្អូនពលករ…
ខេត្តព្រៃវែង ៖ រសៀលថ្ងៃទី៧ ខែមេសា សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញទៅសួរសុខទុក្ខបងប្អូនពលករ ដែលទើបវិលត្រឡប់មកពីក្រៅប្រទេស និងកំពុងត្រូវបានដាក់ឲ្យរស់នៅដាច់ដោយឡែករយៈពេល១៤ថ្ងៃ នៅក្នុងស្រុកចំនួន៣នៃខេត្តព្រៃវែង គឺស្រុកពារាំង ស្រុកស្វាយអន្ទរ និងស្រុកពាមរក៍ ។
ក្នុងពេលជួបសំណេះសំណាលនោះ សម្ដេចក្រឡាហោមបានថ្លែងអំណរគុណបងប្អូនពលករទាំងអស់ ដែលបានស្ម័គ្រចិត្តមករស់នៅដាច់ដោយឡែក នៅតាមទីតាំងដែលអាជ្ញាធរបានរៀបចំជូន ។ នេះគឺជាការរួមចំណែកកាត់បន្ថយការរីករាលដាលនៃជំងឺរលាកផ្លូវដង្ហើមកូវីដ-១៩ ដែលកំពុងគំរាមកំហែងដល់អាយុជីវិតមនុស្សទូទាំងពិភពលោក រួមទាំងកម្ពុជាយើងផងដែរ ។
សម្តេចក្រឡាហោម ស ខេង បានបន្តទៀតថា ការតម្រូវឲ្យបងប្អូនពលករទាំងអស់រស់នៅដាច់ដោយឡែករយៈពេល១៤ថ្ងៃនេះ គឺមិនមែនជាការចាប់បង្ខាំងនោះទេ ប៉ុន្តែគឺជាការការពារបងប្អូន ក្រុមគ្រួសារ រួមទាំងសហគមន៍ ពីការឆ្លងរាលដាលនៃជំងឺកូវីដ-១៩ ។ ដូច្នេះ សូមអ្នកទាំងអស់គ្នាព្យាយាមអត់ធ្មត់ និងអនុវត្តតាមការណែនាំរបស់ក្រុមគ្រូពេទ្យដែលនៅប្រចាំការឲ្យបានខ្ជាប់ខ្ជួន ដោយត្រូវធ្វើអនាម័យខ្លួនប្រាណឱ្យបានជាប់ជាប្រចាំ ។
គួរបញ្ជាក់ថា នៅស្រុកពារាំង អាជ្ញាធរស្រុកបានត្រៀមសាលារៀនសម្រាប់ដាក់ពលករចំណាកស្រុកឲ្យនៅដាច់ដោយឡែកចំនួន៦៥សាលា ហើយបច្ចុប្បន្នមានបងប្អូនប្រជាពលរដ្ឋកំពុងស្នាក់នៅចំនួន២៥នាក់(ស្រី៤នាក់) ។ ស្រុកស្វាយអន្ទរ អាជ្ញាធរស្រុកបានត្រៀមសាលារៀនចំនួន១១សាលា បច្ចុប្បន្នមានបងប្អូនប្រជាពលរដ្ឋកំពុងស្នាក់នៅចំនួន១៦នាក់(ស្រី៦នាក់) ។ នៅស្រុកពាមរក៍ អាជ្ញាធរស្រុកបានត្រៀមសាលា
រៀនចំនួន៨សាលា បច្ចុប្បន្នមានប្រជាពលរដ្ឋកំពុងស្នាក់នៅចំនួន៤នាក់(ស្រី២នាក់) ។
ក្នុងពេលចុះជួបសំណេះសំណាលនេះ សម្ដេចក្រឡាហោម បានឧបត្ថម្ភដល់អាជ្ញាធរស្រុកនីមួយៗនូវម៉ាសចំនួន២.៥០០ សាប៊ូចំនួន២.៥០០ដុំ ទឹកអាល់កុលចំនួន៥០លីត្រ និងមីចំនួន១០កេសធំ សម្រាប់ប្រើប្រាស់ក្នុងប្រតិបត្តិការការងារទប់ស្កាត់កូវីដ-១៩នេះ ៕
ចែករំលែកព័តមាននេះ