យោងទៅតាមការសិក្សាមួយដែលបានចុះក្នុង Social Psyhological and Personality Science បានឲ្យដឹងថា មនុស្សដែលមានទ្រព្យសម្បត្តិច្រើនស្តុកស្តម្ភភាគច្រើនមានសុភមង្គលជាងមនុស្សទូទៅព្រោះតែការចំណាយពេលវេលាធ្វើការ និងពេលទំនេររបស់ពួកគេ ។
អ្នកស្រាវជ្រាវរបស់ការសិក្សាខាងលើមានចំណាប់អារម្មណ៍ក្នុងការដឹងថាតើការចំណាយពេលរបស់អ្នកមានពិតជាប៉ះពាល់ដល់សុភមង្គលរបស់ពួកគេទេ ។ ដើម្បីរកចម្លើយ ពួកគេបានរៀបចំការសិក្សាពីរខុសគ្នាក្នុងប្រទេសហូឡង់ ។ ការសិក្សាដំបូងត្រូវបានចូលរួមដោយអ្នកមានចំនួន ៨៦៣នាក់ និងមនុស្សដែលមានចំណូលមធ្យមចំនួន ១២៣២នាក់ដើម្បីឆ្លើយសំណួរពីការពេញចិត្តនឹងជីវិតរបស់ពួកគេ និងអ្វីដែលពួកគេបានធ្វើក្នុងពេលទំនេរកាលពីម្សិលមិញ ។ អ្នកចូលរួមបានប្រាប់ពីសកម្មភាពជាច្រើនដូចជាចម្អិនអាហារ ធ្វើដំណើរ ធ្វើការ ធ្វើការស្ម័គ្រចិត្ត ឬធ្វើសកម្មភាពផ្សេងៗតាមចំណូលចិត្តជាដើម ។
លទ្ធផលបានបង្ហាញមកថា អ្នកមានចូលចិត្តចំណាយពេលរបស់ពួកគេលើអ្វីស្រដៀងគ្នានឹងមនុស្សទូទៅដែរ ។ ប៉ុន្តែអ្វីដែលធ្វើឲ្យពួកគេខុសគ្នាពីមនុស្សទូទៅ គឺការចំណាយពេលវេលាដែលពួកគេមានទំនេរដោយអ្នកមានចូលចិត្តធ្វើសកម្មភាពដូចជាធ្វើការស្ម័គ្រចិត្ត ធ្វើលំហាត់ប្រាណ ឬធ្វើសកម្មភាពដែលខ្លួនចូលចិត្ត ខណៈដែលមនុស្សទូទៅចូលចិត្តអង្គុយមើលទូរទស្សន៍ច្រើនជាង ។
ការសិក្សាទីពីរព្យាយាមសិក្សាថាតើអ្នកមានមានភាពបត់បែនច្រើនលើពេលធ្វើការទេ ហើយតើវាអាចនាំសុភមង្គលដល់ពួកគេទេ ។ លទ្ធផលដែលយោងតាមមតិយោបល់របស់អ្នកមាន ៦៩០នាក់ និងមនុស្សទូទៅ ៣០៦នាក់បង្ហាញឲ្យឃើញថា ភាពបត់បែនច្រើនក្នុងការងារពិតជាអាចនាំយកសុភមង្គលឲ្យមនុស្សពិតមែន ។ ការសិក្សាបានឲ្យដឹងទៀតថា អ្នកមានភាគច្រើនមានភាពឯករាជ្យច្រើនក្នុងការគ្រប់គ្រងម៉ោងធ្វើការរបស់ខ្លួន ដូច្នេះពួកគេភាគច្រើនមានសុភមង្គលជាងមនុស្សទូទៅ ។
លទ្ធផលនៃការសិក្សាទាំងពីរនេះពិតជាមានសារៈសំខាន់ណាស់ក្នុងការផ្តល់ជាមេរៀនពីសុភមង្គលក្នុងជីវិត ប៉ុន្តែគួរបញ្ជាក់ផងដែរថា ការសិក្សានេះប្រហែលជាមិនអាចឆ្លុះបញ្ចាំងទាំងស្រុងពីគ្រប់សង្គមជុំវិញពិភពលោកទេព្រោះវាត្រូវបានធ្វើឡើងក្នុងប្រទេសហូឡង់ដែលគម្លាតរវាងអ្នកមាននិងអ្នកក្រមិនធំខ្លាំងដូចក្នុងប្រទេសដទៃ ៕
ចែករំលែកព័តមាននេះ