រាជធានីភ្នំពេញ ៖ ចាប់តាំងពីក្រសួងអប់រំយុវជន និងកីឡា បានប្រកាសរំសាយនូវការប្រមូលផ្តុំក្រុមជម្រើសជាតិថ្នាលដែលជាកីឡាករស្នូលគ្រប់វិស័យជាបណ្តោះអាសន្ន ដោយសារ បារម្ភការរីករាលដាលនៃជំងឺផ្លូវដង្ហើមប្រភេទថ្មី COVID-19 កីឡាករទាំងនោះត្រូវបានប្រកាសថា នៅតែតម្រូវឱ្យមានការហ្វឹកហាត់ដដែល…
រាជធានីភ្នំពេញ ៖ ចាប់តាំងពីក្រសួងអប់រំយុវជន និងកីឡា បានប្រកាសរំសាយនូវការប្រមូលផ្តុំក្រុមជម្រើសជាតិថ្នាលដែលជាកីឡាករស្នូលគ្រប់វិស័យជាបណ្តោះអាសន្ន ដោយសារ បារម្ភការរីករាលដាលនៃជំងឺផ្លូវដង្ហើមប្រភេទថ្មី COVID-19 កីឡាករទាំងនោះត្រូវបានប្រកាសថា នៅតែតម្រូវឱ្យមានការហ្វឹកហាត់ដដែល ដើម្បីអាចទទួលបានប្រាក់ខែនៅក្នុងដំណាក់កាលនេះ ។
ក្រសួងបញ្ជាក់ថា ទោះបីជាមានការរំសាយការប្រមូលផ្តុំ តែកីឡាករជម្រើសជាតិថ្នាលទាំងនោះនៅតែទទួលបានប្រាក់របបប្រចាំខែ និងថ្លៃអាហារដដែលដោយមិនមានការកាត់ចោលនោះទេ។
តាំងពីថ្ងៃទី១៨ ខែមីនា ឆ្នាំ២០២០ មកម៉្លេះ ដែលក្រសួងអប់រំ យុវជន និងកីឡា បានចេញសេចក្តីប្រកាសព័ត៌មានស្តីពីការសម្រេច ផ្អាកការប្រមូលផ្តុំហ្វឹកហាត់ ដោយរាប់បញ្ចូលទាំងការបរិភោគអាហារជុំគ្នា និងស្នាក់នៅរួមគ្នាជាដើម ដោយកំណត់ឱ្យកីឡាករកីឡាការិនីជម្រើសជាតិថ្នាលទាំង៣២ប្រភេទកីឡាត្រូវតែហ្វឹកហាត់ជាលក្ខណៈឯកជនជាបណ្តោះអាសន្ន។
គោលការណ៍នេះ នឹងប្រកាសឡើងដោយមិនកំណត់ពេលវេលានោះទេ ពោលគឺរហូតទាល់តែមានការស្ងប់ស្ងាត់ពីCOVID-19 ទើបអាចហ្វឹកហាត់ជុំគ្នាឡើងវិញ ។ ក្រសួងបន្តថា ដរាបណាគ្មានការជូនដំណឹងជាថ្មី គឺការប្រមូលផ្តុំទាំងឡាយក្នុងការហ្វឹកហាត់ នឹងមិនអាចកើតឡើង ។ ប៉ុន្តែថវិកាទាំងឡាយដែលក្រសួងប្រកាសឱ្យគឺមិនកាត់នោះទេ ដ្បិតថា គ្មានការហ្វឹកហាត់ជាក្រុមជាក់លាក់ដូចមុនក្ដី។
យោងតាមសេចក្តីប្រកាសព័ត៌មាន បានលើកឡើងទៀតថា ការផ្អាកនេះ គឺធ្វើឡើង ដើម្បីរួមចំណែកបង្ការ និងទប់ស្កាត់ការរីករាលដាលនៃជំងឺផ្លូវដង្ហើមប្រភេទថ្មី COVID-19 ដែលកំពុងរាតត្បាតស្ទើរពាសពេញពិភពលោក ។
ការផ្អាកនេះដែរធ្វើឡើងស្របពេលក្រសួងសុខាភិបាលកម្ពុជា ប្រកាសរកឃើញអ្នកផ្ទុក COVID-19 ជាបន្តបន្ទាប់ ។ ក្រសួងបន្តថា នឹងនៅតែផ្តល់ប្រាក់របបប្រចាំខែ និងថ្លៃ អាហារជូនកីឡាករ-កីឡាការិនីដូចធម្មតា ទោះបីពួកគេត្រូវបានរំសាយការប្រមូលផ្តុំហ្វឹកហាត់ជាបណ្តោះអាសន្នក៏ដោយ ។ នេះបើតាមសេចក្តីប្រកាសព័ត៌មានដែលចុះហត្ថលេខាដោយ លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ដែលក្រើនរំឮកកីឡាករឲ្យបង្កើនការប្រុងប្រយ័ត្ន រក្សាអនាម័យឲ្យបានខ្ជាប់ខ្ជួន តាមរយៈការលាងដៃជាមួយសាប៊ូ អាល់អុល ឬ ជែលជាប្រចាំ មុនប៉ះពាល់របស់អ្វីមួយ ។
យ៉ាងណាមិញក្រសួងបានទាមទារឱ្យកីឡាករទាំងអស់មានការទទួលខុសត្រូវ ដោយមិនមែនអាងថា គ្មានការឃ្លាំមើលដិតដល់ ហើយក៏រយាលពីការហ្វឹកហាត់ ដោយអាងតែដល់ខែបើកប្រាក់ខែ និងបើកប្រាក់អាហារនោះទេ។
ក្នុងសេចក្ដីប្រកាសនោះ ក្រសួងអប់រំក៏បានលុបចោលនូវរាល់ការប្រកួត ដើម្បីបញ្ចៀសការជួបជុំគ្នា និងបញ្ជៀសពីការចម្លងផ្សេងៗ ព្រោះតែដើម្បីសុវត្ថិភាពកីឡាករនោះផងដែរ ។ កីឡាករដែលទទួលបានប្រាក់ខែក៏ហាក់បង្ហាញការប្រុងប្រយ័ត្នខ្ពស់មួយ បន្ទាប់ពីក្រសួងតម្រូវឱ្យហ្វឹកហាត់រៀងខ្លួន តែស្ថិតក្រោមការសួរនាំពីគ្រូបង្វឹកនោះផង ។ ក្នុងនោះកីឡាករដែលខ្វះការព្យាយាម ក៏ត្រូវបានក្រសួងព្រមានថានឹងដកចេញផងដែរ ដើម្បីស្វែងរកអ្នកមានសមត្ថភាពផ្សេងទៀតឱ្យមកបម្រើនៅក្នុងវិស័យកីឡា ប្រសិនបើរកឃើញថាក្នុងអំឡុងCOVID-19 កីឡាករណាមិនខំហ្វឹកហាត់ ហើយបណ្ដោយឱ្យប្រែប្រួលសមត្ថភាព នោះនឹងត្រូវសើរើ ៕ (កែសម្រួលដោយ ៖ បុប្ផា)
ចែករំលែកព័តមាននេះ